Körneki suret. Foto: aşıq derekköz

Ükimet otırısında koronavirus infekciya jağdayı tirkelmegeni turalı jäne Qıtaydan kelgen azamattardıñ häli turalı aytıldı.

JRVI simptomdarı men joğarı temperaturası bar 134 adam auruhanağa jatqızıldı, olardıñ 106-sı sauığıp şıqtı, 28-i äzirge stacionarlarda emdelude. Nauqastardıñ jağdayı qanağattanarlıq.

«Medicinalıq wyımdar twrğılıqtı jeri boyınşa Qıtaydan kelgen azamattardıñ densaulığın monitoringileu boyınşa jwmıstı jalğastıruda, 24 167 adam qamtıldı, onıñ işinde 1298-i – şetel azamattarı. Soñğı 14 kün işinde QHR-dan kelgen 8 851 adam medicinalıq baqılauğa alınğan, qalğan 15 316-sı inkubaciyalıq kezeñniñ ayaqtaluına baylanıstı monitoringten şığarıldı», – dedi densaulıq saqtau ministri E.Birtanov.

Ortalıq referens-zerthana bazasında asa qauipti infekciyalar wlttıq ortalığı biotehnologiya ortalığımen birlesip, koronavirustı jedel ayqındauğa mümkindik beretin diagnostikalıq jüyeni äzirledi.

«Büginde QHR aumağında 497 qazaqstandıq bar, olardıñ 337-si studentter. Biılğı 10 aqpannan 11 aqpanğa deyin Qazaqstannıñ 217 azamatı «Eyr Astana» äue kompaniyasınıñ çarterlik wşağımen Beyjiñ qalasınan elordağa jetkizildi. Osı jıldıñ 12 aqpanında QHR-dan  145 azamattı osınday reyspen şığaru josparlanğan. Azamattardı elge evakuaciyalau jwmıstarı ayaqtalğannan keyin QHR aumağında Qıtayda qaluğa niet bildirgen 343 azamatı qaladı», – dedi sırtqı ister ministri Mwhtar Tileuberdi.

Ükimet basşısı densaulıq saqtau ministrligine sanitarlıq-epidemiologiyalıq baqılau jwmıstarın jalğastırudı, al sırtqı ister ministrligine QHR-dağı qazaqstandıqtarmen tığız baylanıs ornatıp, olarğa qajetti kömek körsetudi tapsırdı.

“The Qazaq Times”