داعدارىس كەزەڭىندە: ەۋرووداق قازاقستانعا كوروناۆيرۋسپەن كۇرەسۋگە كومەكتەسپەك

ەۋروپالىق وداق ورتالىق ازيا ەلدەرىنە كوروناۆيرۋسپەن كۇرەسۋگە كومەكتەسپەك. وداق وكىلدەرىنىڭ ايتۋىنشا، جوبا بويىنشا باستى كومەك قازاقستانعا باعىتتالادى. وسى رەتتە «ورتالىق ازيا ەلدەرىندەگى COVID-19: داعدارىسقا قارسى شارالار» اتتى جاڭا جوبا باستالدى.

ەكى جىلدىق باعدارلاما قۇنى – 3 ميلليون ەۋرو. اتالعان شارا ايماقتاعى ىندەتتىڭ سالدارىمەن كۇرەسكە جانە ءوڭىر ەلدەرىنىڭ دەنساۋلىق ساقتاۋ جۇيەسىنىڭ تۇراقتى دامۋىن قامتاماسىز ەتۋ ماقساتىندا قولعا الىندى.

مالىمەتتەر بويىنشا، باعدارلاما ءۇش كەزەڭنەن تۇرادى. ءبىرىنشى كەزەكتە قارجى كومەككە وتە مۇقتاج ەلدەرگە بولىنەدى. ەكىنشى ساتىدا ۆيرۋستىڭ تارالۋى باسەڭدەگەن سوڭ قالپىنا كەلتىرۋ جۇمىستارى جۇرگىزىلىپ، ىندەتتىڭ ەكىنشى تولقىنىنا دايىندىق شارالارى جۇزەگە اسىرىلماق. ال ءۇشىنشى كەزەڭدە ايماق ەلدەرىنىڭ دەنساۋلىق ساقتاۋ جۇيەلەرىنىڭ ءوز جۇمىسىن تۇراقتى ءارى ءتيىمدى جالعاستىرۋىنا قولداۋ كورسەتۋ جوسپارلانعان.

ەۋروپالىق وداقتىڭ قازاقستانداعى ەلشىسى سۆەن-ولوۆ كارلسسون: «كوروناۆيرۋس پاندەمياسى ءار ەلدىڭ ۇلتتىق دەنساۋلىق ساقتاۋ سالاسى قانشالىقتى ءالسىز ەكەنىن جانە مۇنداي توتەنشە جاعدايعا قارسى شارالاردى قايتا قاراۋ كەرەكتىگىن كورسەتىپ بەردى. سوندىقتان وسى باعدارلاما اياسىندا قاجەتتى ءدارى-دارمەك، قۇرال-جابدىقتاردى بەرۋمەن بىرگە زەرتحانالار مەن اۋرۋحانالارعا دا ءتۇرلى كومەك كورسەتۋ جوسپاردا بار»، – دەيدى.

پاندەميا باستالعالى، ورتالىق ازيا ەلدەرىندەگى احۋال ناشارلادى. قازاقستاندا ەپيدەميا باستالعالى بارلىعى 75 153 ادامنان كوروناۆيرۋس ينفەكتسياسى تابىلعان. بارلىعى 610 ادام اجال قۇشتى. بۇدان بولەك، ەلدە وكپە قابىنۋىنا شالدىققاندار سانى ارتقان. وسىعان دەيىن دەنساۋلىق ساقتاۋ مينيسترلىگى پنەۆمونيا دياگنوزى قويىلعان ناۋقاستاردىڭ ءبىرازىنان كوروناۆيرۋس دەرەگى انىقتالعان جوق دەدى. بىراق ولاردى دا COVID-19 حاتتاماسىمەن ەمدەدى.

وتكەن اپتادا مينيستر الەكسەي تسوي شىلدە باستالعالى 135 مىڭ ادام پنەۆمونياعا شالدىعىپ، 1555 ادام قايتىس بولعانىن مالىمدەدى. ەل بيلىگى 1 تامىزدان باستاپ قوزدىرۋشىسى بەلگىسىز يا زەرتحانادا راستالماعان ۆيرۋستىق پنەۆمونيانى كوروناۆيرۋس ستاتيستيكاسىنا قوسۋ تۋرالى شەشىمگە كەلدى. جىل باسىنان 15 شىلدەگە دەيىن 234 مىڭ ادام پنەۆمونياعا شالدىققان، ونىڭ 3,3 مىڭى قايتىس بولعان. ساراپشىلار ءبىر ايدىڭ وزىندە كۇرت وسكەن 135 مىڭ جاعدايدىڭ بارلىعى دەرلىك كوروناۆيرۋسقا جاتادى دەپ سانايدى. رەسمي ساناقتاعى 66 895 كەيسكە قوسىمشا شىلدەدەگى 135 641 پنەۆمونيانى، مۇنىڭ تامىزعا دەيىن وسەتىنىن ەسكەرسەك، ۆيرۋس جۇقتىرعاندار سانى كەمىندە 203 مىڭعا شىعادى.

21 شىلدەدە مينيستر الەكسەي تسوي ەلدە كوروناۆيرۋس احۋالى تۇراقتالا باستادى، اۋرۋحانالارداعى ورىن تاپشىلىعى بىرتىندەپ ازايا باستادى دەپ مالىمدەدى. الايدا ەلدە كارانتين شارالارى كۇشەيتىلىپ جاتىر.

رەسمي مالىمەتتەر بويىنشا، قىرعىزستاندا دەرتكە شالدىققاندار سانى شىلدەدە 4,5 ەسەگە ارتقان. كوروناۆيرۋس جۇقتىرعاندار سانىنىڭ كۇرت وسۋىنە بايلانىستى اۋرۋحانالاردا ورىن، ءدارىحانالاردا ءدارى-دارمەك تاپشى. ەلدىڭ دەنساۋلىق ساقتاۋ جۇيەسى وزدەرىنە جۇكتەلگەن مىندەتتى ورىنداي الماي جاتىر، ال دەپۋتاتتار دەمالىسقا كەتكەن. ەلدىڭ ەڭ ءىرى ءۇش قالاسىندا – بىشكەك، وش، دجالال-ابادتا جانە بىرنەشە اۋداندا توتەنشە جاعداي جانە كومەندانتتىق ساعات جاريالانعان. ەلدە جالپى ۆيرۋس جۇقتىرعاندار سانى – 28 980 ادام، قايتىس بولعاندار سانى – 1 111. ال وزبەكستاندا دەرتكە 18 171 استام شالدىققان.

"The Qazaq Times"