Densaulıq saqtau ministrligi küzgi tolqınğa tolıqtay dayın ekenin aytadı. Fotokollaj: QT

Jwma küni OrtKom alañında ötken brifingte Densaulıq saqtau ministrliginiñ resmi uäkili Bağdat Qojahmetov bügingi epidemiya ahualı turalı resmi mälimdeme jasadı. 

«QR Densaulıq saqtau ministrliginiñ özekti mäseleleri: Küzgi-qısqı kezeñdegi KVI jäne jwqpalı aurulardıñ aldın-alu boyınşa epidemiyağa qarsı şaraları turalı» taqırıında ötken baspasöz jiınında «erikti» resmi ökil koronavirus jwqtırğandardı simpomdı-simptomsız dep bölip qarastırudı toqtatqanın habarladı.

Virus jwqtırğanı PTR testi arqılı rastalğan 106 661 adamnıñ 94,1%-ı ayıqqan. Sonımen qosa, 15 qırküyekten bastap eki ay boyı azamattar twrğılıqtı jeri boyınşa emhanalarğa öz erkimen tirkeluge mümkindik jasaladı.

DenMin ökili Ükimet atınan twmau mausımına twspa-tws kelui ıqtimal küzgi tolqında bir mezette 70 mıñ tösek-orınmen (onıñ 3 mıñ jansaqtau böliminde – QT) qamtuğa uäde berdi.

«Densaulıq saqtau ministrligi jaña tolqınğa dayındıq 100%-ğa jaqındap qaldı. Apparattar, tösek-orındar, mobil'dik brigadalar, emhanalar men auruhanalar, däri-därmek qorı barlığı qamtamasız etildi. Bäri dayın», – dedi Qojahmetov.

Brifingke qatısqan Wlttıq densaulıq saqtau ortalığı infekciyalıq aurulardıñ aldın alu departamentiniñ direktorı Jwmabek Bekenovtiñ aytuınşa, jılına 500 mıñnan 1 millionğa deyin adam JRVI aurularına şaldığadı. Bwl epidmausım qazan jäne mamır aylarınıñ aralığında jüredi. Sonday-aq, maman koronavirus ştamı men eldegi qalıptı üş ştamdı twmaudıñ klinikalıq belgileri öte wqsas ekenin aytadı. Sondıqtan qandayda bir simptom bayqala sala uçaskelik därigerge qaralğan jön.

«Jıl sayın Qazaqstanda qazan ayınan bastap halıqtıñ 10%-dan astamı vakcinaciyalanadı. 2020 jılı byudjet qarajatına Reseyde öndirilgen «Grippol +» vakcinasınıñ 2 mln astam dozası satıp alındı. Vakcina qwramında A(H3N2) jäne A(H1N1) jäne V twmauı ştammdarınıñ antigenderi bar. Ekpeni aqılı türde adamnıñ twrğılıqtı jerine jaqın Alğaşqı medicinalıq kömek körsetu orındarında, emhanada nemese basqa da medicinalıq ortalıqtarda jasatuğa boladı. Qazaqstanda jıl sayın jasalatın ekpeler Franciyada, Reseyde öndirilgen. Jalpı, öz qarajatı esebinen ekpe salu, SK-Farmaciyanıñ aqparatınşa, 2200-den 4500 teñge aralığında twradı. Qazirgi kezde halıqtıñ 10 payızı ekpemen byudjet esebinen qamtılıp otır», – dedi J.Bekenov.

Jurnalistiñ swrağına jauap bergen Bekenov twmauğa qarsı vakcinanıñ narıqtağı bağası 2100-4000 teñge aralığında twradı. 2 millionday dozası äleumettik osal topqa jatatın azamattarğa tegin egilmek.

"The Qazaq Times"