Almatığa kireberistegi blok-beketterdiñ biri. Foto: Reuters

Densaulıq saqtau ministrliginiñ birneşe ret özgergen boljamın memlekettik bas sanitar däriger bügin tağı tolıqtırdı.

Särsenbi küni ötken onlayn-brifiñte Qazaqstannıñ bas sanitar därigeri Ayjan Esmağambetova köktemniñ soñına deyin elde tirkelgen nauqastar sanı 5 mıñnan asatının mälimdedi.

«Qazaqstan boyınşa säuir ayınıñ aqırına deyin 3400 jağday, al mamır ayınıñ soñına deyin 5300 nauqas tirkelui mümkin dep boljap otırmız», – dedi Esmağambetova.

Onıñ sözinşe, keyingi kezde tirkelip jatqan keysterdiñ köbi şetelden kelgen azamattardıñ esebinen ösipti. Soñğı eki aptadağı 200 jağday osı sipatta anıqtalğan körinedi. Bwl jöninde memlekettik bas sanitar «Bwl elde işki ğana emes, sonımen birge sırtqı qauiptiñ bar ekenin körsetedi, säykesinşe boljamdı birşama tüzetuge tura keldi», – dedi.

Bwğan deyin Ayjan Esmağambetova elimizde koronavirus infekciyası «şarıqtau şegine jetti» dep mälimdegen. Ol tirkelgen nauqastar sanı «säuirdiñ soñına qaray 2700, al mamır ayınıñ ayağında 4000-ğa jetetinin» habarlap edi.

Ötken täulikte ministrlik 167 adamnıñ auru jwqtırğanın rastadı. Qazaqstan keyster sanı boyınşa 47 künde 58-orınğa twraqtadı.  Sonıday-aq eldegi 17 öñirdiñ 11-inde dertke şaldıqqandar sanı jüzden asqan. Qazirgi uaqıtta 3 078 adamnıñ koronavirus infekciyasın jwqtırğanı belgili. Ökinişke qaray, onıñ 25-i qaytıs boldı. Äzirge 774 adam dertinen ayığıp şıqqan.

"The Qazaq Times"