İşki ister ministri Erlan Twrğımbaev 1 naurız küni elimizdiñ birneşe qalasında ötken mitingte 80-ge juıq adam wstalğanın mälimdedi. İİM men qwqıq qorğau wyımdarınıñ mälimeti ekinşi märte qabıspauınıñ sebebi nede? 

 «Bas prokuraturanıñ eskertuine qaramastan, keşe biraz azamat ekstremistik wyımdar üşin rwqsat etilmegen orındarda miting wyımdastırmaq boldı. Policiya qoğamdıq tärtipti retke keltiru üşin şara qabıldadı. 80-ge juıq adam policiya bölimine jetkizildi. Äñgimelesuden keyin barlığı jiberildi», - dedi E.Twrğımbaev.

Ministrdiñ sözinşe, wstalğandardıñ bireuine ayıppwl salınıp, üşeui äkimşilik qamauğa alınğan körinedi. Onıñ ekeui policiyağa qarsılıq körsetkeni üşin, bireui miting wyımdastırğanı üşin qamalıptı-mıs. Bwl küni ministr aytqanday Qazaqstanda ekstremistik wyım retinde tanılıp, qızmeti şektelgen QDT ğana emes, ükimettik emes barlıq sayasi wyımdar men azamattıq qozğalıstar beybit şeruge şığatının jäne qoldaytının jariyalağan. Keşe Almatıda jay azamattardan bölek, tilşiler de miting belgilengen jerge jetpey wstalıp jattı. Sonıñ qatarında özin jurnalispin dep tanıstırğan Äsel Jañabay, «Dat» gazetter jobasınıñ jetekşisi, tanımal jurnalist Ermwrat Bäpidi jäne ortalıqtağı kofehananıñ birinen 30-dan astam Oyan, Qazaqstan müşesin policeyler küştep avtozakqa salıp äketti. Respublika alañı mañınıñ özinde tilşilerimizdiñ közben sanağandağı esebi boyınşa, 40-qa juıq adam wstalğanın eskersek, Almatıda jalpı jiını 70-ten kem emes adam policiya bölimine jetkizilgen. Sonımen qosa alğıs aytu küni bolğan şerude astana, Şımkent, Aqtöbe qalasında policiya ondağan azamattı wstağanı belgili boldı.

Al https://www.facebook.com/groups/ActivistsNotExtremists/ jäne Qaharman  azamattıq qwqıq bastamaşıl tobı jürgizgen monitoringi boyınşa, derek müldem basqaşa. 80 emes, kemi 125 adam. Facebook jelisinde jariyalanğan mälimdemede beybit şerude wstalğandardıñ tolıq atı-jöni körsetilgen:

1 naurız qwqıq qorğauşılar 9 qalada 155 sayasi añdu-qudalau oqiğasın tirkedi. Onıñ işinde 8 qalada 125 adam wstalğan:

  • Almatıda 78 jağday (70-i wstau, 8-i quğındau);
  • Astanada 31 jağday (23-i wstau, 8-i quğındau);
  • Aqtöbede 12 jağday (5-eui wstau, 7-eui quğındau);
  • Semeyde 3 jağday (bireui wstau, 2-eui quğındau);
  • Qostanayda bir quğandau jağdayı;
  • Atırauda 10 wstau jağdayı;
  • Oralda 4 jağday (2-eui wstau, 2-eui quğındau);
  • Şımkentte 13 wstau jağdayı;
  • Aqtauda 3 jağday (bireui wstau, 2-eui quğındau).

Bwl işki ister ministri men qwqıq qorğauşılar wyımı wsınğan derekterdegi birinşi säykessizdik emes. Bwğan deyin de vedomstvo basşısı Erlan Twrğımbaev 22 aqpanda birneşe qalada ötken sankciyalanbağan mitingte bar bolğanı 53 adam wstalğanın aytqan bolatın. Alayda qwqıq qorğauşılar  300-dey azamattıñ küştep wstalğanın habarlağan edi. Osığan baylanıstı Amnesty International  halıqaralıq qwqıq qorğau wyımı 22 aqpan Qazaqstan biliginiñ köpe-körneu wstau äreketi jaylı mälimdeme jasap, Qazaqstandağı wstaudı «masqara», «wyat» dep bağaladı. Äri äkimşilik jüyeni senbidegi beybit miting kezinde qamalğan azamattardı dereu bosatuğa şaqırdı.

Aytpaqtay, juırda ğana İİM saytında eldiñ policiyağa senimi artıp kele jatqanı turalı zertteu nätijesi jariyalandı. Erlan Twrğımbaevtıñ sözinşe, «respondentterdiñ 38,3%-ı tolıqtay kelisetinin, 51,2%-ı işinara policiyağa senedi äri kelisedi»-mıs.

"The Qazaq Times"