زايسان جۇرتىنىڭ نارازىلىعى مەن شەنەۋنىكتەردىڭ «شۋدان كەيىنگى تۇسىندىرمەسى»

دەنساۋلىق ساقتاۋ ءمينيسترى ەلجان ءبىرتانوۆ پەن ءوڭىر اكىمى دانيال احمەتوۆ شقو-داعى  سارىتەرەك، اينابۇلاق اۋىلىندا كوروناۆيرۋسكە قارسى كارانتيندىك ستاتسيونار اشىلادى دەپ دۇرلىككەن جۇرتتىڭ تالابىنا قاتىستى مالىمدەمە جاسادى.

«وكىنىشكە قاراي، ەل اراسىندا تۇسىنبەۋشىلىكتەر ورىن العان. ءبىزدىڭ كارانتين جۇرگىزۋ بويىنشا بەلگىلى ءبىر تاجىريبەمىز بار. بۇگىنگە دەيىن 524 ادام كارانتيننەن ءوتتى. ۋحان قالاسىنان بۇگىن تۇندە ءبىر ستۋدەنت كەلدى. ۆەدومستۆوارالىق مەملەكەتتىك كوميسسيا قىتاي مەن قازاقستان شەكاراسىندا كوشۋ بويىنشا ارنايى شەشىم قابىلداعان. ول تەك جولاۋشى تاسىمالى بويىنشا عانا. مىسالى ۇشاق ارقىلى نەمەسە اۆتوبۋس ارقىلى. بىراق ءتۇرلى كوممەرتسيالىق بايلانىس پەن جۇك تاسىمالى ءالى توقتاتىلعان جوق. سەبەبى كۇندەلىكتى ءجۇرىپ جاتقان تاۋارلار بار. ونىڭ اراسىندا ترانزيتتىك تاۋارلار، ەلىمىزگە قاجەتتى تاۋارلار بار. سولاردىڭ جۇرگىزۋشىلەرى شقو بويىنشا باقتى جانە مايقاپشاعاي بەكەتتەرى ارقىلى، الماتى وبلىسى بويىنشا تەمىرجول بەكەتتەرى ارقىلى وتۋدە. ءبىز كۇندەلىكتى مونيتورينگ جاسايمىز. سانيتارلىق دارىگەر مىندەتتى تۇردە سول جەردە تۇرادى. تەپلوۆيزورلار بىزدە بار. قوسىمشا تەپلوۆيزور الۋعا تىرىسىپ جاتىرمىز»، – دەگەن مينيستر مايقاپشاعاي كەدەن بەكەتى ارقىلى قازاقستاننىڭ 6 ازاماتىن ەلگە وتكىزۋ قاجەتتىگى تۋعانىن، سول ءۇشىن مينيسترلىك شەكاراعا جاقىن ماڭنان كارانتيندىك ستاتسيونار قۇرۋ تۋرالى تاپسىرما بەرگەنىن ايتتى.

