İşki ister ministri Erlan Twrğımbaev pen 22 aqpanda Almatıdağı narazılıqta «ayaq-qolı jerge timey» avtozakqa «wşıp bara jatqan» aqsaqal. Körneki kollaj. Foto: QT

İİM basşısı Erlan Twrğımbaev ötken aptanıñ senbisi, 22 aqpanda birneşe qalada bolğan sankciyalanbağan mitingte bar bolğanı 53 adam wstalğanın aytıptı. Al qwqıq qorğauşılar bwğan deyin 300-dey azamattıñ küştep wstağanın habarlağan.

22 aqpandağı mitingide «53 adam wstalıp, 10 adam äkimşilik jazağa tartılğan, profilaktikalıq äñgimeden keyin 43 adam bosatılğan» dep jauap beripti işki ister ministri Twrğımbev Azattıq tilşisine.

– Bas prokuraturanıñ birneşe ret eskertkenine qaramastan keybir azamattar aqpannıñ 22-sine rwqsat etilmegen jiınğa şıqtı. Qoğamdıq tärtipti saqtau jäne rwqsat etilmegen mitingige jol bermeu üşin şara qoldanıldı, – dedi bas policey ükimet otırısınan keyin.

Adam qwqığın qorğauşılar jariyalağan monitoring derekter qorında 22 aqpan küni Qazaqstannıñ türli qalalarında bolğan mitingiler kezinde «300-den astam adam wstaldı, eki adam jaraqattandı» dep habarlağan edi. Bir Almatı qalasınıñ özinde oqiğa ornınan küni boyı habar taratqan redakciyamızdıñ tilşileri közben sanağanda 130-150 şaqtı azamattıñ küştep wstalğanın jetkizgen bolatın.

Erlan Twrğımbaev tipti jaraqattanğandar joqtığın jetkizipti.

22-si tüske deyin däl osı mañda Dempartiyanıñ bastamaşıl tobınıñ jüz şaqtı jaqtastarı wstalğanı habarlanğan bolatın. Al tüsten soñ eks-bankir, quğındağı oppoziciyalıq sayasatker Mwhtar Äblyazov jetekşilik etetin, elde ekstremistik wyım retinde tanılıp,  qızmetine tıyım salınğan «Qazaqstannıñ demokratiyalıq tañdauı» qozğalısı jaqtastarınıñ Almatı qalasındağı rwqsat etilmegen mitinginde kem degende jüzge juıq adam avtozakqa tielip, äketilgen edi.

Bwl küni Şımkent, Taraz, Aqtöbe, astanada miting ötedi dep belgilengen jerge kelgen belsendilerdi policiya wstap jatır. Jer-jerde wstalğandar «Nazarbaev ketsin!», «Şal, ket!» dep wrandattı. Şımkenttegi Täuelsizdik sayabağında küzet küşeytilip, 20-dan astam adamdı policiya äketken. Tarazda da ortalıq köşelerde arnayı jasaq jwmıldırıldı. Aqtöbe men astanada policiya kem degende on adamdı äketti. Miting josparlanğan aymaqtarda ğalamtor jwmısı naşarlağan.

Sol küni-aq älemdik adam haqı qozğalısı Amnesty International  halıqaralıq qwqıq qorğau wyımı 22 aqpan Qazaqstan biliginiñ köpe-körneu wstau äreketi jaylı mälimdeme jasap, Qazaqstandağı wstaudı «masqara», «wyat» dep bağaladı. Äri äkimşilik jüyeni senbidegi beybit miting kezinde qamalğan azamattardı dereu bosatuğa şaqırdı.

Aytpaqtay, däl miting ötetin küni İİM saytında eldiñ policiyağa senimi artıp kele jatqanı turalı zertteu nätijesi jariyalandı. Erlan Twrğımbaevtıñ sözinşe, «respondentterdiñ 38,3%-ı tolıqtay kelisetinin, 51,2%-ı işinara policiyağa senedi äri kelisedi»-mıs.

"The Qazaq Times"