Euroodaqtıñ bwrınğı törağası Donal'd Tusk jäne Qazaqstan prezidenti Qasım-Jomart Toqaev. Foto: mirror.akorda.kz

Europalıq Odaq Ortalıq Aziya elderine koronaviruspen küresuge kömektespek. Odaq ökilderiniñ aytuınşa, joba boyınşa bastı kömek Qazaqstanğa bağıttaladı. Osı rette «Ortalıq Aziya elderindegi COVID-19: dağdarısqa qarsı şaralar» attı jaña joba bastaldı.

Eki jıldıq bağdarlama qwnı – 3 million euro. Atalğan şara aymaqtağı indettiñ saldarımen küreske jäne öñir elderiniñ densaulıq saqtau jüyesiniñ twraqtı damuın qamtamasız etu maqsatında qolğa alındı.

Mälimetter boyınşa, bağdarlama üş kezeñnen twradı. Birinşi kezekte qarjı kömekke öte mwqtaj elderge bölinedi. Ekinşi satıda virustıñ taraluı bäseñdegen soñ qalpına keltiru jwmıstarı jürgizilip, indettiñ ekinşi tolqınına dayındıq şaraları jüzege asırılmaq. Al üşinşi kezeñde aymaq elderiniñ densaulıq saqtau jüyeleriniñ öz jwmısın twraqtı äri tiimdi jalğastıruına qoldau körsetu josparlanğan.

Europalıq odaqtıñ Qazaqstandağı elşisi Sven-Olov Karlsson: «Koronavirus pandemiyası är eldiñ wlttıq densaulıq saqtau salası qanşalıqtı älsiz ekenin jäne mwnday tötenşe jağdayğa qarsı şaralardı qayta qarau kerektigin körsetip berdi. Sondıqtan osı bağdarlama ayasında qajetti däri-därmek, qwral-jabdıqtardı berumen birge zerthanalar men auruhanalarğa da türli kömek körsetu josparda bar», – deydi.

Pandemiya bastalğalı, Ortalıq Aziya elderindegi ahual naşarladı. Qazaqstanda epidemiya bastalğalı barlığı 75 153 adamnan koronavirus infekciyası tabılğan. Barlığı 610 adam ajal qwştı. Bwdan bölek, elde ökpe qabınuına şaldıqqandar sanı artqan. Osığan deyin Densaulıq saqtau ministrligi pnevmoniya diagnozı qoyılğan nauqastardıñ birazınan koronavirus deregi anıqtalğan joq dedi. Biraq olardı da COVID-19 hattamasımen emdedi.

Ötken aptada ministr Aleksey Coy şilde bastalğalı 135 mıñ adam pnevmoniyağa şaldığıp, 1555 adam qaytıs bolğanın mälimdedi. El biligi 1 tamızdan bastap qozdıruşısı belgisiz ya zerthanada rastalmağan virustıq pnevmoniyanı koronavirus statistikasına qosu turalı şeşimge keldi. Jıl basınan 15 şildege deyin 234 mıñ adam pnevmoniyağa şaldıqqan, onıñ 3,3 mıñı qaytıs bolğan. Sarapşılar bir aydıñ özinde kürt ösken 135 mıñ jağdaydıñ barlığı derlik koronavirusqa jatadı dep sanaydı. Resmi sanaqtağı 66 895 keyske qosımşa şildedegi 135 641 pnevmoniyanı, mwnıñ tamızğa deyin ösetinin eskersek, virus jwqtırğandar sanı keminde 203 mıñğa şığadı.

21 şildede ministr Aleksey Coy elde koronavirus ahualı twraqtala bastadı, auruhanalardağı orın tapşılığı birtindep azaya bastadı dep mälimdedi. Alayda elde karantin şaraları küşeytilip jatır.

Resmi mälimetter boyınşa, Qırğızstanda dertke şaldıqqandar sanı şildede 4,5 esege artqan. Koronavirus jwqtırğandar sanınıñ kürt ösuine baylanıstı auruhanalarda orın, därihanalarda däri-därmek tapşı. Eldiñ densaulıq saqtau jüyesi özderine jüktelgen mindetti orınday almay jatır, al deputattar demalısqa ketken. Eldiñ eñ iri üş qalasında – Bişkek, Oş, Djalal-Abadta jäne birneşe audanda tötenşe jağday jäne komendanttıq sağat jariyalanğan. Elde jalpı virus jwqtırğandar sanı – 28 980 adam, qaytıs bolğandar sanı – 1 111. Al Özbekstanda dertke 18 171 astam şaldıqqan.

"The Qazaq Times"