Körneki suret. Fotokollaj: QT

Qazaqstanda pandemiya bastalğalı bilik moyındağan 131 596 jağday (U07.1+U07.2) tirkeldi. Onıñ üşten bir böligine juığı, 41 229-ı ötken tamız ayında anıqtalğan. İndettiñ kesirinen 1 886 adam (U07.1+U07.2) qaytıs boldı, 898-ı tek tamızğa tiesili. Alayda jalpı sanaqqa koronavirustıñ janama äserinen qaytıs bolğandar engizilmegen.

Bwl derek soñğı märte 23 şilde 319-ğa jetkeni aytılğan. Odan beri qırıq kündey ötse de DenMin esepti naqtılay almağan. Tipti olardıñ qanşası sozılmalı aurular men oqıs jağdaydan qaytıs bolğanı äli künge deyin belgisiz. Pandemiya kezinde DenMin tabaldırığınan bölek biliktiñ «Nwr Otan» partiyası ötkizip jatqan praymerizge qatısıp jatqan, deputattıqtan dämeli resmi ökil Bağdat Qojahmetov aydıñ basında-aq bwl mäselege tolıqqandı jauap beruge uäde etken.

Ötken aptada (tamızdıñ 24-30 aralığında) koronavirus pen kovidtik pnevmoniyadan 97 qazaqstandıq (65 / 32) qaytıs bolğan. Densaulıq saqtau ministrliginiñ mälimetinşe, qazirgi uaqıtta koronavirus jwqtırğan 7 379 adam (3 811 – stacionarda, 3 568 – ambulatorlıq baqılauda) auruhanada emdelip jatır. Nauqastardıñ qatarında 30 öskinşek bala bar.

Sonday-aq, 197 adamnıñ ahualı naşar, onıñ 35-iniñ jağdayı qattı auır eken. 42 nauqas ökpeni jasandı jeldetu apparatında (ÖJJA) jatır.

3 tamız Densaulıq saqtau ministri Aleksey Coy ötkizgen brifingte «KVI-» nemese «U07.2» kodımen belgilenetin koronavirustıq pnevmoniyanıñ aymaqtardağı körsetkişin sol aptada-aq jiktep jariyalauğa uäde bergen. Äytse de ministr sözi BAQ ökilderi men redakciyanıñ qayta-qayta swrauınan üş jarım apta ötken soñ iske asıp, bir künnen keyin (28 tamızdan) toqtap qaldı. Vedomstvonıñ resmi ökili Bağdat Qojahmetov habarlağan habar bayansız qalıp, bir-aq künde toqtadı. Bir ay bwrın Aqparattıq-media ortalığı qwrılıp, ondağan kadr jwmıldırğan ministrlik mañızdı indikatordı jolğa qoya almau sebebin tüsindirgen joq. Osılayşa Qazaqstan Ükimetiniñ eki uädesi ayaqsız qaldı.

Qazaqstan koronavirusqa wqsas pnevmoniya deregin 1 tamızdan beri jaña kodpen  eseptey bastağanı belgili. Degenmen bwğan deyingi 256 mıñ pnevmoniya jağdayı eskerusiz qaldı. Resmi statistika boyınşa, kovid pen koronavirustıq pnevmoniyağa şaldıqqan 131 mıñ adamnıñ 1900-deyi qaytıs bolğan. Şınayı körsetkiş bwdan aytarlıqtay köp boluı mümkin.

1 qañtar-2 tamız aralığında elde 256 541 adam pnevmoniyağa şaldıqqan. 35 mıñ keys mausımda, 152 mıñ keys şilde ayında tirkelgen. Bwl körsetkiş bıltırğı däl osı uaqıtpen salıstırğanda 3,3 esege köp. 2019 jıldıñ qañtar-tamız aralığında respublika köleminde 76 986 adam pnevmoniyamen auırğan. Ol kezde 2333 adam, al biıl 4042 adam ömirden ozğan. Osı jılı pnevmoniyanıñ saldarınan ölim jağdayı 1,9 esege artqan. Tamız ayınıñ basında DenMin basşısı Aleksey Coy men orınbasarı pandemiya kezinde kürt örşigen pnevmoniyadan koronavirustıq türin ajıratudı artıq is sanap, 256 mıñ keysti qayta qarauğa qwlıqsız ekenin tanıtqan.

Joğarıda körsetilgen sandar tek resmi statistika. Alayda bwğan küdikpen qaraytın halıq ta, maman da köp. Tipti otandıq jäne şeteldik joğarı sanattı därigerler şildeniñ ortasında-aq Qazaqstandağı 200 mıñnan 2 millionğa deyingi adamnıñ virus jwqtırğanın aytqan.

"The Qazaq Times"