پوليتسيا مەن ۇلتتىق ۇلاننىڭ جاياۋ جاساعىنىڭ قاتارى كوبەيتىلىپ، ستراتەگيالىق اسا ماڭىزدى مەملەكەتتىك وبەكتىلەردى كۇزەتۋ كۇشەيتىلمەك.

ءىىم-ءنىڭ رەسۋرسى Polisia.kz قازاقستان پوليتسياسى ەرەكشە قىزمەت رەجيمىنە كوشكەنىن حابارلادى.

ىشكى ىستەر ءمينيسترى ەرلان تۇرعىمباەۆتىڭ جەتەكشىلىگىمەن وتكەن كەڭەسكە دەنساۋلىق ساقتاۋ مينيسترلىگى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى توراعاسىنىڭ ورىنباسارى نۇرقان سادۋاقاسوۆ قاتىستى.

ۆەدومستۆو باسشىسى كوروناۆيرۋستىڭ تارالۋىنا بايلانىستى ىشكى ىستەر ورگاندارىنىڭ جەكە قۇرامى قىزمەت اتقارۋدىڭ ەرەكشە تارتىبىنە اۋىستىرىلعانىن ءسوز ءوتتى. قۇقىق ءتارتىبىن قامتاماسىز ەتۋ باعىتىندا پوليتسيا مەن ۇلتتىق ۇلاننىڭ جاياۋ جاساعى كوبەيتىلدى، سونداي-اق ستراتەگيالىق جانە اسا ماڭىزدى مەملەكەتتىك وبەكتىلەردى كۇزەتۋ كۇشەيتىلگەنى حابارلاندى.

كوپشىلىك قاتىساتىن كەزدەسۋ-جيىندار تولىق توقتاتىلدى، قىزمەتكەرلەردىڭ شەتەلگە شىعۋى مەن ءىس-ساپار شەكتەلەدى.

«بارلىق دەڭگەيدە ءىىم قىزمەتتەرى مەن بولىمشەلەرىن دەنساۋلىق ساقتاۋ ورگاندارىمەن جەدەل جانە ناقتى ۇيلەستىرۋدى قامتاماسىز ەتۋ قاجەت. پوليتسيا قىزمەتكەرلەرى، قۇتقارۋ قىزمەتى جانە ۇلتتىق ۇلاننىڭ اسكەري قىزمەتشىلەرى قازىردىڭ وزىندە كارانتيندىك ءىس-شارالار كەزىندە مەديتسينالىق قىزمەتتەرگە تولىق جانە جان-جاقتى كومەك كورسەتۋدە. بۇل رەتتە كوروناۆيرۋستىق جاعدايى قولايسىز ەلدەردەن كەلگەن ازاماتتاردى مەديتسينالىق مەكەمەلەرگە الىپ ءجۇرۋدى جۇزەگە اسىرۋدا»، – دەدى ەرلان تۇرعىمباەۆ.

"The Qazaq Times"