Bügin, 7 aqpan astanada bir top borışker bilikten mäselesin şeşip beruin talap etip, tağı da Aqordağa bettedi. Alayda narazı toptı bwl jolı da arnayı jasaq ökilderi bögep, arı qaray ötkizbedi.

Azattıqqa bergen swqbatında azamat Qanağat Täkeeva:

– Biz bügin ğana barlıq bankterdiñ qayta qarjılandıru bağdarlamasına qatısudan bas tartıp jatqanın bildik. Biz şok boldıq. Sebebi bwğan deyin 17 bank bağdarlamağa qosıldı delingen edi. Bankter Wlttıq bank wsınıp otırğan tüsiniksiz şarttardı qabılday almaymız deydi. Wlttıq bank te birde-bir banktiñ qol qoymağanın rastadı. Endi biliktiñ sözine senbeymiz. Qoşanov pen Toqaevtıñ özimen kezdestirudi talap etemiz,  – dedi.

Belsendiniñ sözine qarağanda, keşe borışkerler wlttıq ekonomika vice-ministri, ädilet vice-ministri, sot aktilerin orındau departamenti, joğarğı sot ökilderimen kezdesken. Biraq borışkerler şeneunikterdiñ «mäseleleriñizdi şeşemiz» uädelerinen şarşağanın, naqtı äreket joqtığın ayttı.

Borışker Äliya Baybolatova «Kelemiz – aldap-sulap şığarıp saladı. Erteñ banktiñ akcionerleri keledi deydi. Barsañ - akcionerler twrmaq, tas ta joq. Olar tipti bağdarlama barın da bilmeydi. Olar halıqtı osında qinap qoyıp, qalay tamaq işedi? Neşe kün boldı zarlap jürgenimizge? Jauap taba almay jatırmız», – deydi.

Aqpannıñ 4-i men 5-si de eldiñ är aymağınan kelgen, ekonomikalıq dağdarıstan ipotekasın töley almay qalğan borışkerler Aqorda aldına barar jolda arnayı jasaqtıñ kedergisine tap bolğan edi.

Qarjı sarapşıları 2014-2015 jıldarı teñgeniñ ayaqastı esepsiz qwldırauı twraqtı tabıstı twralatqanımen qoymay, kelisimşarttı dollar talabımen tüzgen bank twtınuşılarına auır soqqı keltirgenin aytadı.

2000 jıldıñ alğaşqı onjıldığında ekinşi deñgeyli bankter halıqtıñ qarjılıq-qwqıqtıq sauatsızdığın paydalanıp, jappay zor üstememen ipotekalıq nesie ülestirgen soñ el jağdayı äli eseñgirep twrğanı jii sınaladı. Osı orayda Wlttıq bank 2015 jılı ipotekalıq kreditti qayta qarjılandıru bağdarlamasın äzirlegenimen, bwl mäseleni şeşuge qauqarsızdıq tanıtıp keledi.

Bıltır küzdiñ basında memleket basşısı Toqaev Qazaqstan halqına arnağan joldauında «Halıq ünine qwlaq asatın memleket» twjırımdamasın tanıstırğan edi. Bwl «azamattardıñ barlıq sındarlı ötiniş-tilekterin jedel äri tiimdi qarastıratının» aytqan prezidenttiñ sözi men isiniñ teñdigi turalı qoğam pikiri är aluan. Toqaev twñğış joldauında:

«Bilik pen qoğam arasında twraqtı dialog ornatu arqılı ğana qazirgi geosayasi ahualğa beyimdelgen üylesimdi memleket qalıptastıruğa boladı. Sondıqtan azamattıq qoğamğa qoldau körsetip, onıñ äleuetin nığayta tüsu kerek. Sonday-aq, asa mañızdı jalpı memlekettik mindetterdi şeşu üşin talqılau jwmıstarına azamattıq qoğamnıñ mümkindikterin keñinen qoldanu qajet», – degen bolatın.

“The Qazaq Times”