Qazaqstandağı pnevmoniya auruınıñ keyingi bes jıldağı resmi esebi men biılğı statistikanıñ ayırmaşılığı qanday? Densaulıq saqtau ministrligi wsınğan tıñ derekter. 

DenMin vedomstvosınıñ resmi ökili Bağdat Qojahmetovtiñ redakciyağa bergen resmi mälimetine qarağanda, 2015 jıldan bergi pnevmoniya jağdayı jıl sayın 18-35 mıñnıñ arasında ösip otırğan. Vice-ministr Lyudmila Byurabekovanıñ bergen jauabında «ömirinde alğaş pnevmoniya dertine şaldıqqandardıñ sanı» aytılğan:

  • 2015 jılı – 78 755 pnevmoniya jağdayı;
  • 2016 jılı – 95 631 pnevmoniya jağdayı;
  • 2017 jılı – 129 179 pnevmoniya jağdayı;
  • 2018 jılı – 129 443 pnevmoniya jağdayı;
  • 2019 jılı – 133 482 pnevmoniya jağdayı.

Biraq halıqqa qızmet etuşi ükimet qızmetkeri soñğı  jıldarı auru jağdayı nelikten örşigenin tüsindirmegen.

Eki apta dayındalıp, bes şeneuniktiñ qolınan ötken resmi jauap hatta redakciya swratqanday 2010 jıldan bergi emes, «aqparattıq jüyeniñ 2015 jıldan bastap jwmıs isteuine» baylanıstı tek ötken bes jılğı derek körsetilgen.

2015 jıldan bergi Qazaqstan Respublikasında pnevmoniya dertimen auırğan nauqastardıñ sanı turalı DenMin deregi. Keste: QT

Vedomstvo mälimetinşe, 2015-2019 j.j. esep «Respublikalıq elektrondıq densaulıq saqtau ortalığı» ŞJQ RMK «Emhana» avtomattandırılğan aqparattıq jüyesiniñ, al biılğı (2020 j.) derek «Respublikalıq elektrondıq densaulıq saqtau ortalığı» ŞJQ RMK «Tölem jüyesiniñ ambulatoriyalıq-emhanalıq kömegi» aqparattıq jüyesinen wsınılğan.

Qazaqstan Ükimeti SOVID-19 koronavirusı jäne osığan wqsas pnevmoniyağa şaldıqqan nauqastar turalı statistikanı 17 şildeden bastap jaña formatta birigip jariyalauğa şeşim qabıldağan. Alayda «mausım-şilde qırğını» basılıp, indettiñ qarqını bäseñdegen soñ ğana 1 tamızdan jaña esepke köşti. Älde de DDSW-nıñ derekqorında birigip jariyalanğanımen, Qazaqstan eki aurudı eki bölek wsınıp keledi. Nege densaulıq saqtau ministri Aleksey Coy alğaşında uäde etkendey biriktirip jariyalamasqa degen saualğa ministrliktiñ resmi uäkili  Bağdat Qojahmetov kal'kulyatordıñ kömegine jüginuge keñes beredi.

DDSW Aurulardıñ halıqaralıq jiktemesiniñ 10-nwsqasına qañtar ayında engizgen kodın  Qazaqstan tamızda bir-aq qoldana bastadı. Zerthanada PTR testi arqılı rastalğan SOVID-19 jağdayı «U07.1», al test virustı körsete almağan koronavirusqa wqsas pnevmoniya «U07.2» kodımen belgilenedi.

DDSW tamız ayınıñ 8-inen beri Qazaqstandağı koronavirus pen onıñ pnevmoniyalıq türin birge jariyalay bastağan. Elde klinika-epidemiya belgileri bar pnevmoniya auruı koronaviruspen qosa esepke alınadı degenimen äli künge deyin biriktirilgen joq.  Resmi statistika boyınşa, bügingi tañda U07.1 jäne U07.2 aurularına şaldıqqan qazaqstandıqtardıñ sanı 126 243-ke jetse, qaytıs bolğandarı 1745 boldı.

Tamız ayı bastalğalı beri elde 35 876 adam (KVI+ 13 946, KVI- 21 930) auurıp, 750-ge juıq (KVI+ 500-dey, KVI- 249) kisi qaytıs bolğan. 1745 ölimniñ 750-deyi tamız ayında tirkelgenine qaramastan Ükimet jağdaydıñ twraqtanğanına sendirip bağuda.

1 tamızdan bastap qolğa alınğan statistikanıñ jaña formatı. Foto-keste: QT

Biıl mausım-şilde ayında pnevmoniya bıltırğı osı uaqıtqa qarağanda 12 ese köp tirkeldi. 2019 jılğı mausım men şildede – 16 309, al 2020 jılı atalğan merzimde – 189 564 nauqas anıqtaldı. Bwl auruhanağa jüginip, resmi esepke kirgeni ğana. Ministrlik bwğan virustıñ äseri bolğanın moyındağanımen, ayırmaşılıqtı zerdelep-süzudiñ tehnikalıq qiındıq tuğızatının alğa tartıp, bas tarttı.

17 şilde küni ministrlik pnevmoniya men koronavirustı biriktiruge uäde berip edi, biraq tek 1 tamızdan bastap qana esepke ala bastadı. Bıltır jeti ayda 71 791, al biıl qañtar-şilde aralığında 255 386 adam pnevmoniyağa şaldığıp, 3,5  esege artqanın köre twrıp ministrliktiñ jalpı statistikağa engizbegeni qoğam arasında qarsılıq pikirdi küşeytti.

   "The Qazaq Times"