Qazaqstan koronavirusqa wqsas pnevmoniya deregin 1 tamızdan beri jaña kodpen  eseptey bastağanı belgili. Degenmen bwğan deyingi 256 mıñ pnevmoniya jağdayı eskerusiz qaldı. Resmi statistika boyınşa, kovid pen koronavirustıq pnevmoniyağa şaldıqqan 113 mıñday adamnıñ 1,4 mıñğa juığı qaytıs bolğan. Şınayı körsetkiş bwdan aytarlıqtay köp boluı mümkin. Nege? 

Tamız ayınıñ 1-9 künderi elde şamamen 9 075 adamnan koronavirus anıqtalıp, 270-tey (3-i küngi derek belgisiz bolğandıqtan, naqtı 247 jağdayğa täuliktik ortaşa körsetkişti qosa esepteuge-topşılauğa boladı – QT)  adam qaytıs bolğan. Däl osı aralıqta 13 280 adamğa koronavirustıq pnevmoniya diagnozı qoyılıp, soğan qosa 164  adam ömirden ötken. Demek tamız bastalğalı 22 mıñnan artıq adam auırıp, 400-den artıq nauqas ayığa almay köz jwmğan.

2 jäne 3 tamız künderi koronavirusqa wqsas pnevmoniyanıñ aldıñğı jäne keyingi künderden eselep az anıqtaluınıñ sebebin DenMin äli künge deyin tüsindirmedi. Sonday-aq, vedomstvo saytında jariyalanğan habarlamada jäne memlekettik ştabtıñ  resursında ötken toñız künde 13 280 nauqas tirkelgeni aytılğan. Al täuliktik eseptiñ qarapayım arifmetikalıq qosındısı 13 271 adam ekenin körsetedi. Sonda ayırmaşılıq tudırğan 9 adam enbey qalğan ba, älde artıq qosılıp ketken be, bwl jağı da bwldır.

Ministrlik saytındağı pandemiya deregi özge resurstarğa qarağanda erterek jañaradı. Biraq mwndağı derekter www.coronavirus2020.kz saytına engizilmegeli apta ötti. Foto: Densaulıq saqtau ministrligi

Ministrliktiñ saytı men telegram paraqşasında kündelikti ölim-jitim esebi berile bastadı. Biraq belgisiz sebepten vedomstvonıñ deregi www.coronavirus2020.kz saytında jariyalanbağan. Jalpı QazAqparat HAA-niñ janınan köktemde qwrılğan bastı platformada tehnikalıq qate jii bolıp jatadı. Qazaqstan Ükimetiniñ aqparattandıru qwraldarı sinhrondı türde birizdi habar taratuda därmensiz. Olay deytinimiz äli künge deyin ministrlik pen memlekettik komissiya saytı men paraqşalarındağı aqparattar bir-birimen qabıspaydı. Negizgi sayttağı derekter öte keş, bayau jañartıladı.

Resmi aqparat boyınşa, qazirgi tañda koronavirus jwqtırğan 25 650 adam emdelip jatır. Olardıñ 4 713-ı stacionarlıq auruhanalarda, al 21 mıñğa juığı ambulatorlıq jağdayda baqılauda eken. Olardıñ arasında 105 jetkinşek bala, jağdayı naşar 246, ahualı asa qattı auır 69 nauqas bar. Sonday-aq 70 nauqas ökpeni jasandı jeldetu apparatında jatır.

Sonımen qatar, ministr Coy 3 şilde küngi brifingte apta işinde koronavirustıq pnevmoniyağa şaldıqqandardıñ aymaqtıq esebin  jariyalauğa söz bergen. Alayda äli künge deyin bwl jöninde tolıqqandı aqparat berilmedi. Bwdan özge DDSW keşeden beri (8 şilde) Qazaqstandağı koronavirus pen onıñ pnevmoniyalıq türin birge jariyalay bastadı. Qazirgi tañda halıqaralıq wyımnıñ saytında 110 mıñğa juıq jağday, 1 109 ölim deregi körsetilgen. Bwl memlekettik statistikağa säykespeydi.

Densaulıq saqtau ministrligi virus jwğıp, «biraq basqa aurudan qayttı» degen sebepten qaytıs bolğandar sanatı osıdan 2,5 apta bwrın 319-ğa jetkenin habarlağan. Odan beri äli tolıqtırılğan joq. Koronavirustıñ kesirinen emes, koronaviruspen qaytqandar dep aydarlanğan qwrbandardıñ qanşası kütpegen baqıtsız jağdayattan (jol apatı, qastandıq, soqqı, jaraqat t.b.) qaytqanı da jwmbaq.

Joğarıda körsetilgen sandar tek resmi statistika. Alayda bwğan küdikpen qaraytın halıq ta, maman da köp. Tipti otandıq jäne şeteldik joğarı sanattı därigerler şildeniñ ortasında-aq Qazaqstandağı 200 mıñnan 2 millionğa deyingi adamnıñ virus jwqtırğanın aytqan.

1 qañtar-2 tamız aralığında elde 256 541 adam pnevmoniyağa şaldıqqan. 35 mıñ keys mausımda, 152 mıñ keys şilde ayında tirkelgen. Bwl körsetkiş bıltırğı däl osı uaqıtpen salıstırğanda 3,3 esege köp. 2019 jıldıñ qañtar-tamız aralığında respublika köleminde 76 986 adam pnevmoniyamen auırğan. Ol kezde 2333 adam, al biıl 4042 adam ömirden ozğan. Osı jılı pnevmoniyanıñ saldarınan ölim jağdayı 1,9 esege artqan. Osı aptada Densaulıq saqtau ministrliginiñ basşısı men orınbasarı pandemiya kezinde kürt örşigen pnevmoniyadan koronavirustıq türin ajıratudı artıq is sanap, 256 mıñ keysti qayta qarauğa qwlıqsız ekenin tanıtqan.

 "The Qazaq Times"