پرەزيدەنت قاسىم-جومارت توقاەۆ قورداي اۋدانىنىڭ تۇرعىندارىمەن كەزدەستى. 1 ناۋرىز 2020 جىل. فوتو: اقوردا

پرەزيدەنت قوردايداعى ۇلتارالىق قاقتىعىستىڭ «جاڭا» سەبەبىن مالىمدەدى. سونداي-اق جەرگىلىكتى قىزمەتكەرلەردىڭ پارا الۋ جانە شەكارا ارقىلى زاڭسىز ساۋدا جاساۋ ماسەلەسىن شەشۋدى تاپسىردى.

مەملەكەت باسشىسى توقاەۆ قورداي اۋدانىنداعى قاراكەمەر اۋىلىنىڭ تۇرعىندارىمەن كەزدەسۋىندە «تاۋەلسىزدىكتىڭ ارقاسىندا قازاق حالقى شىن مانىندەگى مەملەكەت قۇراۋشى ۇلتقا اينالدى» دەدى.

«ءتول حالقىمىزدىڭ شىنايى قاسيەتتەرى، بولمىسى قانداي بولۋى كەرەك؟ بۇل، ەڭ الدىمەن، كەڭشىلىك، جومارتتىق، جايساڭدىق، جاسامپازدىق دەگەن ءسوز. ءبىز باسقا ۇلتتارعا، وزگە ەلدەرگە ونەگە، ۇلگى كورسەتۋىمىز كەرەك. قازاق حالقى بەيقام، جالقاۋ، ەرىنشەك، ونىڭ قولىنان ەشقانداي جۇمىس كەلمەيدى دەگەن جاعىمسىز اڭگىمەلەردى دوعارۋ قاجەت. بىراق وسىنداي تەرىس پىكىرلەردى توقتاتۋ ءۇشىن ءوزىمىزدىڭ ەڭبەكقورلىعىمىزدى كورسەتۋىمىز كەرەك»، – دەدى پرەزيدەنت.

سونداي-اق جيىن بارىسىندا توقاەۆ قوردايداعى تارتىپسىزدىككە ەكى قىلمىستىق توپ اراسىنداعى تەكەتىرەس سەبەپ بولعانىن ايتتى.

«اۋداندا ءبىر توپ ادام بەلسەندى تۇردە كونتراباندامەن اينالىسىپ جۇرگەن. بۇل – بەلگىلى نارسە. وسى ىسكە باسقا توپ تا قاتىسقىسى كەلگەن. ءبىر سوزبەن ايتساق، زاڭسىز تابىس كوزى ءۇشىن ەكى قىلمىستىق توپتىڭ اراسىندا تەكەتىرەس پايدا بولعان. بۇل تەكەتىرەس سالدارىنان كوپ ادام زارداپ شەكتى. 11 ادام قازا تاپتى. ونى اشىق ايتۋ كەرەك. ەندى قۇقىق قورعاۋ ورگاندارىنىڭ الدىندا تۇرعان ماقسات – بارلىق قىلمىسكەرلەردى ۇلتىنا قاراماي، زاڭعا سايكەس جازاعا تارتۋ. ونسىز ەلىمىزدە ءتارتىپ بولمايدى»، – دەدى ول.

ەل باسشىسى تەرگەۋ جۇمىسى زاڭعا سايكەس جۇرگىزىلەتىنىن، زاڭ الدىندا ءبارى تەڭ ەكەنىن ايتىپ، قوردايداعى جەرگىلىكتى قىزمەتكەرلەردىڭ پارا الۋ جانە شەكارا ارقىلى زاڭسىز ساۋدا جاساۋ ماسەلەلەرىن شەشۋدى تاپسىردى. بىراق پرەزيدەنت توقاەۆ الگى بەلگىسىز ەكى توپتىڭ ناقتى كىمدەر ەكەنىن جانە قانداي كونتراباندامەن اينالىسقانىن اشىپ ايتقان جوق.

"The Qazaq Times"