جۇما كۇنى ورتكوم الاڭىندا وتكەن بريفينگتە دەنساۋلىق ساقتاۋ مينيسترلىگىنىڭ رەسمي ۋاكىلى باعدات قوجاحمەتوۆ بۇگىنگى ەپيدەميا احۋالى تۋرالى رەسمي مالىمدەمە جاسادى. 

«قر دەنساۋلىق ساقتاۋ مينيسترلىگىنىڭ وزەكتى ماسەلەلەرى: كۇزگى-قىسقى كەزەڭدەگى كۆي جانە جۇقپالى اۋرۋلاردىڭ الدىن-الۋ بويىنشا ەپيدەمياعا قارسى شارالارى تۋرالى» تاقىرىىندا وتكەن ءباسپاسوز جيىنىندا «ەرىكتى» رەسمي وكىل كوروناۆيرۋس جۇقتىرعانداردى سيمپومدى-سيمپتومسىز دەپ ءبولىپ قاراستىرۋدى توقتاتقانىن حابارلادى.

ۆيرۋس جۇقتىرعانى پتر تەستى ارقىلى راستالعان 106 661 ادامنىڭ 94,1%-ى ايىققان. سونىمەن قوسا، 15 قىركۇيەكتەن باستاپ ەكى اي بويى ازاماتتار تۇرعىلىقتى جەرى بويىنشا ەمحانالارعا ءوز ەركىمەن تىركەلۋگە مۇمكىندىك جاسالادى.

دەنمين وكىلى ۇكىمەت اتىنان تۇماۋ ماۋسىمىنا تۇسپا-تۇس كەلۋى ىقتيمال كۇزگى تولقىندا ءبىر مەزەتتە 70 مىڭ توسەك-ورىنمەن (ونىڭ 3 مىڭ جانساقتاۋ بولىمىندە – QT) قامتۋعا ۋادە بەردى.

«دەنساۋلىق ساقتاۋ مينيسترلىگى جاڭا تولقىنعا دايىندىق 100%-عا جاقىنداپ قالدى. اپپاراتتار، توسەك-ورىندار، موبيلدىك بريگادالار، ەمحانالار مەن اۋرۋحانالار، ءدارى-دارمەك قورى بارلىعى قامتاماسىز ەتىلدى. ءبارى دايىن»، – دەدى قوجاحمەتوۆ.

بريفينگكە قاتىسقان ۇلتتىق دەنساۋلىق ساقتاۋ ورتالىعى ينفەكتسيالىق اۋرۋلاردىڭ الدىن الۋ دەپارتامەنتىنىڭ ديرەكتورى جۇمابەك بەكەنوۆتىڭ ايتۋىنشا، جىلىنا 500 مىڭنان 1 ميلليونعا دەيىن ادام جرۆي اۋرۋلارىنا شالدىعادى. بۇل ەپيدماۋسىم قازان جانە مامىر ايلارىنىڭ ارالىعىندا جۇرەدى. سونداي-اق، مامان كوروناۆيرۋس شتامى مەن ەلدەگى قالىپتى ءۇش شتامدى تۇماۋدىڭ كلينيكالىق بەلگىلەرى وتە ۇقساس ەكەنىن ايتادى. سوندىقتان قاندايدا ءبىر سيمپتوم بايقالا سالا ۋچاسكەلىك دارىگەرگە قارالعان ءجون.

«جىل سايىن قازاقستاندا قازان ايىنان باستاپ حالىقتىڭ 10%-دان استامى ۆاكتسيناتسيالانادى. 2020 جىلى بيۋدجەت قاراجاتىنا رەسەيدە وندىرىلگەن «گريپپول +» ۆاكتسيناسىنىڭ 2 ملن استام دوزاسى ساتىپ الىندى. ۆاكتسينا قۇرامىندا ا(H3N2) جانە ا(H1N1) جانە ۆ تۇماۋى شتاممدارىنىڭ انتيگەندەرى بار. ەكپەنى اقىلى تۇردە ادامنىڭ تۇرعىلىقتى جەرىنە جاقىن العاشقى مەديتسينالىق كومەك كورسەتۋ ورىندارىندا، ەمحانادا نەمەسە باسقا دا مەديتسينالىق ورتالىقتاردا جاساتۋعا بولادى. قازاقستاندا جىل سايىن جاسالاتىن ەكپەلەر فرانتسيادا، رەسەيدە وندىرىلگەن. جالپى، ءوز قاراجاتى ەسەبىنەن ەكپە سالۋ، سك-فارماتسيانىڭ اقپاراتىنشا، 2200-دەن 4500 تەڭگە ارالىعىندا تۇرادى. قازىرگى كەزدە حالىقتىڭ 10 پايىزى ەكپەمەن بيۋدجەت ەسەبىنەن قامتىلىپ وتىر»، – دەدى ج.بەكەنوۆ.

ءجۋرناليستىڭ سۇراعىنا جاۋاپ بەرگەن بەكەنوۆ تۇماۋعا قارسى ۆاكتسينانىڭ نارىقتاعى باعاسى 2100-4000 تەڭگە ارالىعىندا تۇرادى. 2 ميلليونداي دوزاسى الەۋمەتتىك وسال توپقا جاتاتىن ازاماتتارعا تەگىن ەگىلمەك.

"The Qazaq Times"