ىندەت قۇشاعىنداعى جۇمىر جەر: الەم جانە قازاقستانداعى جاعداي ءھام بولجام

سارسەنبىنىڭ تاڭىندا الماتى قالاسىندا 2, استانادا 5 ادامنان ينفەكتسيا تابىلعانى حابارلاندى.

سوڭعى دەرەكتى قوسا ەسەپتەگەندە، ەلدە بارلىعى 79 ناۋقاس قاتەرلى ينفەكتسيا جۇقتىرعان.  ولار، استانادا – 41, الماتى قالاسىندا – 31, قاراعاندى قالاسىندا – ەكى، الماتى وبلىسىندا – ءبىر، سقو مەن اقتوبە وبلىسىندا – ءبىر-بىردەن، شىمكەنت قالاسىندا ءبىر ادام اۋرۋحاناعا جاتقىزىلعان. سونداي-اق پاتسيەنتتەرمەن بايلانىستا بولعان نەمەسە بولۋى مۇمكىن مىڭداعان ادام  ۇيدە نەمەسە ستاتسيونارلىق كارانتيندە جاتىر.

جاۋاپتى ۆەدومستۆونىڭ حابارلاۋىنشا، 24 ناۋرىز كەشكە تىركەلگەن ناۋقاس 1996 جىلعى شىمكەنت تۇرعىنى استانادان اۆتوبۋسپەن كەلگەن. بەيرەسمي اقپاراتقا قاراعاندا، ول استانادا كارانتين جابىلار كەزدە شىمكەنتكە قاراي جولعا شىققان، ال ءۇشىنشى مەگاپوليسكە اۆتوبۋسپەن جەتۋگە كەم دەگەندە ءبىر تاۋلىك كەتەدى. ال جامبىل وبلىسىندا تىركەلگەن ازامات قىرعىزستانعا قاتىنايتىن جۇرگىزۋشى ەكەنى ايتىلدى.

ساراپشىلار مەن مينيسترلەر بولجامى

ۇلىستىڭ ۇلى كۇنى كيبەر شابۋىلداردى تالداۋ جانە تەرگەۋ ورتالىعى COVID-19 ينفەكتسياسىنىڭ مودەلى بويىنشا 10 ساۋىرگە قاراي قازاقستاندا تىركەلگەن ناۋقاستار سانى 17 مىڭعا جەتەتىنى جونىندەگى پەسسيميستىك بولجامىن بولىسكەن ەدى.

دەنساۋلىق ساقتاۋ ءمينيسترى ەلجان ءبىرتانوۆ Facebook جەلىسىندەگى رەسمي پاراعىندا ىندەتتىڭ شارىقتاۋ شەگى، پيك كەزەڭى ءساۋىر ايىنىڭ العاشقى ونكۇندىگىندە ءوتىپ، كەيىن باسەڭدەيتىنىن مالىمدەدى. باس دارىگەردىڭ سوزىنشە، «قابالدانعان شەشىمدەردىڭ ارقاسىندا اۋرۋدىڭ تاراۋى شامامەن 50%-عا ازايعان» كورىنەدى.

«الداعى ۋاقىتتا دا كارانتين تىيىمىن قاتاڭ ساقتاۋ وتە ماڭىزدى. شارا كۇشەيتىلىپ، جالعاسۋى مۇمكىن. بۇل دەرتتىڭ تاراۋىن الدىن الاتىن ەڭ توتە جول»، – دەدى ءبىرتانوۆ.

