قازاقستانداعى پنەۆمونيا اۋرۋىنىڭ كەيىنگى بەس جىلداعى رەسمي ەسەبى مەن بيىلعى ستاتيستيكانىڭ ايىرماشىلىعى قانداي؟ دەنساۋلىق ساقتاۋ مينيسترلىگى ۇسىنعان تىڭ دەرەكتەر. 

دەنمين ۆەدومستۆوسىنىڭ رەسمي وكىلى باعدات قوجاحمەتوۆتىڭ رەداكتسياعا بەرگەن رەسمي مالىمەتىنە قاراعاندا، 2015 جىلدان بەرگى پنەۆمونيا جاعدايى جىل سايىن 18-35 مىڭنىڭ اراسىندا ءوسىپ وتىرعان. ۆيتسە-مينيستر ليۋدميلا بيۋرابەكوۆانىڭ بەرگەن جاۋابىندا «ومىرىندە العاش پنەۆمونيا دەرتىنە شالدىققانداردىڭ سانى» ايتىلعان:

  • 2015 جىلى – 78 755 پنەۆمونيا جاعدايى;
  • 2016 جىلى – 95 631 پنەۆمونيا جاعدايى;
  • 2017 جىلى – 129 179 پنەۆمونيا جاعدايى;
  • 2018 جىلى – 129 443 پنەۆمونيا جاعدايى;
  • 2019 جىلى – 133 482 پنەۆمونيا جاعدايى.

بىراق حالىققا قىزمەت ەتۋشى ۇكىمەت قىزمەتكەرى سوڭعى  جىلدارى اۋرۋ جاعدايى نەلىكتەن ورشىگەنىن تۇسىندىرمەگەن.

ەكى اپتا دايىندالىپ، بەس شەنەۋنىكتىڭ قولىنان وتكەن رەسمي جاۋاپ حاتتا رەداكتسيا سۇراتقانداي 2010 جىلدان بەرگى ەمەس، «اقپاراتتىق جۇيەنىڭ 2015 جىلدان باستاپ جۇمىس ىستەۋىنە» بايلانىستى تەك وتكەن بەس جىلعى دەرەك كورسەتىلگەن.

2015 جىلدان بەرگى قازاقستان رەسپۋبليكاسىندا پنەۆمونيا دەرتىمەن اۋىرعان ناۋقاستاردىڭ سانى تۋرالى دەنمين دەرەگى. كەستە: QT

ۆەدومستۆو مالىمەتىنشە، 2015-2019 ج.ج. ەسەپ «رەسپۋبليكالىق ەلەكتروندىق دەنساۋلىق ساقتاۋ ورتالىعى» شجق رمك «ەمحانا» اۆتوماتتاندىرىلعان اقپاراتتىق جۇيەسىنىڭ، ال بيىلعى (2020 ج.) دەرەك «رەسپۋبليكالىق ەلەكتروندىق دەنساۋلىق ساقتاۋ ورتالىعى» شجق رمك «تولەم جۇيەسىنىڭ امبۋلاتوريالىق-ەمحانالىق كومەگى» اقپاراتتىق جۇيەسىنەن ۇسىنىلعان.

قازاقستان ۇكىمەتى سOVID-19 كوروناۆيرۋسى جانە وسىعان ۇقساس پنەۆمونياعا شالدىققان ناۋقاستار تۋرالى ستاتيستيكانى 17 شىلدەدەن باستاپ جاڭا فورماتتا بىرىگىپ جاريالاۋعا شەشىم قابىلداعان. الايدا «ماۋسىم-شىلدە قىرعىنى» باسىلىپ، ىندەتتىڭ قارقىنى باسەڭدەگەن سوڭ عانا 1 تامىزدان جاڭا ەسەپكە كوشتى. الدە دە ددسۇ-نىڭ دەرەكقورىندا بىرىگىپ جاريالانعانىمەن، قازاقستان ەكى اۋرۋدى ەكى بولەك ۇسىنىپ كەلەدى. نەگە دەنساۋلىق ساقتاۋ ءمينيسترى الەكسەي تسوي العاشىندا ۋادە ەتكەندەي بىرىكتىرىپ جاريالاماسقا دەگەن ساۋالعا مينيسترلىكتىڭ رەسمي ۋاكىلى  باعدات قوجاحمەتوۆ كالكۋلياتوردىڭ كومەگىنە جۇگىنۋگە كەڭەس بەرەدى.

