Qwqıq qorğauşılardıñ aytuınşa, Qazaqstanda policiya tarapınan jasalatın zañsızdıqtar men sıbaylas jemqorlıq äreketi toqtamay twr. Prezident Toqaev bwl salanı tübegeyli reformalau qajettigin moyındap, birneşe märte aşıq rastağanına qaramastan, äli künge deyin qwqıq qorğau organdarında "jemisti nätijeler" bayqalmaydı. Körneki suret. Foto: Aq Jayıq

Keşe, 19 qazanda Şığıs Qazaqstan oblısı Ürjar audanı Maqanşı auıldıq okrugine qarastı Qaratwma auılınıñ 33 jastağı twrğını Azamat Orazalı policiya bölimşesinde qaytıs bolğanı habarlanğan.

Policiyanıñ resmi mälimdemesine qarğanda, ol bölimşege mal wrlau isi boyınşa küdikti retinde jetkizilgen.

Qaytıs bolğan adamnıñ tuıstarı «marqwmnıñ denesinde soqqınıñ izi bolğanın» aytadı. 33 jastağı er adamnıñ qaytıs bolğanın estigen auıl twrğındarı audandıq policiya departamentine basıp kirgen. Halıq  adam ölimine qatıstı küdiktini wstauğa keşki sağat 21:00-ge deyin mwrsat bergen. Sonımen qatar, policiya bölimşesindegi barlıq qızmetkerdiñ tolıqtay qızmetten ketuin talap etken. Kuägerler men tuıstarı Orazalınıñ policiya böliminde azaptap öltirilgenine senimdi.

Oqiğa ornına barğan oblıstıq policiya departamentiniñ bastığı Sağat Mädiev atalğan is boyınşa sotqa deyingi tergeu bastalğanın jetkizdi. Jağdaydı jiti baqılauğa alğanın jäne qajetti saraptamalar, patalogoanatomiyalıq zertteuler jürgizilgenin ayttı.

Aşıq aqparattarğa süyensek, Azamat Orazalını policiya qızmetkerleri ötken senbide, yağni qazannıñ 17-si «mal jayıp jürgen jerinen wstap äketken». Bir qızığı, jaqındarınıñ sözinşe, onıñ atına policiyağa eşbir şağım tüspegen.

Bügin auıldıq policiya böliminiñ qızmetkeri Älibek Qasenov Azattıq tilşisine bergen pikirinde 6 qızmetker jwmıstan şığarılğanın mälimdegen. Olardıñ üşeui qamauğa alındı. Naqtıraq aytqanda, bir jedel uäkil jäne eki uçaskelik policiya inspektorı qamalğan. Säykesinşe Qılmıstıq kodekstiñ «Azaptau» babı boyınşa qılmıstıq is qozğalğan.

Qazaqstandağı twtqındardı azaptau qalıptı jağdayğa aynalğanı turalı otandıq jäne şeteldik qwqıq qorğauşılar men halıqaralıq wyımdar jii sınaydı. Aqparat ağınında da oqtın-oqtın abaqtıdağı zañsızdıqtar qoğamdıq rezonans tudırıp jatadı. Degenmen bilik işki ister jüyesin reformalaudı policeylerdiñ formasın özgertumen bastasa da, jüyeli mäseleni şeşude nätije körsete almay keledi.

Europarlament bıltır naurızdağı qararında Qazaqstanda «twtqındar men küdiktilerdi azaptau» normağa aynaluın, qamau orındarındağı qızmetkerlerdiñ biliksiz ekenin, policiya bölimşelerindegi zorlıq-zombılıq tyılmağanın, eñ bastısı, bir de bir türmege täuelsiz halıqaralıq monitoring jasalmağanın ayıptağan. Mwnı AQŞ memlekettik departamenti älemdegi adam qwqığınıñ ahualı turalı biıl jariyalağan jiıntıq bayandamasında rastağan.

“The Qazaq Times”