Kovid jäne koronavirustıq pnevmoniya auruları turalı statistika kem degende 2-3 aptadan keyin birktirilmek. Bwğan deyin tağayındalğanına aydan asqan densaulıq saqtau ministri Aleksey Coy halıqaralıq resurstarda eki kod boyınşa jiıntıq esepti jariyalauğa nebäri 1-2 kün qajet degen edi. 

Bwl turalı jwmada Ortalıq kommunikaciyalar qızmeti brifinginde ministrlik ökili Bağdat Qojahmetov mälimdedi.

«Şildeniñ ortasınan bastap derekterdi engizu boyınşa därigerlerdi dayarlau jäne komp'yuterlik jüyeni jañartu bağıtında jwmıs istep kelemiz. Biz 1 tamızdan bastap jañartılğan formatta kündelikti aqparat beru jönindegi sözimizde twrdıq. Ärine, kemşilik joq emes, resmi mälimetti tañerteñgi 9-ğa deyin jariyalauğa uäde etken edik. Birneşe kün boyı adam faktorına baylanıstı tüske qaray berilip keldi. Qazir dayındıq procesi jürip jatır», – dedi Qojahmetov.

Sonımen qosa, ol qazirgi tañda Densaulıq saqtau ministrligi «kündelikti derekti özara, teris jäne oñ analiz qorıtındısın salıstırğannan göri apta sayın jiıntıq esepti salıstırğan jön» degen wstanımda ekenin jetkizdi.

«Mine, osı arqılı biz 17 tamız karantin ayaqtalğannan keyingi bağdaramızdı şeşetin şınayı jağdaydı köre alamız», – dep tolıqtırdı jaña ministrdiñ jaña ökili.

Jartı aydan beri biriktiruge uäde berip kele jatqan Qazaqstan Ükimeti bwl  jolı da «öz dedlaynın özi wzartıp» alğanday. Statistika qaşan birtwtas  küyde jariyalanadı degen saualğa şeneunik «Kem degende eki ne üş aptada, yağni är aptanıñ deregin salıstıru arqılı jalpı jağdaydı köre alatın kezde ğana» dep jauap qattı.

«Auırğandar turalı aqparattı DDSW-ğa ötkizdik. Wyım mwnımen jwmıs istep, öñdep, esepteydi. Sodan soñ Qazaqstandağı jağday halıqaralıq statistikada jariyalanadı.  ...DDSW-ğa berilgen mälimet tehnikalıq öñdeu satısınan ötip jatır. Eki künde köresizder. Mwnda qandayda bir mäsele bar dep oylamaymın. Bazağa engizilgen derek halıqaralıq aqparattıq resurstarda jariyalanatın boladı. Eşkim eşteñeni jasırıp ne qaşqaqtap otırğan joq», – dedi ministr 3 tamız küngi baspasöz jiınında.

Bwğan deyin apta basında, 3 tamız küni densaulıq saqtau ministri Aleksey Coy jiıntıq statistika wzağanda eki künde jariyalanatına sendirip, uäde bergen edi. Ministrdiñ aytqan uaqıtınan keşigip, üşinşi küni ötken jiında eki künde halıqaralıq derekqor resurstarında jariyalanatını aytılğan. Biraq DDSW-nıñ wsınısı äri zayırlı elderdiñ erte bastağan amalı bizde ädettegidey tağı 14-20 künge sozılmaq.

Sonımen qatar, ministr Coy osı jiında apta işinde koronavirustıq pnevmoniyağa şaldıqqandardıñ aymaqtıq esebin  jariyalauğa söz bergen. Alayda äli künge deyin bwl jöninde tolıqqandı aqparat berilmedi.

"The Qazaq Times"