Körneki suret. Fotokollaj: QT

Josparlanğan uaqıtınan üş künge keşigip ötken tamız brifinginde Qazaqstannıñ Densaulıq saqtau ministrligi bası aşıq biraz swraqtarğa memlekettik müddeden göri «özindik twrğıda» köbirek jauap berdi. 

Densaulıq saqtau ministrligi tamız ayı bastalğalı beri PTR sınaması teris, biraq koronavirusqa wqsas pnevmoniyağa şaldıqqandardıñ statistikasın jariyaladı. 1 tamızda 5181 adam, 2 tamızda 789 adam pnevmoniyamen auırğan. Aydıñ alğaşqı jäne keyingi künderindegi derekte 6 esege deyin ayırmaşılıq bar.  Mwnı mamandar mardımdı argumentpen tüsindire almadı. Koronavirustıq pnevmoniyadan osı ayda 51 adam (1 tamız – 30 adam, 2 tamız – 21 adam – QT) qaytqan. 3 tamız küngi pnevmoniya deregi turalı aqparat äli jariyalanğan joq.

1 tamızda 1226 adamnıñ koronavirus jwqtırğanı zerthanada rastalıp, 36 adam qaytıs bolğan. 2 tamızda – 1069 adamnan, 3 tamızda – 1158 adamnan indet ştamı tabıldı. Sonday-aq ötken aptada 265 adam qaytqan. Düysenbi küngi baspasöz jiınında ministr 1058 qazaqstandıqtıñ koronavirustan qaytıs bolğanın ayttı. Biraq 4 tamız küni tañda ötken ükimet otırısında Aleksey Coy arnayı grafika türinde 1091 adam ekenin körsetti. Äli künge deyin bastı resurs  www.coronavirus2020.kz saytında  eski derek jazılıp twr. Mwnday tehnikalıq ne statistikalıq qatelik jii bolıp jatadı.

Qazaqstanda zerthanada rastalğan 92 mıñ adam (onıñ işinde 8518 medicina qızmetkeri – QT) virus jwqtırğan, onıñ 1091-i infekciyanıñ tikeley sebebinen, al 319-ı janama äserinen qaytıs bolğan. Koronavirustıq pnevmoniya men COVID-19 dertin qosa eseptegende, 100 mıñday adam auırğan, sonımen birge 1461 (1091+319+51 – QT) adam ömirden ötken.

Qañtardan bergi pnevmoniya deregi qarala ma?

Ministrlik basşısı Aleksey Coy men vice-ministr Ajar Ğniyatqızınıñ mälimdeuinşe, 1 qañtar-2 tamız aralığında elde 256 541 adam pnevmoniyağa şaldıqqan. 35 mıñ keys mausımda, 152 mıñ keys şilde ayında tirkelgen. Bwl körsetkiş bıltırğı däl osı uaqıtpen salıstırğanda 3,3 esege köp. 2019 jıldıñ qañtar-tamız aralığında respublika köleminde 76 986 adam pnevmoniyamen auırğan. Ol kezde 2333 adam, al biıl 4042 adam ömirden ozğan. Osı jılı pnevmoniyanıñ saldarınan ölim jağdayı 1,9 esege artqan.

– Osınşama auru tarihın aqtarıp, pnevmoniyadan virustı ajıratu tehnikalıq-ädisteme jağınan qiın. Bwl jwmıstı jüktemesi köp, jauapkerşiligi auır maydanda jürgen därigerlerge tapsırar bolsaq, salmaq salğandıq. Äytpese olarğa tañdau jasauğa tura keledi: ne nauqastardı emdeumen, ne derekterdi qayta süzumen aynalısuı kerek. ...Meniñşe, bizge aldağı körsetkişter äldeqayda mañızdıraq. Küzde qayta soğuı ıqtimal tolqınğa, pandemiyanıñ aldağı qarqının boljauğa asa qajetti, – dedi ministr düysenbi küngi brifingte.

Ministr Coy «Alda qajetti şeşimderdi qabıldau üşin bizge bügingi naqtı sandar auaday kerek. Dwrıs, möldir, şınayı jağdaydı körsetu arqılı bolaşaq boljamdarğa qajet boladı. Bwl öte mañızdı mäsele», – dey twrğanımen, qañtardan beri pnevmoniyamen auırğan 256 mıñ qazaqstandıqtıñ qaysı koronavirustıq türde ötkenin anıqtaudı «artıq is» dep sanaydı.

Ortalıq kommunikaciyalar qızmetinde josparlanğan uaqıttan eki künge keşeuildetip ötken jiında BAQ ökilderi jauap ala-almay jürgen saualğa ministr orınbasarı kesimdi pikir bildirdi:

–  256 mıñnan astam pnevmoniya auruın qazir biz qaytadan qaray almaymız. Sebebi barlıq elektrondı jüyege pnevmoniya basqa kodpen engizilgen. Onı engizetin därigerler koronaviruspen küresip jatır. Qazirgi maqsatımız – diagnozdı dwrıs qoyıp, ölim-jitimdi meyilinşi azaytu, – dedi vice-ministr Ajar Ğiniyatqızı bastığınıñ pikirin qoldap.

Bas däriger Aleksey Coy aymaqtar boyınşa pnevmoniyanıñ dayın statistikasın osı apta vedomstvo saytına jariyalauğa kezekti uädesin berdi. Halqı jağınan bizden üş esege az Qırğızstandağı pandemiya qwrbandarınıñ sanı 1,5 mıñğa juıqtadı. Osını alğa tartqan däriger mamandar, sarapşılar, qoğam belsendileri jäne tilşiler vedomstvonıñ statistikanı bwrmalap otırğanın sınap, jağdaydıñ şınayı esebin jariyalaudı talap etip keledi. Degenmen epidemiya kezindegi ekinşi ministr-moderator Aleksey Coydıñ twsında da qwzırlı organdar indettiñ keñinen tarauın halıqtıñ saqtıq şarasın saqtamauımen, betperde taqpay äri äleumettik qaşıqtıqtı saqtamauımen baylanıstı tüsindiredi. Aldağı uaqıttağı jauapkerşilikti de eldiñ moynına artıp otırğan ministrliktiñ äreketin «bas alıp qaşu» dep sanaytın qazaqstandıqtar köp.

   "The Qazaq Times"