الماتىعا كىرەبەرىستەگى بلوك-بەكەتتەردىڭ ءبىرى. فوتو: Reuters

دەنساۋلىق ساقتاۋ مينيسترلىگىنىڭ بىرنەشە رەت وزگەرگەن بولجامىن مەملەكەتتىك باس سانيتار دارىگەر بۇگىن تاعى تولىقتىردى.

سارسەنبى كۇنى وتكەن ونلاين-بريفيڭتە قازاقستاننىڭ باس سانيتار دارىگەرى ايجان ەسماعامبەتوۆا كوكتەمنىڭ سوڭىنا دەيىن ەلدە تىركەلگەن ناۋقاستار سانى 5 مىڭنان اساتىنىن مالىمدەدى.

«قازاقستان بويىنشا ءساۋىر ايىنىڭ اقىرىنا دەيىن 3400 جاعداي، ال مامىر ايىنىڭ سوڭىنا دەيىن 5300 ناۋقاس تىركەلۋى مۇمكىن دەپ بولجاپ وتىرمىز»، – دەدى ەسماعامبەتوۆا.

ونىڭ سوزىنشە، كەيىنگى كەزدە تىركەلىپ جاتقان كەيستەردىڭ كوبى شەتەلدەن كەلگەن ازاماتتاردىڭ ەسەبىنەن ءوسىپتى. سوڭعى ەكى اپتاداعى 200 جاعداي وسى سيپاتتا انىقتالعان كورىنەدى. بۇل جونىندە مەملەكەتتىك باس سانيتار «بۇل ەلدە ىشكى عانا ەمەس، سونىمەن بىرگە سىرتقى قاۋىپتىڭ بار ەكەنىن كورسەتەدى، سايكەسىنشە بولجامدى ءبىرشاما تۇزەتۋگە تۋرا كەلدى»، – دەدى.

بۇعان دەيىن ايجان ەسماعامبەتوۆا ەلىمىزدە كوروناۆيرۋس ينفەكتسياسى «شارىقتاۋ شەگىنە جەتتى» دەپ مالىمدەگەن. ول تىركەلگەن ناۋقاستار سانى «ءساۋىردىڭ سوڭىنا قاراي 2700, ال مامىر ايىنىڭ اياعىندا 4000-عا جەتەتىنىن» حابارلاپ ەدى.

وتكەن تاۋلىكتە مينيسترلىك 167 ادامنىڭ اۋرۋ جۇقتىرعانىن راستادى. قازاقستان كەيستەر سانى بويىنشا 47 كۇندە 58-ورىنعا تۇراقتادى.  سونىداي-اق ەلدەگى 17 ءوڭىردىڭ 11-ىندە دەرتكە شالدىققاندار سانى جۇزدەن اسقان. قازىرگى ۋاقىتتا 3 078 ادامنىڭ كوروناۆيرۋس ينفەكتسياسىن جۇقتىرعانى بەلگىلى. وكىنىشكە قاراي، ونىڭ 25-ءى قايتىس بولدى. ازىرگە 774 ادام دەرتىنەن ايىعىپ شىققان.

"The Qazaq Times"