AQŞ pen Qıtaydıñ qorğanıs ministrleri arasındağı kezdesu. 18,11,2019.

Särsenbide Pentagon AQŞ qorğanıs ministri Mark Esperdiñ Ündi-Tınıq mwhit aymağına qızmettik saparmen baratının mälimdedi. Pentagon basşısı kezekti saparında Gavayi, Palau jäne Guam araldarındağı äskeri küşterdi aralaydı. Sonday-aq, jergilikti äskeri jetekşiler jäne şeteldik seriktesterimen kezdesuler ötkizbek.

Esper kezekti saparında qazirgi kezde Qwrama Ştattıñ aymaqta wstanıp otırğan sayasatın, yağni «erkin jäne aşıq Ündi-Tınıq aymağı» wstanımın jüzege asıru, halıqaralıq erejelerge say qauipsizdik tärtibin nığaytudı bastı maqsat etken. Sonday-aq, Pentagon basşısı Tınıq mwhitı men Ündi mwhitında jatqan seriktes eldermen Qıtaydan tönetin qauipke qarsı ıntımaqtastıqtı nığaytudı eñ bastı nazarğa almaq.

Qwrama Ştattar Qıtaydı Ündi-Tınıq mwhitı aymağına qauip töndiruşi retinde qarastıradı. Soñğı birneşe jılda AQŞ aymaqtağı eldermen qorğanıs ıntımaqtastığın barınşa damıtıp jatır. Bwğan deyin äskeri almasular bolmağan köptegen elderdi öz qatarına tartuda. Bwl Beyjiñniñ aymaqtağı ösip kele jatqan qaterine qarsı şaralardıñ eñ negizgisi sanaladı.

Qazir, AQŞ pen Qıtaydıñ diplomatiya jäne sauda qatınasına qosa qorğanıs salasındağı qarım-qatınası da qauipti deñgeyde twr. Tamızdıñ bas şeninde Esper men Qıtay qorğanıs ministri jäne memlekettik keñesşi Vey Fıñhımen telefon arqılı söylesken bolatın. Söylesu kezinde olar AQŞ-Qıtay jäne eki el äskeri küşteriniñ qarım-qatınası turalı talqılağan edi. Esper Qıtaydı halıqaralıq tärtipti saqtauğa köbirek şaqırğan. Eki el arasındağı qauipti qaqtığıstıñ aldın alu üşin twraqtı jäne nätijege bağıttalğan qorğanıs qarım-qatınasın saqtaudıñ mañızdılığı turalı eskertken.

“The Qazaq Times”