Tamız-qırküyek aylarında Qazaqstandağı pandemiya qarqını qanday boldı?

Qırküyek ayınıñ soñğı küni elde 71 adamnan koronavirus, 179 adamnan koronavirus pnevmoniyası anıqtaldı. Ükimet statistikası boyınşa, qırküyek ayında koronaviruspen auırğandar tamızğa qarağanda 7 esege, koronavirus pnevmoniyası 12 esege azayğan. Al koronavirustan qaytqandar sanı 40%-ğa ösip, pnevmoniya qwrbandarı 78%-ğa kemigen. 

#Koronavirus 30 qırküyek koronvirus jwqtırğan 63 adam ayığıp şıqsa, 3 adam ömirden ötken. Al jañadan tirkelgen nauqastardıñ eñ köbi – ädettegidey ŞQO (16) men astanada (10). Sonday-aq, Şımkent qalası, Mañğıstau jäne Qızılorda oblıstarında nauqas müldem tirkelmegen.

DenMinniñ resmi mälimetinşe, emdelip jatqan 3 308 adamnıñ 1813-i auruhanalarda. Al qalğan 1495 nauqas ambulatoriyalıq terapiyada. Olardıñ arasında 59 bala bar. Ahualı naşarlağan 94 nauqastıñ arasında 13 adamnıñ jağdayı qattı qiındağan. Jäne 21 pacient jasandı apparatpen tınıstap jatır.

Respublika boyınşa barlığı 107 979 adam koronavirus infekciyasın jwqtırsa, emdelip jazılğandarı – 103 mıñğa juıq. Bwl jalpı nauqastardıñ 90%-dan astamı.

#Koronavirus_pnevmoniyası Sonımen qosa, särsenbi küni koronavirus pnevmoniyasına şaldıqqan 179 adam, eki ölim jağdayı tirkelgen. Biraq olardıñ qanşası qay aymaqtan ekeni belgisiz. PTR testi teris qorıtındı körsetkenimen, koronavirus saldarınan qabınğan aqökpe auruınıñ aymaqtarğa taralu deregin twraqtı türde jariyalauğa uäde etken ministr Aleksey Coy da, onıñ kömekşisi, vedomstvonıñ resmi ökili Bağdat Qojahmetov te sözin bwrmalap, är on kün sayın jariyalauğa köşken. Koronavirus pnevmoniyasınıñ öñirlerdegi kündelikti dinamikası belgisiz. Qoğamda biılğı 256 mıñ pnevmoniya jağdayın esepke qospay, jalpı statistikanı şildedegi qırğınnan keyin jürgize bastağan Ükimettiñ esebine kümänmen qaraytındar köbeygen.

#Söytse... Tamız ayında 15,5 mıñ adam auırıp, 101 adam qaytqan. Al resmi jaña formatta eseptele bastağan koronavirus pnevmoniyasına segizinşe ayda 25,7 mıñ adam şaldıqqan äri 292 qazaqstandıq ömirden ötken. Koronavirus pnevmoniyasınıñ ösim körsetkişi 0,55% bolsa, koronavirustiki 0,07%.

DDSW mälimetinşe, Qazaqstanda auırğandardıñ sanı 140 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.

Tamız ayında PTR testi arqılı virusı rastalğan koronavirustan (KVI+) 15,5 mıñ adam auırıp, 101 adam qaytqan. Sonımen birge, resmi jaña formatta eseptele bastağan koronavirus pnevmoniyasına (KVI-) segizinşe ayda 25,7 mıñ adam şaldıqqan äri 292 qazaqstandıq ömirden ötken.

Al bwl körsetkişter qırküyek ayında KVI+ boyınşa 2 mıñnan astam, KVI- diagnozımen 7 mıñnan astam adam auırğan. Qırküyek ayında koronavirustan qaytqandar 40%-ğa artıp, 140-qa jetken. Mwnıñ pnevmoniyasınan 63 adam qaytıs bolğan.

Pandemiya bastalğalı jalpı jiını virus jwqqandardıñ 2665-i (KVI+ / U07.1 – 1 734, KVI- / U07.2 – 355, ilespe aurulardan – 576) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 576 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

“The Qazaq Times”