Körneki suret. Foto: codastory.com

9 qırküyek elde koronavirus infekciyasın jwqtırğan 86 adam tirkeldi. Bwl aldıñğı künge qarağanda 13-ke köp. Ötken küni anıqtalğan keyster sanı boyınşa astana (8.09 – 19, 9.09 – 13) men ŞQO (8.09 – 16, 9.09 – 17)  ekinşi kün qatarınan alğa şıqtı.

DenMinniñ resmi mälimetinşe, emdelip jatqan 4 685 adamnıñ 2,5 mıñı auruhanalarda. Al 2,1 mıña ambulatoriyalıq terapiyada. Olardıñ arasında 34 bala bar. Ahualı naşarlağan 132 nauqastıñ arasında 21 adamnıñ jağdayı qattı qiındağan. Jäne 26 pacient jasandı apparatpen tınıstap jatır.

Respublika boyınşa barlığı 106 584 adam koronavirus infekciyasın jwqtırsa, emdelip jazılğandarı – 100 248. Bwl jalpı nauqastardıñ 94%-ına juığı.

Sonımen qosa, särsenbi küni koronavirus pnevmoniyasına şaldıqqan 347 adam tirkelipti. Biraq olardıñ qanşası qay aymaqtan ekeni belgisiz. PTR testi teris şıqqanımen, koronavirus saldarınan asqınğan aqökpe auruınıñ aymaqtarğa taralu deregin twraqtı türde jariyalauğa uäde etken ministr Aleksey Coy da, onıñ kömekşisi, vedomstvonıñ resmi ökili Bağdat Qojahmetov te sözinde twrğan joq. Äli künge deyin koronavirus pnevmoniyasınıñ öñirlerdegi dinamikasın bile almay kelemiz.

Ükimet statistikası boyınşa, 9 qırküyek koronavirustan 5, pnevmoniyadan 1 qazaqstandıq qaytıs bolğan. Pandemiya bastalğalı virus jwqqandardıñ jiını 2,5 mıñnan artıq qazaqstandıq (KVI+ / U07.1 – 1 651, KVI- / U07.2 – 317, ilespe aurulardan – 556) ömirden ötken. Degenmen Qazaqstan biligi boyınan koronavirus infekciyası tabılsa da, basqa aurudıñ sebebinen qayttı dep sanaytın 556 ölim jağdayın jalpı esepke qospaydı. Mwnı köptegen sarapşılar qate ekenin aytıp, manipulyaciya retinde bağalap keledi. Qoğamda biılğı 256 mıñ pnevmoniya jağdayın esepke qospay, jalpı statistikanı şildedegi qırğınnan keyin jürgize bastağan Ükimettiñ esebine kümänmen qaraytındar köbeygen.

13 naurız ben 9 qırküyek künderi aralığında anıqtalğan koronavirus turalı

Aymaqtar Nauqastar Ayıqqandar Qaytqandar
Almatı 14 299 13 838 269
Astana 13 924 13 548 313
Atırau oblısı 10 975 10 374 59
Qarağandı oblısı 10 167 9 531 272
ŞQO 8 344 8 138 158
BQO 6 797 6 320 100
Şımkent 5 182 4 498 62
Almatı oblısı 4 915 4 752 55
Jambıl oblısı 4 104 3 682 56
SQO 4 000 3 918 20
Pavlodar oblısı 3 866 3 676 49
Qostanay oblısı 3 440 2 885 12
Aqmola oblısı 3 432 3 116 77
Türkistan oblısı 3 348 3 239 44
Mañğıstau oblısı 3 336 2 612 41
Aqtöbe oblısı 3 224 3 020 35
Qızılorda oblısı 3 231 3 101 12
Jalpı 106 584 100 248 1 634

*Qaytqandar qatarı 13 naurız-6 qırküyek aralığındağı derekter boyınşa körsetilgen. Osı aptadağı mälimet engizilmegen.

“The Qazaq Times”