"Swñqar" twrğın üy keşenindegi jaqındarına qajetti azıq-tülik alıp berip twrğan twrğındar. 19 naurız 2020 jıl. Foto: EK / Andrey HALIN

Twtas karantinge jabılğan Almatı qalasında koronavirus qaterli indetiniñ 11 oşağı anıqtalıp, birneşe twrğın üy keşeni  15 kündik qatañ rejimdegi krantinge alındı. 

Almatıda Dostıq dañğılındağı «Dostıq Plaza» sauda ortalığına qarama-qarsı ornalasqan «Almaty Towers» twrğın üy keşeni policiya men äskerilerdiñ baqılauına alındı. Jergilikti BAQ-tıñ habarlauınşa, küştik qwrılımdar beysenbi keşkisin TK-in tolıq qorşağan. Sarbazdar aynala ornalasqan aumaqtağı şığatın negizgi qaqpada temir turniket qoyılğan.

Twrğındardıñ biriniñ sözinşe, tüngi sağat 23:00-ge deyin kirip-şığu emin-erkin bolğan, däriger päter aralap azamattardıñ ahualın tekserip şıqqan.

Almaty Towers twrğın üy keşeninde ärqaysısı 20 qabat bolatın 4 üy bar.

Sonımen qosa Almatıda Gogol' men Qonaev köşeleriniñ qiılısında ornalasqan köpqabattı eki üy qorşauğa alındı. Gogol' 75 jäne Qonaev 51 meken-jaylarında ornalasqan twrğın üy ğimarattarı karantinge jabılğan. Nısandı Wlttıq gvardiya sarbazdarı men policeyler qorşauğa alğan.

Särsenbi, 18 naurızdıñ tüninde eñ alğaş Zenkov-Qarasay batır köşeleriniñ qiılısında ornalasqan «Swñqar» twrğın üy keşeni däl osınday tärtippen karantinge jabılğan edi. Sonday-aq atalğan TK janındağı 3 üy (Dostıq 42, Dostıq 42 A, Qabanbay batır 68) qosımşa oqşaulanğan.

Keşe, 19 naurız Almatı qalası äkiminiñ orınbasarı Erjan Babaqwmarov «barlıq audanda 11 oşaq anıqtalğanın» habarlap edi.

Ol virus oşağınıñ «bäri baqılauğa alınıp jatır. Sondıqtan, halıqtıñ köşip-qonuın, qozğalısın toqtatu mañızdı. Basqaşa viruspen küresu qiın boladı. Erteñ oşaqtardıñ qay jerde ekenin tolıq aytamız», – dedi.

Qarağandıda auırğan eki adam Minsk-Qarağandı reysimen wşıp kelgen. Almatıda auırğan üş nauqas ta şetelden kelgeni anıqtaldı.

«Qarağandıdağı eki jağday boyınşa, olar №0324 Minsk-Qarağandı reysimen wşıp kelgen jolauşılar. Biri – 1971 jılğı, ekinşisi – 1972 jılğı azamattar. Al Almatıda 1982 jılğı jäne 1979 jılğı äyel adamdar elge Berlinnen wşıp kelse, 1997 jılğı azamat Franciyadan keldi. Olardıñ barlığınıñ jağdayı qanağattanarlıq. Jalpı, elimizde koronavirus jwqtırğandar sanı 49 adamğa jetti, qaytıs bolğandar joq», – dedi ministrliktiñ resmi ökili Dias Ahmetşärip.

"The Qazaq Times"