«Pentagon Qıtay Halıq-azattıq armiyasına qarsı küresuge dayın». Bwnday mälimdemeni AQŞ  qorğanıs ministri Mark Esper jasadı. Ol birer kün bwrın eldegi eñ ıqpaldı basılımnıñ biri The Wall Street Journal-ğa «Pentagon Qıtayğa dayın» degen maqala jariya etken.

Atalğan maqalada Qıtay Halıq-azattıq armiyasınıñ qateri turalı talqılağan. Sonday-aq, Qıtaydan tönetin qauipke qarsı küresudiñ üş negizgi bağıtın wsınğan. Aytalıq, odaqtastar men jaqın seriktesterdi biriktiru; Beyjiñniñ ürkitu-qorqıtu äreketterine ortaq qarsı twru jäne barlıq elderdiñ egemendigi men erkin äri aşıq halıqaralıq jüyeni qorğau.

Mark Esper öz maqalasında älem jaña däuirge qadam basqanın, bwl erkin äri aşıq älemdik tärtip pen Beyjiñ wstanğan avtokratiya arasındağı jahandıq bäsekelestik däuiriniñ bastalğanın bildiredi dep körsetti. Esperdiñ aytuınşa, Qıtay jetekşileri äskeri is-qimıldı maqsatqa jetudiñ özekti täsili dep sanaydı. Al, maqsattarınıñ işindegi eñ mañızdısı – halıqaralıq tärtipti özgertu jäne älemde qabıldanğan erejelerdi bwzu ekenin aytadı.

Pentagon basşısı Qıtaydıñ bwnday qauipti äreketteri AQŞ Qorğanıs ministrligin Qıtayğa jan-jaqtı jauap qaytaruğa jäne qorğanıs strategiyasın tez arada jüzege asıruğa itermelegenin alğa tarttı. Mark Esper alğa qoyğan küres taktikalarında basımdıqqa ie boludı mañızdı dep körsetken. Aytalıq, Qıtaymen wzaqqa sozılatın bäsekede basımdıqqa jetu üşin Qwrama Ştattar teñiz, äue, qwrılıq jäne ğarış küşterine qosa, kiberkeñistiktegi bäsekede de basımdıqqa jetui kerek. Atalğan salalarda Qıtaymen bäsekege tüse alatın, Qıtaydı tejey alatın jäne jeñe alatın quatqa ie bolu kerek dep atap körsetti.

Kürestiñ ekinşi bağıtına say, Qwrama Ştattar öz odaqtastarımen ıntımaqtastıqtı arttıra tüsedi. Oğan qosa üşinşi bağıtta odaqtastarı men özge de senimdi serikteri arasındağı baylanıstı küşeytudi qolğa aluı kerek.

Maqalasınıñ soñında Pentagon basşısı barlıq elderdi Qıtay Halıq-azattıq armiyasınıñ qaupin azaytuğa ortaq atsalısuğa şaqırdı. «Bostandıqtı, adam qwqıqtarın jäne tärtipti bağalaytın elderdiñ AQŞ-tıñ jağında twruğa şaqıramın», – degen lebizin de qostı.

“The Qazaq Times”