DDSW koronavirustı pandemiya dep jariyalauına baylanıstı prezident Toqaev öziniñ twitter jelisindegi parağında jäne ükimet müşeleri resmi mälimdeme jasadı. 
Onıñ sözinşe, qoğamdıq is-şaralardı uaqıtşa toqtatılıp, birqatar mehanizmder iske qosılmaq.

«DDSW koronavirustı pandemiya dep jariyaladı. Ükimet arnayı aldın alu şaraların qolğa aladı. Qoğamdıq is-şaralar uaqıtşa toqtatıladı. Azamattar azıq-tülikpen jäne eñ qajetti tauarlarmen üzdiksiz qamtıladı. Şağın jäne orta biznes zardap şekpeui tiis. Eñ bastısı – azamattarımızdıñ densaulığı. Biz qiınşılıqtardı #Birge eñseremiz», – dep jazdı prezident.

Vedomstvoaralıq jwmıs tobı mınaday şeşim qabıldanğanın mälimdedi:

  • Merekelik, sporttıq, mädeni şaralar, konferenciyalar, körmeler ötkizuge tıyım salınadı;
  • Densaulıq saqtau, bilim beru ob'ektilerinde jäne qoğamdıq köpşilik orındarda, halıqtı qamtamasız etu ortalıqtarı, kommunaldıq şaruaşılıq, tamaq önerkäsibi, sauda, bazarlarda qoğamdıq tamaqtanu, vokzaldar, äuejaylar, qonaq üylerde küşeytilgen sanitarlıq dizenfekciyalıq rejim ornatu;
  • Qarttar men mümkindigi şekteuli jandarğa arnalğan medicinalıq-äleumettik nısandarğa, äleumettik oñaltu ortalıqtarına, mügedek balalarğa arnalğan oqu orındarına baruğa tıyım salınıp, onda küşeytilgen sanitarlıq- dizenfekciyalıq rejim engiziledi;
  • Kanikul kezinde oquşılarğa öñirden tıs jerlerge ekskursiya jasauğa tıyım salınıp, qoğamdıq kölikterdi juu-dezinfekciyalau jüredi.

Bwğan deyin bas sanitarlıq däriger Jandarbek Bekşin osı künderi Qazaqstanda qaterli virustı jwqtırğandar tirkeletinin boljağan edi. Mwnı densaulıq saqtau ministri Eljan Birtanov ta rastap, biliktiñ «B» josparına dayın ekenin habarlağan.

Sonday-aq vice-prem'er Eralı Toğjanov «2020 jıldıñ 16 naurızınan 5 säuirine deyin orta bilim beru mekemeleri uaqıtınan bwrın demalısqa şığadı. 16-sınan bastap tehnikalıq jäne käsibi bilim beru jäne JOO-lar qaşıqtan oqıtu türine köşedi», – dedi .

Bügin Düniejüzilik densaulıq saqtau wyımınıñ bas direktorı Tedros Adanom Gebreisus  koronavirus infekciyasınıñ taraluın pandemiya dep mälimdedi.

Jenevada ötken brifing kezinde wyım ökilderi: «Aldağı tayau künderi jäne osı aptada COVID-19-ti jwqtıru faktileri, ölim jağdayları jäne zardap şekken elder sanı bwdan da artatının boljap otırmız. Biz COVID-19 infekciyasınıñ taraluın pandemiya dep sipattauğa boladı degen twjırımğa keldik», – dedi.

Bügingi derekter boyınşa, älemde qauipti virustı jwqtırğandar sanı 124997 adamğa jetken. Qaytıs bolğandar sanı – 4622 adam.

"The Qazaq Times"