«قازىر ءبىزدىڭ اقپارات بويىنشا قىتايدا ساۋدامەن اينالىساتىن قازاقستاندىق ازاماتتار، كولىك جۇرگىزۋشىلەرى بار. ولار ەلگە قايتقىسى كەلەدى. ءبىز مۇمكىندىك بەرۋىمىز كەرەك. ارينە، قاۋىپسىزدىك ماسەلەلەرى بويىنشا تاۋەكەلدەر بار. كەلگەننەن كەيىن، ولاردى باقىلاۋعا الۋىمىز كەرەك. ەل باسىندا دۇرىس تۇسىنبەگەن. قىتاي ازاماتتارى كەلىپ جاتىر دەگەن دۇرىس ەمەس. وتكەن تاۋلىك بويىنشا مايقاپشاعاي بەكەتى ارقىلى شىعىس قازاقستان اۋماعىنا ەشكىم وتكەن جوق. كۇندەلىكتى كوپ بولسا 10-15 ادام وتەتىن. ولاردىڭ ءبارى ءبىزدىڭ ازاماتتار. الماتى وبلىسى بويىنشا 25 ادام كۇن سايىن وتەدى. ولار پويىزبەن كەلەتىن ادامدار، جۇرگىزۋشىلەر، ماشينيستەر. ارينە، ءبىزدىڭ نەگىزگى ماقساتىمىز –ازاماتتارىمىز ەلگە كەلسە، باسقا تۇرعىندارمەن كەزدەسىپ، ينفەكتسيا تاراتۋىنا جول بەرمەۋ. سول ءۇشىن جاقىن جەردەن ارنايى كارانتيندىك ستاتسيونار اشۋ تۋرالى ءبىزدىڭ بۇيىرىعىمىز بولعان. ازاماتتار تۇسىنبەگەن. اۋىلدىڭ امبۋلاتورياسى دەپ ۇققان. ءبىزدىڭ شەشىم بويىنشا ارنايى ستاتسيونار زايسان اۋدانىنىڭ ورتالىق اۋرۋحاناسىنىڭ ينفەكتسيالىق اۋرۋلارعا ارنالعان كورپۋسىنان اشىلادى. قاجەتتىلىك بولسا، كەلگەن ادامداردى سول جەرگە جاتقىزاتىن بولادى»، – دەدى ەلجان ءبىرتانوۆ.

شقو، زايسان اۋدانىنداعى مايقاپشاعاي كەدەن بەكەتى. فوتو: اشىق دەرەككوز

سونداي-اق مينيستر ەلگە قايتقىسى كەلەتىن اتالمىش ازاماتتاردى الماتى مەن استاناعا الىپ كەتسىن دەگەن جۇرتتىڭ تالابىنا قاتىستى پىكىر ءبىلدىردى.

«ول ماسەلە ءالى قارالىپ جاتىر. قازىر وبلىس اكىمى حالىقپەن كەزدەسىپ جاتىر. كەزدەسۋ بىتكەننەن كەيىن، ءبىز تاعى سويلەسەمىز. بىزدەگى اقپارات بويىنشا قازاق ەلىنىڭ 6 ازاماتى ەلگە كىرمەكشى. مەنىڭ ويىمشا، سولاردى ەلگە كىرگىزبەي، ەلدەن قۋامىز دەگەن ءسوز كوتەرىلمەۋى كەرەك. ارينە، ول ازاماتتار سول اۋداننىڭ تۇرعىندارى. ولاردىڭ تۋىستارى بار، اتا-انالارى بار. ولاردى باسقا قالاعا اپارۋدىڭ قانداي قاجەتتىلىگى بار؟ ولار ساۋ ادامدار. ءبىزدىڭ اقپاراتىمىز بويىنشا اۋرۋ ادامدار جوق»، – دەدى ول.

ايماق اكىمى دانيال احمەتوۆ ەلگە "تۇسىندىرۋدە". فوتو: اشىق دەرەككوز

زايسان اۋدانىنىڭ سارىتەرەك جانە اينابۇلاق اۋىلىنىڭ تۇرعىندارى «قىتايدان كەلگەندەردى كوروناۆيرۋسقا بايلانىستى وسى اۋىلدارداعى مەديتسينالىق پۋنكتتەرگە ورنالاستىرادى» دەگەن الەۋمەتتىك جەلىدە تارالعان اقپاراتتىڭ جەلەۋىمەن نارازىلىق بىلدىرگەنى تۋرالى جازعان ەدىك. بۇگىن وبلىس اكىمى دانيال احمەتوۆ زايسان اۋدانىنا جول تارتتى. ول تۇرعىندارمەن كەزدەسىپ، ءمان-جايدى تۇسىندىرۋگە تىرىستى.

– شەكارادان ەشقانداي وزگە ەلدىڭ ازاماتتارى وتكەن جوق. بىراق شەكارانىڭ ارعى جاعىندا بەس زايساندىق ازامات تۇر. ولاردىڭ دەنساۋلىعىن باقىلاۋ ءۇشىن 14 كۇنگە وسكەمەنگە الىپ كەتەمىز، – دەدى دانيال احمەتوۆ.

"The Qazaq Times"