قازاقستاندا پاندەميا باستالعالى بيلىك مويىنداعان 131 596 جاعداي (U07.1+U07.2) تىركەلدى. ونىڭ ۇشتەن ءبىر بولىگىنە جۋىعى، 41 229-ى وتكەن تامىز ايىندا انىقتالعان. ىندەتتىڭ كەسىرىنەن 1 886 ادام (U07.1+U07.2) قايتىس بولدى، 898-ى تەك تامىزعا تيەسىلى. الايدا جالپى ساناققا كوروناۆيرۋستىڭ جاناما اسەرىنەن قايتىس بولعاندار ەنگىزىلمەگەن.
بۇل دەرەك سوڭعى مارتە 23 شىلدە 319-عا جەتكەنى ايتىلعان. ودان بەرى قىرىق كۇندەي وتسە دە دەنمين ەسەپتى ناقتىلاي الماعان. ءتىپتى ولاردىڭ قانشاسى سوزىلمالى اۋرۋلار مەن وقىس جاعدايدان قايتىس بولعانى ءالى كۇنگە دەيىن بەلگىسىز. پاندەميا كەزىندە دەنمين تابالدىرىعىنان بولەك بيلىكتىڭ «نۇر وتان» پارتياسى وتكىزىپ جاتقان پرايمەريزگە قاتىسىپ جاتقان، دەپۋتاتتىقتان دامەلى رەسمي وكىل باعدات قوجاحمەتوۆ ايدىڭ باسىندا-اق بۇل ماسەلەگە تولىققاندى جاۋاپ بەرۋگە ۋادە ەتكەن.
وتكەن اپتادا (تامىزدىڭ 24-30 ارالىعىندا) كوروناۆيرۋس پەن كوۆيدتىك پنەۆمونيادان 97 قازاقستاندىق (65 / 32) قايتىس بولعان. دەنساۋلىق ساقتاۋ مينيسترلىگىنىڭ مالىمەتىنشە، قازىرگى ۋاقىتتا كوروناۆيرۋس جۇقتىرعان 7 379 ادام (3 811 – ستاتسيوناردا، 3 568 – امبۋلاتورلىق باقىلاۋدا) اۋرۋحانادا ەمدەلىپ جاتىر. ناۋقاستاردىڭ قاتارىندا 30 وسكىنشەك بالا بار.
سونداي-اق، 197 ادامنىڭ احۋالى ناشار، ونىڭ 35-ءىنىڭ جاعدايى قاتتى اۋىر ەكەن. 42 ناۋقاس وكپەنى جاساندى جەلدەتۋ اپپاراتىندا ء(وججا) جاتىر.
3 تامىز دەنساۋلىق ساقتاۋ ءمينيسترى الەكسەي تسوي وتكىزگەن بريفينگتە «كۆي-» نەمەسە «U07.2» كودىمەن بەلگىلەنەتىن كوروناۆيرۋستىق پنەۆمونيانىڭ ايماقتارداعى كورسەتكىشىن سول اپتادا-اق جىكتەپ جاريالاۋعا ۋادە بەرگەن. ايتسە دە مينيستر ءسوزى باق وكىلدەرى مەن رەداكتسيانىڭ قايتا-قايتا سۇراۋىنان ءۇش جارىم اپتا وتكەن سوڭ ىسكە اسىپ، ءبىر كۇننەن كەيىن (28 تامىزدان) توقتاپ قالدى. ۆەدومستۆونىڭ رەسمي وكىلى باعدات قوجاحمەتوۆ حابارلاعان حابار بايانسىز قالىپ، ءبىر-اق كۇندە توقتادى. ءبىر اي بۇرىن اقپاراتتىق-مەديا ورتالىعى قۇرىلىپ، ونداعان كادر جۇمىلدىرعان مينيسترلىك ماڭىزدى ينديكاتوردى جولعا قويا الماۋ سەبەبىن تۇسىندىرگەن جوق. وسىلايشا قازاقستان ۇكىمەتىنىڭ ەكى ۋادەسى اياقسىز قالدى.
قازاقستان كوروناۆيرۋسقا ۇقساس پنەۆمونيا دەرەگىن 1 تامىزدان بەرى جاڭا كودپەن ەسەپتەي باستاعانى بەلگىلى. دەگەنمەن بۇعان دەيىنگى 256 مىڭ پنەۆمونيا جاعدايى ەسكەرۋسىز قالدى. رەسمي ستاتيستيكا بويىنشا، كوۆيد پەن كوروناۆيرۋستىق پنەۆمونياعا شالدىققان 131 مىڭ ادامنىڭ 1900-دەيى قايتىس بولعان. شىنايى كورسەتكىش بۇدان ايتارلىقتاي كوپ بولۋى مۇمكىن.
1 قاڭتار-2 تامىز ارالىعىندا ەلدە 256 541 ادام پنەۆمونياعا شالدىققان. 35 مىڭ كەيس ماۋسىمدا، 152 مىڭ كەيس شىلدە ايىندا تىركەلگەن. بۇل كورسەتكىش بىلتىرعى ءدال وسى ۋاقىتپەن سالىستىرعاندا 3,3 ەسەگە كوپ. 2019 جىلدىڭ قاڭتار-تامىز ارالىعىندا رەسپۋبليكا كولەمىندە 76 986 ادام پنەۆمونيامەن اۋىرعان. ول كەزدە 2333 ادام، ال بيىل 4042 ادام ومىردەن وزعان. وسى جىلى پنەۆمونيانىڭ سالدارىنان ءولىم جاعدايى 1,9 ەسەگە ارتقان. تامىز ايىنىڭ باسىندا دەنمين باسشىسى الەكسەي تسوي مەن ورىنباسارى پاندەميا كەزىندە كۇرت ورشىگەن پنەۆمونيادان كوروناۆيرۋستىق ءتۇرىن اجىراتۋدى ارتىق ءىس ساناپ، 256 مىڭ كەيستى قايتا قاراۋعا قۇلىقسىز ەكەنىن تانىتقان.
جوعارىدا كورسەتىلگەن ساندار تەك رەسمي ستاتيستيكا. الايدا بۇعان كۇدىكپەن قارايتىن حالىق تا، مامان دا كوپ. ءتىپتى وتاندىق جانە شەتەلدىك جوعارى ساناتتى دارىگەرلەر شىلدەنىڭ ورتاسىندا-اق قازاقستانداعى 200 مىڭنان 2 ميلليونعا دەيىنگى ادامنىڭ ۆيرۋس جۇقتىرعانىن ايتقان.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