توقاەۆتىڭ رەسمي پارمەنىمەن ىندەت جونىندەگى اقپاراتتى جاريالاۋ «قۇقىعىن يەمدەنگەن» اقپارات ءمينيسترى داۋرەن اباەۆ دۇيسەنبى كۇنگى مالىمدەمەسىندە تج مەرزىمى ناقتى ەمەستىگىن ايتقان. الەمنىڭ وركەنيەتتى وزىق ەلدەرى كەڭىنەن قولدانىپ جاتقان مەملەكەت تاراپىنان ازاماتتارعا جاردەماقى بەرۋدى «جۇيەسىز پوپۋليستىك ءادىس» دەپ سانايتىن مينيستر بريفينگتە:

«قازاقستاندا ۆيرۋس جۇقتىرعاندار ءالى ءوسىپ، شەگىنە جەتەدى. ودان كەيىن ۆيرۋس جۇقتىرعاندار سانى ازايادى. مۇنىڭ ءبارى ءبىر ايدىڭ ىشىندە اياقتالادى دەپ ۇمىتتەنەمىز»، – دەپ بولجاعان.

قايتا ويلانۋعا ءماجبۇر الەمنىڭ احۋالى

Dadax كومەرتسيالىق ەمەس كومپانياسىنا قاراستى Worldometer ستاتيستيكالىق اقپاراتتار بازاسىنىڭ سوڭعى دەرەگى بويىنشا، الەم جۇرتشىلىعىن ەلەڭدەتىپ، ەكونوميكاسىن تۇرالاتقان COVID-19 ىندەتىنە شالدىققاندار سانى – 420 مىڭنان اسىپ، قازا بولعاندار 19 مىڭعا جۋىقتاعان. سەيسەنبى كۇنى، 24 ناۋرىزدا اقش-تا بىردەن 11 مىڭ، يسپانيادا 7 مىڭعا جۋىق، ەڭ كوپ زارداپ شەككەن يتاليادا 5 مىڭ، سونداي-اق گەرمانيادا 4 مىڭداي ناۋقاس انىقتالعان.

بولجامىن جەتكىزەردە سوزدەن جاڭىلعان بۇرىنعى اتىشۋلى باس سانيتار بەكشيننىڭ ورنىنا كەلگەن جاڭا باسشىنىڭ 24 ناۋرىز كەشكىلىك «اۋرۋ اتلاسىنا» بايلانىستى جاڭا قاۋلى شىعاردى. دەرت دەندەگەن 1ا ساناتىنداعى ەلدەرگە فرانتسيا، يران، يتاليا، يسپانيا، گەرمانيا، ءۇندىستان، تايلاند، مالايزيا، ءباا، شري-لانكا، ەگيپەت ەندى. ەندى اتالعان ەلدەردەن كەلگەن ازاماتتار ارنايى ورىنداردا 14 تاۋلىك كارانتيندە جاتادى. ال 1ب ساناتىنا كوروناۆيرۋس جۇقتىرۋ دەرەگى تىركەلگەن وزگە بارلىق ەلدەر جاتادى.

الەمنىڭ بىرقاتار ەلىندە جاعداي قيىنداپ، اپتا باسىنان بەرى بريتانيا، يسپانيا، فرانتسيا، وزبەكستان، اقش-تىڭ بىرنەشە شتاتتارى قاتاڭ رەجيمدەگى كارانتين جاريالاپ ۇلگەردى.

جۇقتىرۋشىلاردى تىركەۋ ديناميكاسىنا قاراعاندا، ءبىرىنشى 100 مىڭ ناۋقاس العاشقى 67 كۇندە، ەكىنشى جۇزمىڭدىق 11 كۇندە، كەيىنگى 100 مىڭ پاتسيەنت 4 كۇندە، ال سوڭعى جۇزدىك ءبىر-اق كۇندە تىركەلگەنىن بايقاۋعا بولادى. حالىقارالىق ۆۆس مەدياكورپوراتسياسى ساراپشىلارىنىڭ بولجاۋىنشا، ينفەكتسيانىڭ جۇعۋى وسى قارقىندا جالعاسا بەرسە، وندا 27 ناۋرىز COVID-19 جۇقتىرۋشىلار قاتارى 1 ميلليونعا دەيىن ءوسۋى ىقتيمال.

"The Qazaq Times"