Memlekettik bastı resurs www.coronavirus2020.kz saytı ne DenMin saytında (soñğı ret 10 şilde jariyalanğan – QT) ağılşın tilinde aqparat bolmauınıñ sebebinen pandemiya keysteriniñ statistikasın jürgizetin halıqaralıq wyımdar qate derek jariyalap otır. Mäselen, Worldometers  jäne älem halqı jüginetin Djon Hopkins universitetiniñ esebinde Qazaqstanda 106 984 keys barı körsetilgen. Redakciya tarapı atalğan wyımdarğa hat joldap, eldegi statistika eki bağıtta jüretinin, negizinen jiıntıq esebin jariyalau qajettigin eskertti.

Densaulıq saqtau ministrligimen tikeley jwmıs isteytin DDSW-nıñ bazasında elde 136,5 mıñnan astam adam virusqa şaldıqqanı naqtı berilgen. Biıl qañtar-tamız ayları aralğında bıltırğa qarağanda 3,3 esege kürt ösip, 256 mıñ jağdayğa artqan pnevmoniya dereginen koronavirus keysin anıqtaudı qiınsınğan Ükimettiñ mälimetinşe, qazirgi tañda Qazaqstanda 137 mıñnan astam (KVI+ / U07.1 – 107 mıñday, KVI- / U07.2 – 30 mıñ) adam dertke şaldıqqan.

Resmi resurstarda tipti koronavirus pen koronavirus pnevmoniyasınıñ jiıntıq esebi de joq. Bir brifingte osı saualdı qozğağan jurnaliske vedomstvo ökili Bağdat Qojahmetov kal'kulyatordıñ kömegimen esepteuge keñes bergen.

Qazaqstanda koronavirus statistikası qoğamda ülken dau tudırğan. Oğan senbeytin, kümänmen qaraytın azamattar men sarapşılar köp.

17 şilde «Estuşi memleket» qwrudı közdeytin prezident Toqaev Ükimetke pandemiya statistikasın birizdendirudi tapsırğan. Biraq sarapşılardıñ köbi onıñ «Ükimetke pandemiyanıñ statistikasın birizdendiru mindetteldi. Azamattardıñ densaulığı men ömirine koronavirustan bölek, ökpe qabınuı da ülken zardabın tigizip otır. Pandemiya ahualı turalı barlıq aqparat qanşa jerden aşı bolsa da, onı qoğam biluge tiis», – degen tapsırması äli künge deyin tolıq jüzege aspağanın aytadı. Qazaqstan Ükimeti koronavirus pen koronavirus pnevmoniyası turalı jariyalanatın derekter men indikatorlardıñ balansın teñestirmegen. Şığu-örşu közi bir, klinikası wqsas, tipti köptegen el bölmey qarastıratın qazaqstandıq epidemiyanıñ eki türi boyınşa beriletin aqparattardıñ qwrılımı ärkelki.

"The Qazaq Times"