سارسەنبى كۇنگى ۇكىمەت وتىرسىندا دەنساۋلىق ساقتاۋ ءمينيسترى الەكسەي تسوي قازاقستاندا وقۋ جىلى باستالعالى بەرى 104 وقۋشىدان كورونوۆيرۋس انىقتالعانىن حابارلادى.
مينستر جاڭا وقۋ جىلىندا 104 جەتكىنشەك كۆي جۇقتىرعانىن، ونىڭ 33-ءى كەزەكشى سىنىپتاردان ەكەنىن جەتكىزدى. سونداي-اق، ناۋقاستانعان وقۋشىلار 550-دەن استام اداممەن بايلانىستا بولعان. ازىرگە ونىڭ جەتەۋىنەن ۆيرۋس تابىلعان.
سونىمەن قاتار، قاشىقتان ءبىلىم الىپ جاتقان 71 بالانىڭ بويىنان كوۆيد ينفەكتسياسى پتر تەستى ارقىلى راستالعان. رەسمي دەرەككە قاراعاندا، ۇيدەن ونلاين وقيتىن جاس پاتسيەنتتەرمەن 240 ادام قارىم-قاتىناستا بولعان. دەنساۋلىق ساقتاۋ ءمينيسترىنىڭ ايتۋىنشا، وقۋ جۇيەسى قاشىقتان ءبىلىم بەرۋ ادىسىندە جۇرمەگەندە جاعداي بۇدان دا ناشارلاپ، ۆيرۋس جۇققانداردىڭ قاتارى شامامەن 1,5 مىڭعا جەتەر ەدى-ءمىس.
قازىرگى تاڭدا قازاقستاندا جۇمىس ىستەيتىن 7428 مەكتەپتە 3,47 ملن وقۋشى ءبىلىم الادى. پاندەميا جاعدايىنا بايلانىستى 625 مىڭ وقۋشى كەزەكشى سىنىپتاردا، ياعني مەكتەپكە بارادى، ال 2,85 ملن وقۋشى قاشىقتان وقىپ جاتىر.
جۋرناليستەردىڭ الدىنا شىقپاعانىنان ايدان اسقان الەكسەي تسوي ۇكىمەت باسشىسىنىڭ الدىندا ۇزاعىنان سويلەدى. ول كارانتين شارالارى جەڭىلدەگەن بويدا زاڭسىزدىقتار كوبەيگەنىن، كوپتەگەن ازاماتتار مەديتسينالىق بەتپەردەنى تاقپاي، الەۋمەتتىك اراقاشىقتىقتى ساقتاماۋىنىڭ سالدارى بۇگىنگى ەۋروپانىڭ احۋالىنا الىپ كەلۋى مۇمكىن ەكەنىن ەسكەرتتى.
مەملەكەتتىك تىلدە تەك امانداسىپ-قوشتاساتىن مينيستر ورىسشا مالىمدەمەسىندە 5-27 قىركۇيەك ارالىعىندا كرانتين رەجيمىن بۇزعان 1131 ادامنىڭ جاۋاپقا تارتىلعانىن ايتتى.

"The Qazaq Times"