قازاقستان كوروناۆيرۋسقا ۇقساس پنەۆمونيا دەرەگىن 1 تامىزدان بەرى جاڭا كودپەن  ەسەپتەي باستاعانى بەلگىلى. دەگەنمەن بۇعان دەيىنگى 256 مىڭ پنەۆمونيا جاعدايى ەسكەرۋسىز قالدى. رەسمي ستاتيستيكا بويىنشا، كوۆيد پەن كوروناۆيرۋستىق پنەۆمونياعا شالدىققان 113 مىڭداي ادامنىڭ 1,4 مىڭعا جۋىعى قايتىس بولعان. شىنايى كورسەتكىش بۇدان ايتارلىقتاي كوپ بولۋى مۇمكىن. نەگە؟ 

تامىز ايىنىڭ 1-9 كۇندەرى ەلدە شامامەن 9 075 ادامنان كوروناۆيرۋس انىقتالىپ، 270-تەي (3-ءى كۇنگى دەرەك بەلگىسىز بولعاندىقتان، ناقتى 247 جاعدايعا تاۋلىكتىك ورتاشا كورسەتكىشتى قوسا ەسەپتەۋگە-توپشىلاۋعا بولادى – QT)  ادام قايتىس بولعان. ءدال وسى ارالىقتا 13 280 ادامعا كوروناۆيرۋستىق پنەۆمونيا دياگنوزى قويىلىپ، سوعان قوسا 164  ادام ومىردەن وتكەن. دەمەك تامىز باستالعالى 22 مىڭنان ارتىق ادام اۋىرىپ، 400-دەن ارتىق ناۋقاس ايىعا الماي كوز جۇمعان.

2 جانە 3 تامىز كۇندەرى كوروناۆيرۋسقا ۇقساس پنەۆمونيانىڭ الدىڭعى جانە كەيىنگى كۇندەردەن ەسەلەپ از انىقتالۋىنىڭ سەبەبىن دەنمين ءالى كۇنگە دەيىن تۇسىندىرمەدى. سونداي-اق، ۆەدومستۆو سايتىندا جاريالانعان حابارلامادا جانە مەملەكەتتىك شتابتىڭ  رەسۋرسىندا وتكەن توڭىز كۇندە 13 280 ناۋقاس تىركەلگەنى ايتىلعان. ال تاۋلىكتىك ەسەپتىڭ قاراپايىم اريفمەتيكالىق قوسىندىسى 13 271 ادام ەكەنىن كورسەتەدى. سوندا ايىرماشىلىق تۋدىرعان 9 ادام ەنبەي قالعان با، الدە ارتىق قوسىلىپ كەتكەن بە، بۇل جاعى دا بۇلدىر.

مينيسترلىك سايتىنداعى پاندەميا دەرەگى وزگە رەسۋرستارعا قاراعاندا ەرتەرەك جاڭارادى. بىراق مۇنداعى دەرەكتەر www.coronavirus2020.kz سايتىنا ەنگىزىلمەگەلى اپتا ءوتتى. فوتو: دەنساۋلىق ساقتاۋ مينيسترلىگى

مينيسترلىكتىڭ سايتى مەن تەلەگرام پاراقشاسىندا كۇندەلىكتى ءولىم-ءجىتىم ەسەبى بەرىلە باستادى. بىراق بەلگىسىز سەبەپتەن ۆەدومستۆونىڭ دەرەگى www.coronavirus2020.kz سايتىندا جاريالانباعان. جالپى قازاقپارات حاا-ءنىڭ جانىنان كوكتەمدە قۇرىلعان باستى پلاتفورمادا تەحنيكالىق قاتە ءجيى بولىپ جاتادى. قازاقستان ۇكىمەتىنىڭ اقپاراتتاندىرۋ قۇرالدارى سينحروندى تۇردە ءبىرىزدى حابار تاراتۋدا دارمەنسىز. ولاي دەيتىنىمىز ءالى كۇنگە دەيىن مينيسترلىك پەن مەملەكەتتىك كوميسسيا سايتى مەن پاراقشالارىنداعى اقپاراتتار ءبىر-بىرىمەن قابىسپايدى. نەگىزگى سايتتاعى دەرەكتەر وتە كەش، باياۋ جاڭارتىلادى.

