Körneki suret. Foto: https://wp-content

Qazaqstandıq «SK-Farmaciya» sınaqtıñ soñğı üşinşi kezeñinen tolıq ötpegen Reseydiñ tike investiciya qorımen koronavirus vakcinasın alu turalı kelisimge qol qoydı. 

11 tamızda Vladimir Putin Reseydiñ älemde birinşi bolıp koronavirus infekciyasına qarsı vakcinanı tirkegenin habarlağan edi. Putin sözinde ekpeniñ öte tiimdi jwmıs isteytinin, twraqtı immundıq jüyeni qalıptastıratının jäne barlıq qajetti tekserulerden ötkenin atap ötti. Biraq keybir batıs sarapşıları men jergilikti mamandar sınaqtan tolıq ötpegen vakcinanıñ qauipsizdigine kümän keltirgen bolatın. Sonımen qatar Reuters agenttigi preparat virustıñ mutaciyalanuına jol aşuı mümkin degen. Biraq Resey tarapı bwl dabıldı joqqa şığarıp otır.

Putinniñ jañalığınan keyin Qazaqstan prezidenti Toqaev qwttıqtau jedelhatın joldağan. Hatta: «Bwl oqiğa reseylik ğılımnıñ joğarı äleueti men bedelin, sonday-aq jahandıq qauip-qaterge qarsı küreste Reseydiñ jetekşi rölin rastaydı. Biz bükil älem üşin qiın-qıstau kezeñde Qazaqstannıñ, onıñ işinde gumanitarlıq kömek pen eleuli üles qosqan därigerlerdiñ bağıt-bağdarı üşin, elimizdegi sanitarlıq-epidemiologiyalıq jağdaydı jaqsartuğa kömekteskeni üşin alğıs bildiremiz», – delingen.

Reseyde koronavirus vakcinası Gamaleya atındağı memlekettik zertteu ortalığınıñ kömegimen şığarıla bastağan. Joba qwnı 4 mlrd rubl' (55 mln dollar). Ortalıqtı Resey tike investiciya qorı qarjılandıradı.

Qazaqstan Densaulıq saqtau ministrliginiñ resmi ökili Bağdat Qojahmetov «koronavirusqa qarsı vakcinalar tolıq sınaqtan ötpeyinşe olardı satıp almaymız» – dep mälimdegen. Onıñ aytuınşa, Qazaqstan vakcina jäne immunizaciya jönindegi ğalamdıq al'yansqa qosılsa, bwl wyımğa müşe memleketter 2020 jıldıñ 31 tamızına deyin alğaşqı jarnasın (15%) töleuge mindetti. Bwdan soñ vakcinanıñ jetuine qaray halıqtıñ 20%-ğa jetetindey vakcina qwnın tolıq töleui tiis boladı. Qazaqstan al'yansqa qosıluğa kelisim bergenmen äzirge wyımmen kelisim-şartqa qol qoyılmağan.

Bwğan deyin Düniejüzilik densaulıq saqtau wyımı basşısınıñ orınbasarı Sumiya Svaminatan koronavirusqa qarsı jappay vakcinaciyalau 2021 jıldıñ ortasında bastalatının ayttı. Älemde pandemiya bastalğalı, damığan memleketter virusqa qarsı ekpe öndiru boyınşa özara jarıs bastap ketken. Osı rette Amerika Qwrama Ştattarında klinikalıq sınaqtardı jeke farmacevtikalıq kompaniyalar ötkizbek. Qazir elde bes vakcina öndiruşisi AstraZeneca, Johnson & Johnson, Merck, Sanofi jäne Moderna ükimetpen kelisimşarttqa otırdı. Al Reseyde vakcinanıñ klinikalıq sınaqtarı şildeniñ ortasında ayaqtaladı degen boljam bar. Klinikalıq zertteuler tamızdıñ ayağında – qırküyektiñ basında bastaluı kerek.

"The Qazaq Times"