حالىق سەزىنگەن دەجاۆيۋ: ۇكىمەت باسشىسىنىڭ ۋادەسى

6 ناۋرىزدا ۆەناداعى وپەك+ وتىرىسىنىڭ ءساتسىز وتۋىنە بايلانىستى، مۇناي دەرجاۆالارى ورتاق مامىلەگە كەلە الماعاندىقتان، ءبىر كۇندە قازاقستان تەڭگەسى السىرەپ، دوللار قۇنى شارىقتاپ سالا بەردى. ال ۇكىمەت باستىعى اسقار مامين ۇلتتىق بانكپەن بىرىگىپ، حالىققا ۋادە تولى ۇندەۋ جاريالادى. 

ساۋد ارابياسى رەسەيدىڭ مۇناي ءوندىرۋدى قىسقارتۋ ۇسىنىسىنان باس تارتۋىنا جاۋاپ رەتىندە الەمنىڭ بارلىق ايماعىنداعى ءوز مۇنايىنىڭ باعاسىن تومەندەتىپ، ءوندىرىستى تاۋلىگىنە 9,7 ملن باررەلدەن 12 ملن باررەلگە دەيىن ۇلعايتاتىنىن حابارلادى. سالدارىنان رۋبل دە، تەڭگە دە ءوز قۇنىن ەداۋىر جوعالتىپ ۇلگەردى.

توقاەۆتىڭ تاپسىرماسىمەن قۇرىلعان جەدەل ارەكەت ەتۋ شتابىنىڭ جەتەكشىسى پرەمەر-مينيستر اسقار مامين بۇگىنگى ۇكىمەت وتىرىسىندا «ازاماتتارىمىزدىڭ ەشقايسىسى قيىن جاعدايدا قالمايدى» دەپ ۋادە ەتتى. ونىڭ سوزىنشە، ۇلتتىق ەكونوميكاعا سىرتقى فاكتورلاردان تونەتىن تەرىس ىقپالعا قارسى بىرقاتار شارالار ازىرلەنگەن.

«ءبىزدىڭ ورتاق مىندەتىمىز – الەۋمەتتىك تۇراقتىلىقتى قامتاماسىز ەتۋ جانە جۇمىسپەن قامتۋ. ارەكەت ەتىپ تۇرعان جۇمىس ورىندارىن ساقتاۋعا جانە جاڭا جۇمىس ورىندارىن قۇرۋعا ەرەكشە نازار اۋدارۋ قاجەت. مەملەكەتتىڭ بارلىق الەۋمەتتىك مىندەتتەمەلەرى ورىندالاتىنىن اتاپ وتكىم كەلەدى. بارلىق زەينەتاقى مەن جاردەماقى ۋاقىتىلى ءارى تولىق كولەمدە تولەنەدى»، –  دەدى ول.

ۇكىمەت ازىق-تۇلىك، ماڭىزدى تاۋارلاردىڭ، قىزمەت باعاسىنىڭ نەگىزسىز وسۋىنە جول بەرمەۋگە ۋادە بەردى. ۇلتتىق بانك ۆاليۋتا نارىعىن تۇراقتاندىرۋ ءۇشىن ينتەرۆەنتسيا جۇرگىزبەك. ۇكىمەت پەن ۇلتتىق بانكتىڭ بىرلەسكەن ۇندەۋىندە «قارجى نارىعىن رەتتەۋ جانە دامىتۋ اگەنتتىگى ۆاليۋتا نارىعىنداعى تۇراقتىلىقتى ساقتاۋ ءۇشىن شارالار قابىلدايدى، ەلدە الەۋمەتتىك-ەكونوميكالىق تۇراقتىلىقتى ساقتاۋ ءۇشىن ەلدە قاجەتتى رەسۋرستار بار» دەپ سەندىرۋگە تىرىستى.

رەسەيگە جاسالعان قايسىبىر ەكونوميكالىق سانكتسيا نە قىسىمنىڭ قازاقستانعا سالقىنى تيمەي قويمايدى. ويتكەنى قازاقستان رەسەيدىڭ ەكونوميكاداعى نەگىزگى سەرىكتەسىنىڭ ءبىرى ءارى ماسكەۋ باسقاراتىن ەۋرازيالىق ەكونوميكالىق وداققا كىرەدى. ەڭ ماڭىزدىسى، مۇناي-وتىن ءوندىرىسى ەل ەكونوميكاسىنىڭ نەگىزگى تابىس كوزى. وزگە دە سالالاردى دامىتۋعا جاسالعان جۇزدەگەن جوبا-باعدارلامالارعا قاراماستان ەل ەكونوميكاسىنىڭ شيكىزات دەڭگەيىنەن اسا الماۋىن ساراپشىلار «كوررۋپتسيا ەتەك العان جۇيەنىڭ جۇمىس ىستەۋ مەحانيزمى بۇزىلۋىمەن» بايلانىستىرادى. ماماندار «باستى شەنەۋنىكتەر شەبىنىڭ مونوپوليستىك پيعىلى مەن جەمقورلىق ارەكەتى كەز كەلگەن كەمەل رەفورمانىڭ ءوزىن باس كوتەرتپەيدى» دەپ سانايدى. ادەتتە، الەمدە مۇناي باعاسى ارزانداعان تۇستا ەلدە قىمباتشىلىق جايلاپ، حالىق الەۋمەتتىك-قارجىلىق داعدارىستى باسىنان كەشىرەدى.

"The Qazaq Times"