Densaulıq saqtau ministri Eljan Birtanov pen öñir äkimi Danial Ahmetov ŞQO-dağı  Sarıterek, Aynabwlaq auılında koronaviruske qarsı karantindik stacionar aşıladı dep dürlikken jwrttıñ talabına qatıstı mälimdeme jasadı.

«Ökinişke qaray, el arasında tüsinbeuşilikter orın alğan. Bizdiñ karantin jürgizu boyınşa belgili bir täjiribemiz bar. Büginge deyin 524 adam karantinnen ötti. Uhan' qalasınan bügin tünde bir student keldi. Vedomstvoaralıq memlekettik komissiya Qıtay men Qazaqstan şekarasında köşu boyınşa arnayı şeşim qabıldağan. Ol tek jolauşı tasımalı boyınşa ğana. Mısalı wşaq arqılı nemese avtobus arqılı. Biraq türli kommerciyalıq baylanıs pen jük tasımalı äli toqtatılğan joq. Sebebi kündelikti jürip jatqan tauarlar bar. Onıñ arasında tranzittik tauarlar, elimizge qajetti tauarlar bar. Solardıñ jürgizuşileri ŞQO boyınşa Baqtı jäne Mayqapşağay beketteri arqılı, Almatı oblısı boyınşa temirjol beketteri arqılı ötude. Biz kündelikti monitoring jasaymız. Sanitarlıq däriger mindetti türde sol jerde twradı. Teplovizorlar bizde bar. Qosımşa teplovizor aluğa tırısıp jatırmız», – degen ministr Mayqapşağay keden beketi arqılı Qazaqstannıñ 6 azamatın elge ötkizu qajettigi tuğanın, sol üşin ministrlik şekarağa jaqın mañnan karantindik stacionar qwru turalı tapsırma bergenin ayttı.

«Qazir bizdiñ aqparat boyınşa Qıtayda saudamen aynalısatın qazaqstandıq azamattar, kölik jürgizuşileri bar. Olar elge qaytqısı keledi. Biz mümkindik beruimiz kerek. Ärine, qauipsizdik mäseleleri boyınşa täuekelder bar. Kelgennen keyin, olardı baqılauğa aluımız kerek. El basında dwrıs tüsinbegen. Qıtay azamattarı kelip jatır degen dwrıs emes. Ötken täulik boyınşa Mayqapşağay beketi arqılı Şığıs Qazaqstan aumağına eşkim ötken joq. Kündelikti köp bolsa 10-15 adam ötetin. Olardıñ bäri bizdiñ azamattar. Almatı oblısı boyınşa 25 adam kün sayın ötedi. Olar poyızben keletin adamdar, jürgizuşiler, maşinister. Ärine, bizdiñ negizgi maqsatımız –azamattarımız elge kelse, basqa twrğındarmen kezdesip, infekciya taratuına jol bermeu. Sol üşin jaqın jerden arnayı karantindik stacionar aşu turalı bizdiñ bwyırığımız bolğan. Azamattar tüsinbegen. Auıldıñ ambulatoriyası dep wqqan. Bizdiñ şeşim boyınşa arnayı stacionar Zaysan audanınıñ ortalıq auruhanasınıñ infekciyalıq aurularğa arnalğan korpusınan aşıladı. Qajettilik bolsa, kelgen adamdardı sol jerge jatqızatın boladı», – dedi Eljan Birtanov.

ŞQO, Zaysan audanındağı Mayqapşağay keden beketi. Foto: aşıq derekköz

Sonday-aq ministr elge qaytqısı keletin atalmış azamattardı Almatı men astanağa alıp ketsin degen jwrttıñ talabına qatıstı pikir bildirdi.

«Ol mäsele äli qaralıp jatır. Qazir oblıs äkimi halıqpen kezdesip jatır. Kezdesu bitkennen keyin, biz tağı söylesemiz. Bizdegi aqparat boyınşa qazaq eliniñ 6 azamatı elge kirmekşi. Meniñ oyımşa, solardı elge kirgizbey, elden quamız degen söz köterilmeui kerek. Ärine, ol azamattar sol audannıñ twrğındarı. Olardıñ tuıstarı bar, ata-anaları bar. Olardı basqa qalağa aparudıñ qanday qajettiligi bar? Olar sau adamdar. Bizdiñ aqparatımız boyınşa auru adamdar joq», – dedi ol.

Aymaq äkimi Danial Ahmetov elge "tüsindirude". Foto: aşıq derekköz

Zaysan audanınıñ Sarıterek jäne Aynabwlaq auılınıñ twrğındarı «Qıtaydan kelgenderdi koronavirusqa baylanıstı osı auıldardağı medicinalıq punktterge ornalastıradı» degen äleumettik jelide taralğan aqparattıñ jeleuimen narazılıq bildirgeni turalı jazğan edik. Bügin oblıs äkimi Danial Ahmetov Zaysan audanına jol tarttı. Ol twrğındarmen kezdesip, män-jaydı tüsindiruge tırıstı.

– Şekaradan eşqanday özge eldiñ azamattarı ötken joq. Biraq şekaranıñ arğı jağında bes zaysandıq azamat twr. Olardıñ densaulığın baqılau üşin 14 künge Öskemenge alıp ketemiz, – dedi Danial Ahmetov.

"The Qazaq Times"