Foto: https://static.asiatimes.com

Koreya Respublikasınıñ Wlttıq qorğanıs ministri Çon Gen Du 23 aqpanda AQŞ-qa resmi issaparmen barıp, amerikanlıq äriptesi Mark Espermen Korey tübegindegi ahualdı talqılamaq. Bwl turalı Seulde ötken brifingte Oñtüstik Koreya qorğanıs vedomstvosınıñ resmi ökili mälim etti.

Mälimdemede: «Josparlanğan kezdesu barısında ekijaqtı äskeri baylanıstarğa qatıstı mañızdı mäseleler, onıñ işinde Oñtüstik Koreyadağı AQŞ äskerlerin wstauğa jwmsalatın şığındardı bölu taqırıbı da talqılanadı», – delingen.

Sonday-aq, Qorğanıs ministrliginiñ ökili Çon Gen Du 1950-1953 jıldardağı Korey soğısına qatısqan amerikalıq ardagerlermen kezdesip, kongressmendermen kelissözder jürgizedi jäne teñiz jayau äskerlerin dayındaytın Kaliforniyadağı äskeri bazağa baradı.

Qañtarda Korey tübeginde amerikalıq äskeri kontingentke bölinetin qarjı mäselesin retteu maqsatında ötken altınşı kelissöz nätijesiz ayaqtaldı. Aldıñğı kelisimniñ merzimi 2019 jılı 31 jeltoqsanda ayaqtaldı.

2018 jıldan bastap Uaşington Seulden Koreya Respublikasındağı AQŞ kontingentin wstauğa arnalğan jarnalardıñ ülesin arttırudı talap etip keledñ. 2019 jılı oñtüstik koreyalıq birlesken qorğanıs şığındarı 8,2%-ğa yağni 1,04 trln vonğa (915 mln dollar) deyin arttı. 2019 jıldıñ qaraşasında Uaşington Seulden jarnalardı bes esege ($ 4,7 mlrd-qa) deyin arttırudı talap etken.

AQŞ äskerleri Oñtüstik Koreyada 1950-1953 jıldarı bolğan. Eki el arasındağı kelisimge 1950 jılı 26 qañtarda qol qoyılğan.

Qwrama Ştat pen Oñtüstik Koreya birlesken äskeri jattığulardı jılına eki ret Korey tübeginde ötkizip kelgen. Tübekte şielenisterdiñ artuına baylanıstı, Phen'yan tarapı birneşe ret narazılıq bildirgen bolatın. Sebebi, Korey tübeginde äskeri jattığu ötkizetin elder arasında kelispeuşilikter jii orın alğandıqtan, qos Koreya soğıs rejimine ötui mümkin degen küdik wyaladı. Biraq, Oñtüstik Koreya prezidenti Mün Ja-In jergilikti arnalarğa swhbat berip: «Oñtüstik Koreyanıñ bir niet, bir tilekte küş jwmıldıru wstanımı, Korey tübegi dağdarısınıñ soğısqa wlaspauınıñ negizgi kepili. Biz soğıs tudırmauğa tırısamız. Eger tağı bir märte soğıs tuatın bolsa barlığı külge aynaladı. Korey tübeginiñ äskeri is-qimılına tek Oñtüstik Koreya şeşim qabılday aladı. Eger Oñtüstik Koreya kelispese, basqa eşbir tarap Korey tübeginde soğıs bastamaydı», – dep kesimdi jauap qaytarğan.

Bügingi künge deyin aymaqtağı elder ğana emes, älem elderi de Korey tübeginde tuuı mümkin yadrolıq soğısqa alañdap kelgen bolatın. Degenmen, qazirgi är taraptıñ qadamdarı bwl qauiptiñ auılın birşama alıstattı. Oñtüstik Koreya basşısı koreylerdiñ tağdırına qauip tudıratın qadamğa barmaytının atap ötti.

"The Qazaq Times"