الماتى قالاسىنداعى كوروناۆيرۋسقا قارسى پروفيلاكتيكادا وقۋ-جاتتىعۋ كەزىنەن كورنەكى سۋرەت. فوتو: اشىق دەرەككوز

قىتايدان قازاقستانعا كەلگەن تاعى 6 ادام اۋرۋحاناعا جەتكىزىلدى. سونداي-اق ەلىمىزدىڭ  باس سانيتارلىق دارىگەرى جانداربەك بەكشين وسىعان دەيىن ەمحاناعا جاتقان ەكى ادامدى ۇيىنە قايتارعانىن حابارلادى.

«تاڭەرتەڭ ءتورت ناۋقاس اۋرۋحاناعا جەتكىزىلدى. ولاردىڭ ەكەۋى امبۋلاتوريالىق-ەمحانالىق كومەك كورسەتىلگەننەن كەيىن بوساتىلدى. جاڭا عانا الماتىدا ءبىر ادامدى گوسپيتاليزاتسيالاۋ تۋرالى اقپارات كەلىپ ءتۇستى. اقمولا وبلىسىندا ءبىر وتباسىنان بەس كىسى  اۋرۋحاناعا جاتقىزىلدى. ولار دا قىتايعا بارعان. ولاردا جەدەل رەسپيراتورلىق ۆيرۋستىڭ بەلگىلەرى بايقالدى. ەكى بالانىڭ دەنە قىزۋى كوتەرىلدى. ال ەرەسەكتەردەن ەشقانداي سيمپتوم بىلىنبەدى. دەسە دە وتباسىلىق بايلانىستا بولعاندىقتان، ولار دا اۋرۋحاناعا جاتقىزىلدى»،  – دەپ حابارلادى بەكشين.

ونىڭ ايتۋىنشا، مەديتسينا قىزمەتكەرلەرى سوڭعى ەكى اپتادا قىتايدان كەلگەن ازاماتتاردى انىقتاپ جاتىر. مينيستر سوڭعى 14 كۇندە قىتايدان كەلگەن قازاقستاندىقتار مەن شەتەلدىك ازاماتتار دەرەۋ جەرگىلىكتى پوليكلينيكاعا بارىپ، تىركەۋگە تۇرۋىن ءارى تەكسەرىستەن ءوتۋىن سۇرادى.

دەنساۋلىق ساقتاۋ ءمينيسترى ءبىرتانوۆ اۋرۋحاناعا جاتقىزىلعان بارلىق پاتسيەنتتەن قان ءاناليزى الىنعانىن ايتا وتىرىپ، «ءۇش كۇن ىشىندە ناقتى دياگنوز قويىلادى. ءتيىستى تەراپيا باستالدى»، – دەپ ءتۇسىندىردى.

باس دارىگەردىڭ سوزىنشە، 6 قاڭتاردان بەرى قحر اۋماعىنان 25 858 ادام قازاقستان شەكاراسى ارقىلى وتكەن. ولاردىڭ اراسىندا قازاقستاندىقتار دا، شەتەلدىكتەر دە بار. بۇگىن كۇندىز 23 ازاماتتىڭ دەنە قىزۋى كوتەرىلىپ، تورتەۋى اۋرۋحاناعا جاتقىزىلعانى حابارلانعان بولاتىن.

ۆەدومستۆو ىندەت پروفيلاكتيكاسى رەتىندە ناۋقاستاردى ورنالاستىرۋعا 4,5 مىڭ ورىن دايىنداپ قويعان دەسەدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، قىتايدا كورونوۆيرۋستان كوز جۇمعان ادامداردىڭ سانى 106-عا جەتتى. ينفەكتسيانى 30 پروۆينتسيادا 4515 ادام جۇقتىرعان. الەمنىڭ 15 ەلىندە 80 ناۋقاس تىركەلگەن.

"The Qazaq Times"