I. S. Jekenov atındağı qalalıq klinikalıq jwqpalı aurular auruhanasında "mausım-şilde qırğınında" jwmıs istep jatqan därigerler. Almatı qalası. Foto: Timur Batırşin / Sputnik

27 qırküyekte elde 52 adamnan COVID-19 infekciyası, 38 adamnan koronavirus pnevmoniyası anıqtaldı. Bir künde 4 adam qaytıs bolğan. Qazaqstanda nauqastanğandardıñ resmi esebi 140 265-ke jetti. 

Jartı aydan beri Şığıs Qazaqstan oblısı kovid taraluı boyınşa birinşi qatarda twr. Jeksenbi küni öñirde da 14 koronavirus jağdayı anıqtalğan. Basqa aymaqtarda täulik işinde tirkelgen keyster sanı onnan aspaydı.

Virus qarqını keyingi künderi bäseñdegen Türkistan, Qızılorda, Mañğıstau oblıstarı men Şımkent qalasında eşbir jağday tirkelmegen. Mwnıñ sebebi senbi-jeksenbi künderi medicinalıq qwrılımdardıñ negizgi qwrılımdarınıñ jwmıs istemeui boluı mümkin.

Qırküyektiñ 27-si küngi Ükimet dereginşe, 3 kisi koronavirustan qaytqan. Emdelip jatqan 3,3 mıñ adamnıñ 1827-si auruhanalarda, al 1487 nauqas ambulatorlıq baqılauda. Olardıñ 46-sı öskinşek bala. Sonday-aq, jağdayı auır 94 nauqas bar. Onıñ 15-si tım auır hälde jatır. 23 adam ökpeni jasandı jeldetu apparatına qosılğan.

DenMin-niñ 27 qırküyekke arnalğan deregi. Infofoto: Telegram arnasınan

Ötken küni koronavirus pnevmoniyasına şaldıqqan bir adamnıñ jağdayı oñalmay, ömirden ötken. Biraq Densaulıq saqtau ministrligi aurudıñ kündelikti keysterin aymaqtar boyınşa jariyalamaydı. Äytpese, eki derttiñ etiologiya-klinikası bir, DDSW ekeuin birge qarastıruğa nwsqaydı. Degenmen vedomstvo eki diagnozdı alalap qaraydı.  Koronavirus pnevmoniyasına şaldıqqandar turalı bilik twşımdı aqparat bermeydi. Eşbir resmi resursta koronavirus siyaqtı auırğandardıñ sanı, aymaqtardağı ülesi, klinikalıq jağdayı, jas qwramı indiktarorları turalı müldem jariyalanbaydı.

1 tamızdan beri koronavirus pnevmoniyasına şaldıqqan  32 490 adamnıñ 27 mıñnan astamı jazılğan. 13 naurızdan beri bilik moyındağan 107 775 nauqastıñ 102 mıñdayı ayıqqan.

DDSW mälimetinşe, Qazaqstanda auırğandardıñ sanı 140 mıñnan asqan. Degenmen Ükimet koronavirus pen onıñ pnevmoniyasın eki bölek eseptep keledi.

Pandemiya bastalğalı jalpı jiını virus jwqqandardıñ 2 651-i  (KVI+ / U07.1 – 1 725, KVI- / U07.2 – 350, ilespe aurulardan – 576) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 576 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Koronavirus dereginde, tipti koronavirus pnevmoniyasınan qaytqandardıñ sanında aytarlıqtay ayırmaşılıq joq. Biraq koronavirustı kündelikti tirkeu täjiribesi qalıptasqan Qazaqstan ükimeti pnevmoniyağa şaldıqqandardı esepke aluda «demala qoyadı». Senbi men jeksenbi küngi ayırma – 6 ese. Resmi derekke qarağanda, 26 qırküyek 229, al 27-si küni 38 nauqas anıqtalğan. Küzgi tolqınğa «tas-tüyin, 100% dayın» ekenin süyinşiley habarlağan ministrlik koronavirus pnevmoniyası turalı aqpardı kem-şetin jariyalaydı. Prezident Toqaevtıñ tapsırması ayasında «aşı da bolsa şındıqtı aytıp, aqparattı birizdendirui» tiis Aleksey Coy men onıñ kömekşisi Bağdat Qojahmetov eki ay bwrın qwrılğan Aqparat-media ortalığınıñ jwmısın äli künge deyin jolğa qoya almay otır. Tipti DenMin ötkir swraqtar qoyatın törtinşi bilik sanalatın dästürli BAQ-tan göri äleumettik jelide tanımal blogerlermen äriptestikti birinşi orınğa qoyatının jasırmaydı.

"The Qazaq Times"