Xavier policey-robotı. Foto: www.htx.gov.sg - A Singapore Government Agency Website

Singapur biligi jaqında Xavier attı eki jaña policiya robotın şığardı. Olar qoğamdıq orındardağı qauipsizdikti baqılaydı äri zañbwzuşılıqtardı anıqtaydı.

2020 jılğı mamırında Singapur biligi COVID-19 pandemiyası kezinde äleumettik araqaşıqtıq saqtau maqsatında Boston Dynamics Spot Robot Dog robot-itin qoldanıp, innovaciyalıq jobamen tanımaldığı artqan. Bişan-Ang Mo Kio sayabağın baqılaytın bwl robottı äleumettik jeli qoldanuşıları «Qara ayna» («Çernoe zerkalo» – orısşa) seriyasınıñ futuristik jäne distopiyalıq epizodına wqsatqan.

Juırda Singapur äkimşiligi ğılım men tehnologiya agenttigi (HTSTA) Xavier dep atalatın tağı eki avtonomdı robottı testtik rejimde paydalana bastadı. Olar qırküyek ayında qoğamdıq orındardağı twrğındardıñ karantin erejesin saqtauın baqılaydı. Äzirge policey-robottar testi jayau jürginşiler köp jüretin qalanıñ körnekti orını Toa-Payo-Sentral ortalığında jürgizilip jatır.

Robottarğa aynalımı 360 gradustıq kamera ornatılğan. Temir-saqşılar tärtipke qayşı qoyılğan velosipedter, qoğamdıq orındarda şılım tartqandar men bes adamnan artıq toptasu, maska rejimin saqtamau, jayau jürginşiler jolağımen jüretin motocikl siyaqtı zañbwzuşılıqtardı anıqtaydı. Josparğa say robottar qwqıq qorğau organdarınıñ jwmısına kömektesui tiis.

Singapur osığan deyin Dubay biligimen Robocop koncepciyası ülgisinde robot-policeyler dayındau jöninde memorandum jasasqan. Öndiruşi Singapur qala-memleketindegi bedeldi innovaciyalıq Otswa Digital kompaniyası äzirlegen O-R3 avtonomdı robot-kölikteri birer jıldan beri Dubay köşelerinde policiyağa kömekşi qwral retinde qoldanılıp keledi. Singapurlıq kompaniya 2030 jılğa qaray Dubay policiyasınıñ törtten bir böligin robottarmen qamtamasız etetinin mälimdegen.

Läzzat Qwmarbekqızı

"The Qazaq Times"