Körneki suret. Foto: aşıq derekköz

Biıl eñ eleuli oqiğanıñ biri köpten kütken halıq sanağı bolmaq. Är on jıl sayın ötetin sanaq 2020 jılı eki kezeñmen jürgiziledi. Sanaq nätijesin esepteu uaqıtı biliktiñ sılbırlığı men qwlıqsızdığın bayqatpay ma?

Äueli, mausımnıñ 1-30 aralığında dayındıq kezeñi ötip, negizgi, yağni ekinşi kezeñ küzde boladı. Mausımdağı proceste üy-jay men ondağı twrğındardıñ naqtı esebi anıqtalsa, qazan ayında internet-saualnamamen qatar respondenttik saualnama alınadı dep josparlanıptı.

Wlttıq ekonomika ministrligi Statistika komitetiniñ törağası Nwrbolat Aydapkelov:  

– Internet-saualnamamen qatar 1-30 qazanda interv'yuerler jappay saualnama jürgizedi. Saualnama jauaptarı planşetke engiziledi. Internet arqılı mälimetter bergen respondentter interv'yuerler jürgizetin saualnamağa qatıspaydı. Halıqqa saualnama jürgizu barısında respondentti säykestendiru üşin swralatın adamnıñ JSN-i paydalanıladı. Saualnama ayaqtalğanda, halıq sanağınan ötkeni turalı anıqtama beriledi», – dedi.

Resmi ökildiñ dereginşe, halıq sanağına dayındıq jäne ötkizu üşin 8,2 mlrd teñgeqarjı qarastırılıptı.

Atalğan soma bwğan deyin ötken soñğı sanaqtıñ (2009 j.) byudjetine qarağanda 1,7 mlrd (6,5 mlrd)teñgege artıq.

Sonday-aq Aydapkelov 1 mlrd teñgege planşet satıp alınğanın, 3,7 mlrd teñge 32,5 mıñ sanaqşı qızmetkerge eñbekaqı töleuge bağıttılğanın habarladı. Sanaq jürgizuşi azamattarğa 75 mıñnan 113 mıñ teñge aralığında jalaqı töleu közdelgen desedi.

«Halıq sanağı boyınşa alğaşqı esep jeltoqsanda belgili boladı. Al, 2021 jıldıñ naurızında şamamen sanaq qorıtındısı jasaladı. Soñğı äri naqtı cifrdı 2021 jıldıñ soñında jariyalaymız», – dedi komitet jetekşisi.

Eki ayda ötetin sanaqtıñ naqtı esebin şığaruğa 12 ay qajet körinedi. Törtinşi öndiristik revolyuciyağa ayaq basqan, sandıq bağdarlamalardı damıtu boyınşa jetistigin jii söz etetin Qazaqstan biligi saualnamanı onlayn tetikpen ötkize otıra, nätijesin naqtılauğa jıl jwmsaytını qoğamnıñ narazılığın tudırıp otır.

2009 jılğı halıq sanağına bölingen 6,5 mlrd teñgeniñ 1,1 milliardı respublikalıq byudjetten qarastırılıp edi. Qarjı policiyası onıñ 764,8 mln teñge talan-tarajğa tüskenin, tek 379 mln ğana tiisti bağıtqa jwmsalğanın habarlağan.      

Memleket qwruşı qazaq wltınıñ ülesi 1999 jılı 14,9 mln adamnıñ 53,5 %-ın, 2009 jılı 16 mln adamnıñ 63,1%-ın qwrağan bolatın. Biraq soñğı sanaqtıñ naqtılığına qatıstı sarapşalar men azamattıq qoğam belsendileri kümänmen qaraydı. Sanaq qarjısınıñ jımqırıluı, sanaq audanınıñ tiisti deñgeyde qamtılmauı jäne eñ küdikti twsı qazaq halqınıñ ülesin birneşe märte kemitip tüzetilui bilikke senimdi azayttı.

“The Qazaq Times”