Älemdi üyde otırıp qwtqaratın sät. #Üyde_otır akciyası. Foto: Shutterstock

Särsenbiniñ tañında Almatı qalasında 2, astanada 5 adamnan infekciya tabılğanı habarlandı.

Soñğı derekti qosa eseptegende, elde barlığı 79 nauqas qaterli infekciya jwqtırğan.  Olar, astanada – 41, Almatı qalasında – 31, Qarağandı qalasında – eki, Almatı oblısında – bir, SQO men Aqtöbe oblısında – bir-birden, Şımkent qalasında bir adam auruhanağa jatqızılğan. Sonday-aq pacienttermen baylanısta bolğan nemese boluı mümkin mıñdağan adam  üyde nemese stacionarlıq karantinde jatır.

Jauaptı vedomstvonıñ habarlauınşa, 24 naurız keşke tirkelgen nauqas 1996 jılğı Şımkent twrğını astanadan avtobuspen kelgen. Beyresmi aqparatqa qarağanda, ol astanada karantin jabılar kezde Şımkentke qaray jolğa şıqqan, al üşinşi megapoliske avtobuspen jetuge kem degende bir täulik ketedi. Al Jambıl oblısında tirkelgen azamat Qırğızstanğa qatınaytın jürgizuşi ekeni aytıldı.

 

Sarapşılar men ministrler boljamı

Wlıstıñ wlı küni Kiber şabuıldardı taldau jäne tergeu ortalığı COVID-19 infekciyasınıñ modeli boyınşa 10 säuirge qaray Qazaqstanda tirkelgen nauqastar sanı 17 mıñğa jetetini jönindegi pessimistik boljamın bölisken edi.

Densaulıq saqtau ministri Eljan Birtanov Facebook jelisindegi resmi parağında indettiñ şarıqtau şegi, pik kezeñi säuir ayınıñ alğaşqı onkündiginde ötip, keyin bäseñdeytinin mälimdedi. Bas därigerdiñ sözinşe, «qabaldanğan şeşimderdiñ arqasında aurudıñ tarauı şamamen 50%-ğa azayğan» körinedi.

«Aldağı uaqıtta da karantin tıyımın qatañ saqtau öte mañızdı. Şara küşeytilip, jalğasuı mümkin. Bwl derttiñ tarauın aldın alatın eñ töte jol», – dedi Birtanov.

Toqaevtıñ resmi pärmenimen indet jönindegi aqparattı jariyalau «qwqığın iemdengen» aqparat ministri Däuren Abaev düysenbi küngi mälimdemesinde TJ merzimi naqtı emestigin aytqan. Älemniñ örkenietti ozıq elderi keñinen qoldanıp jatqan memleket tarapınan azamattarğa järdemaqı berudi «jüyesiz populistik ädis» dep sanaytın ministr brifingte:

«Qazaqstanda virus jwqtırğandar äli ösip, şegine jetedi. Odan keyin virus jwqtırğandar sanı azayadı. Mwnıñ bäri bir aydıñ işinde ayaqtaladı dep ümittenemiz», – dep boljağan.

 

Qayta oylanuğa mäjbür älemniñ ahualı

Dadax komerciyalıq emes kompaniyasına qarastı Worldometer statistikalıq aqparattar bazasınıñ soñğı deregi boyınşa, älem jwrtşılığın eleñdetip, ekonomikasın twralatqan COVID-19 indetine şaldıqqandar sanı – 420 mıñnan asıp, qaza bolğandar 19 mıñğa juıqtağan. Seysenbi küni, 24 naurızda AQŞ-ta birden 11 mıñ, Ispaniyada 7 mıñğa juıq, eñ köp zardap şekken Italiyada 5 mıñ, sonday-aq Germaniyada 4 mıñday nauqas anıqtalğan.

Boljamın jetkizerde sözden jañılğan bwrınğı atışulı bas sanitar Bekşinniñ ornına kelgen jaña basşınıñ 24 naurız keşkilik «auru atlasına» baylanıstı jaña qaulı şığardı. Dert dendegen 1A sanatındağı elderge Franciya, Iran, Italiya, Ispaniya, Germaniya, Ündistan, Tayland, Malayziya, BAÄ, Şri-Lanka, Egipet endi. Endi atalğan elderden kelgen azamattar arnayı orındarda 14 täulik karantinde jatadı. Al 1B sanatına koronavirus jwqtıru deregi tirkelgen özge barlıq elder jatadı.

Älemniñ birqatar elinde jağday qiındap, apta basınan beri Britaniya, Ispaniya, Franciya, Özbekstan, AQŞ-tıñ birneşe ştattarı qatañ rejimdegi karantin jariyalap ülgerdi.

Jwqtıruşılardı tirkeu dinamikasına qarağanda, birinşi 100 mıñ nauqas alğaşqı 67 künde, ekinşi jüzmıñdıq 11 künde, keyingi 100 mıñ pacient 4 künde, al soñğı jüzdik bir-aq künde tirkelgenin bayqauğa boladı. Halıqaralıq VVS mediakorporaciyası sarapşılarınıñ boljauınşa, infekciyanıñ jwğuı osı qarqında jalğasa berse, onda 27 naurız COVID-19 jwqtıruşılar qatarı 1 millionğa deyin ösui ıqtimal.

"The Qazaq Times"