Policiya men wlttıq wlannıñ jayau jasağınıñ qatarı köbeytilip, strategiyalıq asa mañızdı memlekettik ob'ektilerdi küzetu küşeytilmek.

İİM-niñ resursı Polisia.kz Qazaqstan policiyası erekşe qızmet rejimine köşkenin habarladı.

İşki ister ministri Erlan Twrğımbaevtıñ jetekşiligimen ötken keñeske densaulıq saqtau ministrligi tauarlar men qızmetterdiñ sapası men qauipsizdigin baqılau komiteti törağasınıñ orınbasarı Nwrqan Säduaqasov qatıstı.

Vedomstvo basşısı koronavirustıñ taraluına baylanıstı işki ister organdarınıñ jeke qwramı qızmet atqarudıñ erekşe tärtibine auıstırılğanın söz ötti. Qwqıq tärtibin qamtamasız etu bağıtında policiya men wlttıq wlannıñ jayau jasağı köbeytildi, sonday-aq strategiyalıq jäne asa mañızdı memlekettik ob'ektilerdi küzetu küşeytilgeni habarlandı.

Köpşilik qatısatın kezdesu-jiındar tolıq toqtatıldı, qızmetkerlerdiñ şetelge şığuı men is-sapar şekteledi.

«Barlıq deñgeyde İİM qızmetteri men bölimşelerin densaulıq saqtau organdarımen jedel jäne naqtı üylestirudi qamtamasız etu qajet. Policiya qızmetkerleri, qwtqaru qızmeti jäne wlttıq wlannıñ äskeri qızmetşileri qazirdiñ özinde karantindik is-şaralar kezinde medicinalıq qızmetterge tolıq jäne jan-jaqtı kömek körsetude. Bwl rette koronavirustıq jağdayı qolaysız elderden kelgen azamattardı medicinalıq mekemelerge alıp jürudi jüzege asıruda», – dedi Erlan Twrğımbaev.

"The Qazaq Times"