Särsenbi küngi ükimet otırsında Densaulıq saqtau ministri Aleksey Coy Qazaqstanda oqu jılı bastalğalı beri 104 oquşıdan koronovirus anıqtalğanın habarladı.
Minstr jaña oqu jılında 104 jetkinşek KVI jwqtırğanın, onıñ 33-i kezekşi sınıptardan ekenin jetkizdi. Sonday-aq, nauqastanğan oquşılar 550-den astam adammen baylanısta bolğan. Äzirge onıñ jeteuinen virus tabılğan.
Sonımen qatar, qaşıqtan bilim alıp jatqan 71 balanıñ boyınan kovid infekciyası PTR testi arqılı rastalğan. Resmi derekke qarağanda, üyden onlayn oqitın jas pacienttermen 240 adam qarım-qatınasta bolğan. Densaulıq saqtau ministriniñ aytuınşa, oqu jüyesi qaşıqtan bilim beru ädisinde jürmegende jağday bwdan da naşarlap, virus jwqqandardıñ qatarı şamamen 1,5 mıñğa jeter edi-mis.
Qazirgi tañda Qazaqstanda jwmıs isteytin 7428 mektepte 3,47 mln oquşı bilim aladı. Pandemiya jağdayına baylanıstı 625 mıñ oquşı kezekşi sınıptarda, yağni mektepke baradı, al 2,85 mln oquşı qaşıqtan oqıp jatır.
Jurnalisterdiñ aldına şıqpağanınan aydan asqan Aleksey Coy ükimet basşısınıñ aldında wzağınan söyledi. Ol karantin şaraları jeñildegen boyda zañsızdıqtar köbeygenin, köptegen azamattar medicinalıq betperdeni taqpay, äleumettik araqaşıqtıqtı saqtamauınıñ saldarı bügingi Europanıñ ahualına alıp kelui mümkin ekenin eskertti.
Memlekettik tilde tek amandasıp-qoştasatın ministr orısşa mälimdemesinde 5-27 qırküyek aralığında krantin rejimin bwzğan 1131 adamnıñ jauapqa tartılğanın ayttı.

"The Qazaq Times"