«Jala japtı äri qorladı» degen ayıppen  27 ayğa sottalğan belgili aymaq jurnalisi Amangeldi Batırbekov aqtaldı.

Azattıq taratqan aqparat boyınşa,  halıqaralıq deñgeyde jii köterilgen Batırbekovtiñ «naqaq qamalu» mäselesin  Türkistan oblıstıq sotı 13 qaraşadan beri apellyaciyalıq şağım retinde qarap,  bügin onı aqtap şıqqan.

Sud'ya Taubay Qadırbaev ükim soñında «Batırbekov sot zalınan bosatılsın» dedi.

Bıltır küzde (23 qırküyek) Sarıağaş audandıq sotı Keles audandıq bilim böliminiñ basşısı Bahtiyar Abdievtiñ tüsirgen arızımen audandıq «Sarıağaş info» gazetiniñ redaktorı, azamattıq qoğam belsendisi, jurnalisti Qılmıstıq kodekstiñ «jala jabu» (130-bap) jäne «qorlau» (131-bap) baptarı boyınşa kinäli dep tanıp, eki jıldan köp merzimge bas bostandığınan ayırğan edi.

Keles audandıq bilim böliminiñ basşısı Bahtiyar Abdiev pen "Zañğar Medet" qoğamdıq birlestiginiñ bastığı Läyla Darhanbaeva Batırbekovtiñ üstinen «äleumettik jelide pikir jazğanı üşin» sotqa bergen.

Bwğan deyin köptegen halıqaralıq wyımdar men qwqıq qorğauşılar joğarğı instanciyalardan qamauda otırğan jurnalist Batırbekovtı bosatudı swrağan. Naqtıraq aytqanda, qazan ayınıñ  soñında bwrın halıqaralıq «Şekarasız tilşiler» (Reporters sans frontières/RSF) jäne «Jurnalisterdi qorğau komiteti» (Committee to Protect Journalists/CPJ) wyımdarı Qazaqstan biligin aymaqtağı belgili jurnalist Amangeldi Batırbekovti dereu bosatuğa, söz bostandığın şektemeuge şaqırdı.

«Jurnalisterdi qorğau komiteti» (CPJ) wyımı «jala jabu jäne qorlau turalı qılmıstıq zañdarın zayırlılıqqa tän qwndılıqtarmen jetildiru kerek, mwnday mäseleler azamattıq ister qatarında qaraluı tiis» degen bolatın.

RSF halıqaralıq wyımınıñ reytingisinde Qazaqstan söz bostandığı  boyınşa 180 eldiñ işinde 158-orında twr. Sonday-aq «Ädil söz» söz bostandığın qorğaudıñ halıqaralıq qorınıñ esebinşe, «Jurnalisterdiñ zañdı käsibi qızmetine kedergi jasau» reestrinde HHİ ğasır bastalğalı beri, 2000 jıldıñ qañtarı-2019 jıldıñ qırküyegi aralığında tilşiler jwmısına 839 kedergi keltiru faktisi tirkelgen.

"The Qazaq Times"