كورنەكى سۋرەت. فوتو: https://wp-content

قازاقستاندىق «سك-فارماتسيا» سىناقتىڭ سوڭعى ءۇشىنشى كەزەڭىنەن تولىق وتپەگەن رەسەيدىڭ تىكە ينۆەستيتسيا قورىمەن كوروناۆيرۋس ۆاكتسيناسىن الۋ تۋرالى كەلىسىمگە قول قويدى. 

11 تامىزدا ۆلاديمير پۋتين رەسەيدىڭ الەمدە ءبىرىنشى بولىپ كوروناۆيرۋس ينفەكتسياسىنا قارسى ۆاكتسينانى تىركەگەنىن حابارلاعان ەدى. پۋتين سوزىندە ەكپەنىڭ وتە ءتيىمدى جۇمىس ىستەيتىنىن، تۇراقتى يممۋندىق جۇيەنى قالىپتاستىراتىنىن جانە بارلىق قاجەتتى تەكسەرۋلەردەن وتكەنىن اتاپ ءوتتى. بىراق كەيبىر باتىس ساراپشىلارى مەن جەرگىلىكتى ماماندار سىناقتان تولىق وتپەگەن ۆاكتسينانىڭ قاۋىپسىزدىگىنە كۇمان كەلتىرگەن بولاتىن. سونىمەن قاتار Reuters اگەنتتىگى پرەپارات ۆيرۋستىڭ مۋتاتسيالانۋىنا جول اشۋى مۇمكىن دەگەن. بىراق رەسەي تاراپى بۇل دابىلدى جوققا شىعارىپ وتىر.

ءپۋتيننىڭ جاڭالىعىنان كەيىن قازاقستان پرەزيدەنتى توقاەۆ قۇتتىقتاۋ جەدەلحاتىن جولداعان. حاتتا: «بۇل وقيعا رەسەيلىك عىلىمنىڭ جوعارى الەۋەتى مەن بەدەلىن، سونداي-اق جاھاندىق قاۋىپ-قاتەرگە قارسى كۇرەستە رەسەيدىڭ جەتەكشى ءرولىن راستايدى. ءبىز بۇكىل الەم ءۇشىن قيىن-قىستاۋ كەزەڭدە قازاقستاننىڭ، ونىڭ ىشىندە گۋمانيتارلىق كومەك پەن ەلەۋلى ۇلەس قوسقان دارىگەرلەردىڭ باعىت-باعدارى ءۇشىن، ەلىمىزدەگى سانيتارلىق-ەپيدەميولوگيالىق جاعدايدى جاقسارتۋعا كومەكتەسكەنى ءۇشىن العىس بىلدىرەمىز»، – دەلىنگەن.

رەسەيدە كوروناۆيرۋس ۆاكتسيناسى گامالەيا اتىنداعى مەملەكەتتىك زەرتتەۋ ورتالىعىنىڭ كومەگىمەن شىعارىلا باستاعان. جوبا قۇنى 4 ملرد رۋبل (55 ملن دوللار). ورتالىقتى رەسەي تىكە ينۆەستيتسيا قورى قارجىلاندىرادى.

قازاقستان دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ «كوروناۆيرۋسقا قارسى ۆاكتسينالار تولىق سىناقتان وتپەيىنشە ولاردى ساتىپ المايمىز» – دەپ مالىمدەگەن. ونىڭ ايتۋىنشا، قازاقستان ۆاكتسينا جانە يممۋنيزاتسيا جونىندەگى عالامدىق اليانسقا قوسىلسا، بۇل ۇيىمعا مۇشە مەملەكەتتەر 2020 جىلدىڭ 31 تامىزىنا دەيىن العاشقى جارناسىن (15%) تولەۋگە مىندەتتى. بۇدان سوڭ ۆاكتسينانىڭ جەتۋىنە قاراي حالىقتىڭ 20%-عا جەتەتىندەي ۆاكتسينا قۇنىن تولىق تولەۋى ءتيىس بولادى. قازاقستان اليانسقا قوسىلۋعا كەلىسىم بەرگەنمەن ازىرگە ۇيىممەن كەلىسىم-شارتقا قول قويىلماعان.

بۇعان دەيىن دۇنيەجۇزىلىك دەنساۋلىق ساقتاۋ ۇيىمى باسشىسىنىڭ ورىنباسارى سۋميا سۆاميناتان كوروناۆيرۋسقا قارسى جاپپاي ۆاكتسيناتسيالاۋ 2021 جىلدىڭ ورتاسىندا باستالاتىنىن ايتتى. الەمدە پاندەميا باستالعالى، دامىعان مەملەكەتتەر ۆيرۋسقا قارسى ەكپە ءوندىرۋ بويىنشا ءوزارا جارىس باستاپ كەتكەن. وسى رەتتە امەريكا قۇراما شتاتتارىندا كلينيكالىق سىناقتاردى جەكە فارماتسەۆتيكالىق كومپانيالار وتكىزبەك. قازىر ەلدە بەس ۆاكتسينا ءوندىرۋشىسى AstraZeneca, Johnson & Johnson, Merck, Sanofi جانە Moderna ۇكىمەتپەن كەلىسىمشارتتقا وتىردى. ال رەسەيدە ۆاكتسينانىڭ كلينيكالىق سىناقتارى شىلدەنىڭ ورتاسىندا اياقتالادى دەگەن بولجام بار. كلينيكالىق زەرتتەۋلەر تامىزدىڭ اياعىندا – قىركۇيەكتىڭ باسىندا باستالۋى كەرەك.

"The Qazaq Times"