رەسمي اقپارات بويىنشا، قازىرگى تاڭدا كوروناۆيرۋس جۇقتىرعان 25 650 ادام ەمدەلىپ جاتىر. ولاردىڭ 4 713-ى ستاتسيونارلىق اۋرۋحانالاردا، ال 21 مىڭعا جۋىعى امبۋلاتورلىق جاعدايدا باقىلاۋدا ەكەن. ولاردىڭ اراسىندا 105 جەتكىنشەك بالا، جاعدايى ناشار 246, احۋالى اسا قاتتى اۋىر 69 ناۋقاس بار. سونداي-اق 70 ناۋقاس وكپەنى جاساندى جەلدەتۋ اپپاراتىندا جاتىر.

سونىمەن قاتار، مينيستر تسوي 3 شىلدە كۇنگى بريفينگتە اپتا ىشىندە كوروناۆيرۋستىق پنەۆمونياعا شالدىققانداردىڭ ايماقتىق ەسەبىن  جاريالاۋعا ءسوز بەرگەن. الايدا ءالى كۇنگە دەيىن بۇل جونىندە تولىققاندى اقپارات بەرىلمەدى. بۇدان وزگە ددسۇ كەشەدەن بەرى (8 شىلدە) قازاقستانداعى كوروناۆيرۋس پەن ونىڭ پنەۆمونيالىق ءتۇرىن بىرگە جاريالاي باستادى. قازىرگى تاڭدا حالىقارالىق ۇيىمنىڭ سايتىندا 110 مىڭعا جۋىق جاعداي، 1 109 ءولىم دەرەگى كورسەتىلگەن. بۇل مەملەكەتتىك ستاتيستيكاعا سايكەسپەيدى.

دەنساۋلىق ساقتاۋ مينيسترلىگى ۆيرۋس جۇعىپ، «بىراق باسقا اۋرۋدان قايتتى» دەگەن سەبەپتەن قايتىس بولعاندار ساناتى وسىدان 2,5 اپتا بۇرىن 319-عا جەتكەنىن حابارلاعان. ودان بەرى ءالى تولىقتىرىلعان جوق. كوروناۆيرۋستىڭ كەسىرىنەن ەمەس، كوروناۆيرۋسپەن قايتقاندار دەپ ايدارلانعان قۇربانداردىڭ قانشاسى كۇتپەگەن باقىتسىز جاعداياتتان (جول اپاتى، قاستاندىق، سوققى، جاراقات ت.ب.) قايتقانى دا جۇمباق.

جوعارىدا كورسەتىلگەن ساندار تەك رەسمي ستاتيستيكا. الايدا بۇعان كۇدىكپەن قارايتىن حالىق تا، مامان دا كوپ. ءتىپتى وتاندىق جانە شەتەلدىك جوعارى ساناتتى دارىگەرلەر شىلدەنىڭ ورتاسىندا-اق قازاقستانداعى 200 مىڭنان 2 ميلليونعا دەيىنگى ادامنىڭ ۆيرۋس جۇقتىرعانىن ايتقان.

1 قاڭتار-2 تامىز ارالىعىندا ەلدە 256 541 ادام پنەۆمونياعا شالدىققان. 35 مىڭ كەيس ماۋسىمدا، 152 مىڭ كەيس شىلدە ايىندا تىركەلگەن. بۇل كورسەتكىش بىلتىرعى ءدال وسى ۋاقىتپەن سالىستىرعاندا 3,3 ەسەگە كوپ. 2019 جىلدىڭ قاڭتار-تامىز ارالىعىندا رەسپۋبليكا كولەمىندە 76 986 ادام پنەۆمونيامەن اۋىرعان. ول كەزدە 2333 ادام، ال بيىل 4042 ادام ومىردەن وزعان. وسى جىلى پنەۆمونيانىڭ سالدارىنان ءولىم جاعدايى 1,9 ەسەگە ارتقان. وسى اپتادا دەنساۋلىق ساقتاۋ مينيسترلىگىنىڭ باسشىسى مەن ورىنباسارى پاندەميا كەزىندە كۇرت ورشىگەن پنەۆمونيادان كوروناۆيرۋستىق ءتۇرىن اجىراتۋدى ارتىق ءىس ساناپ، 256 مىڭ كەيستى قايتا قاراۋعا قۇلىقسىز ەكەنىن تانىتقان.

 "The Qazaq Times"