كورنەكى سۋرەت. فوتو: اشىق دەرەككوز

ۇكىمەت وتىرىسىندا كوروناۆيرۋس ينفەكتسيا جاعدايى تىركەلمەگەنى تۋرالى جانە قىتايدان كەلگەن ازاماتتاردىڭ ءحالى تۋرالى ايتىلدى.

جرۆي سيمپتومدارى مەن جوعارى تەمپەراتۋراسى بار 134 ادام اۋرۋحاناعا جاتقىزىلدى، ولاردىڭ 106-سى ساۋىعىپ شىقتى، 28-ءى ازىرگە ستاتسيونارلاردا ەمدەلۋدە. ناۋقاستاردىڭ جاعدايى قاناعاتتانارلىق.

«مەديتسينالىق ۇيىمدار تۇرعىلىقتى جەرى بويىنشا قىتايدان كەلگەن ازاماتتاردىڭ دەنساۋلىعىن مونيتورينگىلەۋ بويىنشا جۇمىستى جالعاستىرۋدا، 24 167 ادام قامتىلدى، ونىڭ ىشىندە 1298-ءى – شەتەل ازاماتتارى. سوڭعى 14 كۇن ىشىندە قحر-دان كەلگەن 8 851 ادام مەديتسينالىق باقىلاۋعا الىنعان، قالعان 15 316-سى ينكۋباتسيالىق كەزەڭنىڭ اياقتالۋىنا بايلانىستى مونيتورينگتەن شىعارىلدى»، – دەدى دەنساۋلىق ساقتاۋ ءمينيسترى ە.ءبىرتانوۆ.

ورتالىق رەفەرەنس-زەرتحانا بازاسىندا اسا قاۋىپتى ينفەكتسيالار ۇلتتىق ورتالىعى بيوتەحنولوگيا ورتالىعىمەن بىرلەسىپ، كوروناۆيرۋستى جەدەل ايقىنداۋعا مۇمكىندىك بەرەتىن دياگنوستيكالىق جۇيەنى ازىرلەدى.

«بۇگىندە قحر اۋماعىندا 497 قازاقستاندىق بار، ولاردىڭ 337-ءسى ستۋدەنتتەر. بيىلعى 10 اقپاننان 11 اقپانعا دەيىن قازاقستاننىڭ 217 ازاماتى «ەير استانا» اۋە كومپانياسىنىڭ چارتەرلىك ۇشاعىمەن بەيجىڭ قالاسىنان ەلورداعا جەتكىزىلدى. وسى جىلدىڭ 12 اقپانىندا قحر-دان  145 ازاماتتى وسىنداي رەيسپەن شىعارۋ جوسپارلانعان. ازاماتتاردى ەلگە ەۆاكۋاتسيالاۋ جۇمىستارى اياقتالعاننان كەيىن قحر اۋماعىندا قىتايدا قالۋعا نيەت بىلدىرگەن 343 ازاماتى قالادى»، – دەدى سىرتقى ىستەر ءمينيسترى مۇحتار تىلەۋبەردى.

ۇكىمەت باسشىسى دەنساۋلىق ساقتاۋ مينيسترلىگىنە سانيتارلىق-ەپيدەميولوگيالىق باقىلاۋ جۇمىستارىن جالعاستىرۋدى، ال سىرتقى ىستەر مينيسترلىگىنە قحر-داعى قازاقستاندىقتارمەن تىعىز بايلانىس ورناتىپ، ولارعا قاجەتتى كومەك كورسەتۋدى تاپسىردى.

“The Qazaq Times”