Almatı qalasındağı koronavirusqa qarsı profilaktikada oqu-jattığu kezinen körneki suret. Foto: aşıq derekköz

Qıtaydan Qazaqstanğa kelgen tağı 6 adam auruhanağa jetkizildi. Sonday-aq elimizdiñ  bas sanitarlıq därigeri Jandarbek Bekşin osığan deyin emhanağa jatqan eki adamdı üyine qaytarğanın habarladı.

«Tañerteñ tört nauqas auruhanağa jetkizildi. Olardıñ ekeui ambulatoriyalıq-emhanalıq kömek körsetilgennen keyin bosatıldı. Jaña ğana Almatıda bir adamdı gospitalizaciyalau turalı aqparat kelip tüsti. Aqmola oblısında bir otbasınan bes kisi  auruhanağa jatqızıldı. Olar da Qıtayğa barğan. Olarda jedel respiratorlıq virustıñ belgileri bayqaldı. Eki balanıñ dene qızuı köterildi. Al eresekterden eşqanday simptom bilinbedi. Dese de otbasılıq baylanısta bolğandıqtan, olar da auruhanağa jatqızıldı»,  – dep habarladı Bekşin.

Onıñ aytuınşa, medicina qızmetkerleri soñğı eki aptada Qıtaydan kelgen azamattardı anıqtap jatır. Ministr soñğı 14 künde Qıtaydan kelgen qazaqstandıqtar men şeteldik azamattar dereu jergilikti poliklinikağa barıp, tirkeuge twruın äri tekseristen ötuin swradı.

Densaulıq saqtau ministri Birtanov auruhanağa jatqızılğan barlıq pacientten qan analizi alınğanın ayta otırıp, «üş kün işinde naqtı diagnoz qoyıladı. Tiisti terapiya bastaldı», – dep tüsindirdi.

Bas därigerdiñ sözinşe, 6 qañtardan beri QHR aumağınan 25 858 adam Qazaqstan şekarası arqılı ötken. Olardıñ arasında qazaqstandıqtar da, şeteldikter de bar. Bügin kündiz 23 azamattıñ dene qızuı köterilip, törteui auruhanağa jatqızılğanı habarlanğan bolatın.

Vedomstvo indet profilaktikası retinde nauqastardı ornalastıruğa 4,5 mıñ orın dayındap qoyğan desedi. Düniejüzilik densaulıq saqtau wyımınıñ mälimetinşe, Qıtayda koronovirustan köz jwmğan adamdardıñ sanı 106-ğa jetti. Infekciyanı 30 provinciyada 4515 adam jwqtırğan. Älemniñ 15 elinde 80 nauqas tirkelgen.

"The Qazaq Times"