Prezident Qasım-Jomart Toqaev Qorday audanınıñ twrğındarımen kezdesti. 1 naurız 2020 jıl. Foto: Aqorda

Prezident Qordaydağı wltaralıq qaqtığıstıñ «jaña» sebebin mälimdedi. Sonday-aq jergilikti qızmetkerlerdiñ para alu jäne şekara arqılı zañsız sauda jasau mäselesin şeşudi tapsırdı.

Memleket basşısı Toqaev Qorday audanındağı Qarakemer auılınıñ twrğındarımen kezdesuinde «täuelsizdiktiñ arqasında qazaq halqı şın mänindegi memleket qwrauşı wltqa aynaldı» dedi.

«Töl halqımızdıñ şınayı qasietteri, bolmısı qanday boluı kerek? Bwl, eñ aldımen, keñşilik, jomarttıq, jaysañdıq, jasampazdıq degen söz. Biz basqa wlttarğa, özge elderge önege, ülgi körsetuimiz kerek. Qazaq halqı beyqam, jalqau, erinşek, onıñ qolınan eşqanday jwmıs kelmeydi degen jağımsız äñgimelerdi doğaru qajet. Biraq osınday teris pikirlerdi toqtatu üşin özimizdiñ eñbekqorlığımızdı körsetuimiz kerek», – dedi prezident.

Sonday-aq jiın barısında Toqaev Qordaydağı tärtipsizdikke eki qılmıstıq top arasındağı teketires sebep bolğanın ayttı.

«Audanda bir top adam belsendi türde kontrabandamen aynalısıp jürgen. Bwl – belgili närse. Osı iske basqa top ta qatısqısı kelgen. Bir sözben aytsaq, zañsız tabıs közi üşin eki qılmıstıq toptıñ arasında teketires payda bolğan. Bwl teketires saldarınan köp adam zardap şekti. 11 adam qaza taptı. Onı aşıq aytu kerek. Endi qwqıq qorğau organdarınıñ aldında twrğan maqsat – barlıq qılmıskerlerdi wltına qaramay, zañğa säykes jazağa tartu. Onsız elimizde tärtip bolmaydı», – dedi ol.

El basşısı tergeu jwmısı zañğa säykes jürgiziletinin, zañ aldında bäri teñ ekenin aytıp, Qordaydağı jergilikti qızmetkerlerdiñ para alu jäne şekara arqılı zañsız sauda jasau mäselelerin şeşudi tapsırdı. Biraq prezident Toqaev älgi belgisiz eki toptıñ naqtı kimder ekenin jäne qanday kontrabandamen aynalısqanın aşıp aytqan joq.

"The Qazaq Times"