"سۇڭقار" تۇرعىن ءۇي كەشەنىندەگى جاقىندارىنا قاجەتتى ازىق-تۇلىك الىپ بەرىپ تۇرعان تۇرعىندار. 19 ناۋرىز 2020 جىل. فوتو: ەك / اندرەي حالين

تۇتاس كارانتينگە جابىلعان الماتى قالاسىندا كوروناۆيرۋس قاتەرلى ىندەتىنىڭ 11 وشاعى انىقتالىپ، بىرنەشە تۇرعىن ءۇي كەشەنى  15 كۇندىك قاتاڭ رەجيمدەگى كرانتينگە الىندى. 

الماتىدا دوستىق داڭعىلىنداعى «دوستىق Plaza» ساۋدا ورتالىعىنا قاراما-قارسى ورنالاسقان «Almaty Towers» تۇرعىن ءۇي كەشەنى پوليتسيا مەن اسكەريلەردىڭ باقىلاۋىنا الىندى. جەرگىلىكتى باق-تىڭ حابارلاۋىنشا، كۇشتىك قۇرىلىمدار بەيسەنبى كەشكىسىن تك-ءىن تولىق قورشاعان. ساربازدار اينالا ورنالاسقان اۋماقتاعى شىعاتىن نەگىزگى قاقپادا تەمىر تۋرنيكەت قويىلعان.

تۇرعىنداردىڭ ءبىرىنىڭ سوزىنشە، تۇنگى ساعات 23:00-گە دەيىن كىرىپ-شىعۋ ەمىن-ەركىن بولعان، دارىگەر پاتەر ارالاپ ازاماتتاردىڭ احۋالىن تەكسەرىپ شىققان.

Almaty Towers تۇرعىن ءۇي كەشەنىندە ارقايسىسى 20 قابات بولاتىن 4 ءۇي بار.

سونىمەن قوسا الماتىدا گوگول مەن قوناەۆ كوشەلەرىنىڭ قيىلىسىندا ورنالاسقان كوپقاباتتى ەكى ءۇي قورشاۋعا الىندى. گوگول 75 جانە قوناەۆ 51 مەكەن-جايلارىندا ورنالاسقان تۇرعىن ءۇي عيماراتتارى كارانتينگە جابىلعان. نىساندى ۇلتتىق گۆارديا ساربازدارى مەن پوليتسەيلەر قورشاۋعا العان.

سارسەنبى، 18 ناۋرىزدىڭ تۇنىندە ەڭ العاش زەنكوۆ-قاراساي باتىر كوشەلەرىنىڭ قيىلىسىندا ورنالاسقان «سۇڭقار» تۇرعىن ءۇي كەشەنى ءدال وسىنداي تارتىپپەن كارانتينگە جابىلعان ەدى. سونداي-اق اتالعان تك جانىنداعى 3 ءۇي (دوستىق 42, دوستىق 42 ا، قابانباي باتىر 68) قوسىمشا وقشاۋلانعان.

كەشە، 19 ناۋرىز الماتى قالاسى اكىمىنىڭ ورىنباسارى ەرجان باباقۇماروۆ «بارلىق اۋداندا 11 وشاق انىقتالعانىن» حابارلاپ ەدى.

ول ۆيرۋس وشاعىنىڭ «ءبارى باقىلاۋعا الىنىپ جاتىر. سوندىقتان، حالىقتىڭ كوشىپ-قونۋىن، قوزعالىسىن توقتاتۋ ماڭىزدى. باسقاشا ۆيرۋسپەن كۇرەسۋ قيىن بولادى. ەرتەڭ وشاقتاردىڭ قاي جەردە ەكەنىن تولىق ايتامىز»، – دەدى.

قاراعاندىدا اۋىرعان ەكى ادام مينسك-قاراعاندى رەيسىمەن ۇشىپ كەلگەن. الماتىدا اۋىرعان ءۇش ناۋقاس تا شەتەلدەن كەلگەنى انىقتالدى.

«قاراعاندىداعى ەكى جاعداي بويىنشا، ولار №0324 مينسك-قاراعاندى رەيسىمەن ۇشىپ كەلگەن جولاۋشىلار. ءبىرى – 1971 جىلعى، ەكىنشىسى – 1972 جىلعى ازاماتتار. ال الماتىدا 1982 جىلعى جانە 1979 جىلعى ايەل ادامدار ەلگە بەرليننەن ۇشىپ كەلسە، 1997 جىلعى ازامات فرانتسيادان كەلدى. ولاردىڭ بارلىعىنىڭ جاعدايى قاناعاتتانارلىق. جالپى، ەلىمىزدە كوروناۆيرۋس جۇقتىرعاندار سانى 49 ادامعا جەتتى، قايتىس بولعاندار جوق»، – دەدى مينيسترلىكتىڭ رەسمي وكىلى دياس احمەتشارىپ.

"The Qazaq Times"