Körneki kollaj. Foto: aşıq derekköz

6 naurızda Venadağı OPEK+ otırısınıñ sätsiz ötuine baylanıstı, mwnay derjavaları ortaq mämilege kele almağandıqtan, bir künde Qazaqstan teñgesi älsirep, dollar qwnı şarıqtap sala berdi. Al ükimet bastığı Asqar Mamin Wlttıq bankpen birigip, halıqqa uäde tolı ündeu jariyaladı. 

Saud Arabiyası Reseydiñ mwnay öndirudi qısqartu wsınısınan bas tartuına jauap retinde älemniñ barlıq aymağındağı öz mwnayınıñ bağasın tömendetip, öndiristi täuligine 9,7 mln barrel'den 12 mln barrel'ge deyin wlğaytatının habarladı. Saldarınan rubl' de, teñge de öz qwnın edäuir joğaltıp ülgerdi.

Toqaevtıñ tapsırmasımen qwrılğan jedel äreket etu ştabınıñ jetekşisi prem'er-ministr Asqar Mamin bügingi ükimet otırısında «Azamattarımızdıñ eşqaysısı qiın jağdayda qalmaydı» dep uäde etti. Onıñ sözinşe, wlttıq ekonomikağa sırtqı faktorlardan tönetin teris ıqpalğa qarsı birqatar şaralar äzirlengen.

«Bizdiñ ortaq mindetimiz – äleumettik twraqtılıqtı qamtamasız etu jäne jwmıspen qamtu. Äreket etip twrğan jwmıs orındarın saqtauğa jäne jaña jwmıs orındarın qwruğa erekşe nazar audaru qajet. Memlekettiñ barlıq äleumettik mindettemeleri orındalatının atap ötkim keledi. Barlıq zeynetaqı men järdemaqı uaqıtılı äri tolıq kölemde tölenedi», –  dedi ol.

Ükimet azıq-tülik, mañızdı tauarlardıñ, qızmet bağasınıñ negizsiz ösuine jol bermeuge uäde berdi. Wlttıq bank valyuta narığın twraqtandıru üşin intervenciya jürgizbek. Ükimet pen Wlttıq banktiñ birlesken ündeuinde «Qarjı narığın retteu jäne damıtu agenttigi valyuta narığındağı twraqtılıqtı saqtau üşin şaralar qabıldaydı, elde äleumettik-ekonomikalıq twraqtılıqtı saqtau üşin elde qajetti resurstar bar» dep sendiruge tırıstı.

Reseyge jasalğan qaysıbir ekonomikalıq sankciya ne qısımnıñ Qazaqstanğa salqını timey qoymaydı. Öytkeni Qazaqstan Reseydiñ ekonomikadağı negizgi seriktesiniñ biri äri Mäskeu basqaratın Euraziyalıq ekonomikalıq odaqqa kiredi. Eñ mañızdısı, mwnay-otın öndirisi el ekonomikasınıñ negizgi tabıs közi. Özge de salalardı damıtuğa jasalğan jüzdegen joba-bağdarlamalarğa qaramastan el ekonomikasınıñ şikizat deñgeyinen asa almauın sarapşılar «korrupciya etek alğan jüyeniñ jwmıs isteu mehanizmi bwzıluımen» baylanıstıradı. Mamandar «bastı şeneunikter şebiniñ monopolistik piğılı men jemqorlıq äreketi kez kelgen kemel reformanıñ özin bas kötertpeydi» dep sanaydı. Ädette, älemde mwnay bağası arzandağan twsta elde qımbatşılıq jaylap, halıq äleumettik-qarjılıq dağdarıstı basınan keşiredi.

"The Qazaq Times"