Körneki kollaj: wstluşı men işki ister ministri Erlan Twrğımbaev. Foto: aşıq derekköz

İşki ister ministri Erlan Twrğımbaev policiya miting kezindegi tärtip bwzu äreketterimen küresudi jalğastıradı. 

İşki ister ministrliginiñ media portalı Polisia.kz-tiñ habarlauınşa, bas policey Erlan Twrğımbaev vedomstvolar men aymaqtıq policiya basqarmalarınıñ basşılarımen kezdesu barısında:

«Qazaqstannıñ birneşe qalasında sankciyalanbağan miting ötkizu jäne oğan qatısu äreketteri tirkelip otır. Bas prokuraturanıñ birneşe ret eskertkenine qaramastan key azamattar elimizde tıyım salınğan ekstremistik wyımnıñ wrandarına senip, alañğa şığadı. Olar kölik qozğalısına kedergi jasap, jolda kollaps tuğızuğa tırısadı. Tärtiptiñ saqtaluın qadağalap jürgen qızmetkerlerge küş körsetedi. Mwnıñ bäri azamattardıñ qauipsizdigi men tınıştığına qauip töndiredi», – dedi.

İİM basşısı sonday-aq, Qazaqstan policiyasınıñ bastı mindeti – halıqtıñ beybit ömiri men tınıştığın qamtamasız etu ekenin atap ötti.

«Policiya üşin eñ bastısı – qauipsizdik pen qoğamdıq tärtip. Zañğa qwlaq asatın azamattarğa alañdaytın eşteñe joq. Biraq mitingke jwmısqa barğanday baratın key azamattar alañdatadı. Olar arandatuşılardıñ ıqpalında, sondıqtan beybitşilik pen twraqtılıq – bizdegi eñ qwndı närse ekenin, onı barınşa bağalau kerektigin tüsinbeydi. Sol üşin policiya aldağı uaqıtta da el qauipsizdigi üşin qızmet etpek. Qazaqstan halqınıñ tınış äri beybit tirşiligin qorğau – bizdiñ negizgi mindetimiz», – deydi ol.

Vedomstvo basşısınıñ aytuınşa, qwqıq qorğau organdarınıñ qızmetkerleri qoğamdıq tärtipti bwzu äreketine qarsı küresti jalğastıra bermek. Ol qaramağındağı basşılarğa policiya qızmetkerlerin zañğa qayşı, arandatuşılıq äreketterden qorğaudı tapsırdı.

“The Qazaq Times”