ددسۇ اۋرۋلاردىڭ حالىقارالىق جىكتەمەسىنىڭ 10-نۇسقاسىنا قاڭتار ايىندا ەنگىزگەن كودىن  قازاقستان تامىزدا ءبىر-اق قولدانا باستادى. زەرتحانادا پتر تەستى ارقىلى راستالعان سOVID-19 جاعدايى «U07.1», ال تەست ۆيرۋستى كورسەتە الماعان كوروناۆيرۋسقا ۇقساس پنەۆمونيا «U07.2» كودىمەن بەلگىلەنەدى.

ددسۇ تامىز ايىنىڭ 8-ىنەن بەرى قازاقستانداعى كوروناۆيرۋس پەن ونىڭ پنەۆمونيالىق ءتۇرىن بىرگە جاريالاي باستاعان. ەلدە كلينيكا-ەپيدەميا بەلگىلەرى بار پنەۆمونيا اۋرۋى كوروناۆيرۋسپەن قوسا ەسەپكە الىنادى دەگەنىمەن ءالى كۇنگە دەيىن بىرىكتىرىلگەن جوق.  رەسمي ستاتيستيكا بويىنشا، بۇگىنگى تاڭدا U07.1 جانە U07.2 اۋرۋلارىنا شالدىققان قازاقستاندىقتاردىڭ سانى 126 243-كە جەتسە، قايتىس بولعاندارى 1745 بولدى.

تامىز ايى باستالعالى بەرى ەلدە 35 876 ادام (كۆي+ 13 946, كۆي- 21 930) اۋرىپ، 750-گە جۋىق (كۆي+ 500-دەي، كۆي- 249) كىسى قايتىس بولعان. 1745 ءولىمنىڭ 750-دەيى تامىز ايىندا تىركەلگەنىنە قاراماستان ۇكىمەت جاعدايدىڭ تۇراقتانعانىنا سەندىرىپ باعۋدا.

1 تامىزدان باستاپ قولعا الىنعان ستاتيستيكانىڭ جاڭا فورماتى. فوتو-كەستە: QT

بيىل ماۋسىم-شىلدە ايىندا پنەۆمونيا بىلتىرعى وسى ۋاقىتقا قاراعاندا 12 ەسە كوپ تىركەلدى. 2019 جىلعى ماۋسىم مەن شىلدەدە – 16 309, ال 2020 جىلى اتالعان مەرزىمدە – 189 564 ناۋقاس انىقتالدى. بۇل اۋرۋحاناعا جۇگىنىپ، رەسمي ەسەپكە كىرگەنى عانا. مينيسترلىك بۇعان ۆيرۋستىڭ اسەرى بولعانىن مويىنداعانىمەن، ايىرماشىلىقتى زەردەلەپ-ءسۇزۋدىڭ تەحنيكالىق قيىندىق تۋعىزاتىنىن العا تارتىپ، باس تارتتى.

17 شىلدە كۇنى مينيسترلىك پنەۆمونيا مەن كوروناۆيرۋستى بىرىكتىرۋگە ۋادە بەرىپ ەدى، بىراق تەك 1 تامىزدان باستاپ قانا ەسەپكە الا باستادى. بىلتىر جەتى ايدا 71 791, ال بيىل قاڭتار-شىلدە ارالىعىندا 255 386 ادام پنەۆمونياعا شالدىعىپ، 3,5  ەسەگە ارتقانىن كورە تۇرىپ مينيسترلىكتىڭ جالپى ستاتيستيكاعا ەنگىزبەگەنى قوعام اراسىندا قارسىلىق پىكىردى كۇشەيتتى.

   "The Qazaq Times"